(តាកែវ)៖ អភិបាលស្រុកព្រៃកប្បាស លោក គិន​ ភក្ដី នៅព្រឹកថ្ងៃទី១៣ ខែកក្កដា ឆ្នាំ២០២៦នេះ បានដឹកនាំមន្ដ្រីក្រោមឱវាទ សិស្សានុសិស្ស និងប្រជាពលរដ្ឋប្រមាណ៣០០នាក់ ចុះដាំដើមផ្កាសាគូរ៉ា ចំនួន១០០ដើម និងដើមក្ងោក ចំនួន២០០ដើម ដោយពិធីនេះបានរៀបចំធ្វើឡើងនៅឃុំចំប៉ា និងឃុំតាំងយ៉ាប។

លោក គិន ភក្ដី អភិបាលស្រុកព្រៃកប្បាស បានឲ្យដឹងថា ការរៀបចំដាំដើមផ្កាសាគូរ៉ា និងដើមក្ងោកនេះ គឺដោយយោងតាមការណែនាំរបស់លោកអភិបាលខេត្តតាកែវ វ៉ី សំណាង ដែលតែងតែណែនាំឲ្យអាជ្ញាធស្រុក ធ្វើការដាំដើមឈើ និងដាំដើមផ្កាតាមដងផ្លូវ ដើម្បីកែកម្អសោភ័ណភាពស្រុកឲ្យកាន់តែស្រស់បំព្រងធ្វេឡើង ហើយក៏ដេីម្បីចូលរួមអបអរសាទរ​ «រុក្ខទិវា​ ៩​ កក្កដា​ ២០២៦​» និងប្រកាសបើកយុទ្ធនាការ «លើកកម្ពស់សោភ័ណភាពបរិស្ថាន សុវត្ថិភាព និងអភិវឌ្ឍន៍បែបបៃតង ក្នុងស្រុកព្រៃកប្បាស» ផងដែរ។

លោកអភិបាលស្រុកព្រៃកប្បាស បានបន្ថែមថា បច្ចុប្បន្ននេះរដ្ឋបាលស្រុកព្រៃកប្បាស បានខិតខំកែលម្អហេដ្ឋារចនាសម្ព័ន្ធសាធារណៈនានា រួមទាំងការដាំដើមឈើ ការដាំដើមផ្កាលំអបន្ថែមទៀត ដើម្បីធ្វើយ៉ាងណាឲ្យស្រុកព្រៃកប្បាស កាន់តែមានភាពស្រស់បំព្រងល្អប្រសើឡើង ដើម្បីឆ្លើយតបទៅនឹងតម្រូវការរបស់ប្រជាពលរដ្ឋលើផ្នែកបរិស្ថាន និងសុខភាព។

ឆ្លៀតក្នុងឱកាសនោះ លោកអភិបាលស្រុកព្រៃកប្បាស គិន ភក្ដី បានអំពាវនាវដល់អាជ្ញាធឃុំ ភូមិ ម្ចាស់ទីតាំងរោងចក្រ សហគ្រាស ជាពិសេសប្រជាពលរដ្ឋត្រូវរួមគ្នាដាំដើមឈើ និងជួយថែទាំដើមផ្កា ដែលអាជ្ញាធរបានដាំលម្អតាមដងផ្លូវ ហើយត្រូវចូលរួមសម្អាតបរិស្ថានតាមរយៈសំអាតនៅមុខផ្ទះ និងទីតាំងអាជីវកម្មរបស់ខ្លួនឱ្យបានជាប់ជាប្រចាំ ហើយត្រូវវេចខ្ចប់កាកសំណល់សំរាម ឱ្យបានល្អ មិនត្រូវបោះចោលសំរាម គ្មានសណ្តាប់ធ្នាប់នៅតាមទីសាធារណៈនោះទេ។ បើធ្វើដូច្នោះបានទើបអាចធ្វើឲ្យស្រុកព្រៃកប្បាស មានអនាម័យបរិស្ថានបានល្អ និងមានសោភ័ណភាព កាន់តែស្រស់បំព្រងមួយកម្រិតទៀត៕