(កំពង់ឆ្នាំង)៖ ដោយអនុវត្តទៅតាមគោលការណ៍របស់រាជរដ្ឋាភិបាល ទៅលើវិស័យធារាសាស្ត្រ និងវិស័យទេសចរណ៍ នៅព្រឹកថ្ងៃទី១២ ខែកក្កដា ឆ្នាំ២០២៦នេះ លោក យ៉ែម លក្ខិណា អភិបាលស្រុកកំពង់លែង បានដឹកនាំគណៈបញ្ជាការឯកភាពរដ្ឋបាលស្រុក សិស្សានុសិស្ស ប្រជាពលរដ្ឋក្នុងសហគមន៍ និងប្រជាពុទ្ធបរិស័ទជាសប្បុរសជន រៀបចំពិធីក្រុងពាលី ដើម្បីសុំសេចក្តីសុខពីម្ចាស់ទឹកម្ចាស់ដី កសាងទំនប់បង្ហៀរទឹកមួយកន្លែង នៅចំណុចជួរជើងភ្នំ ស្ថិតក្នុងឃុំដារ ស្រុកកំពង់លែង ខេត្តកំពង់ឆ្នាំង ក្នុងគោលបំណងទប់ទឹក ដើម្បីស្រោចស្រពផលដំណាំរបស់ប្រជាកសិករផង និងបង្កើតជាតំបន់ទេសចរណ៍ធម្មជាតិនៅទីនេះផង។

លោកកអភិបាលស្រុក បានបញ្ជាក់ថា ដោយមានការយកចិត្តទុកដាក់ទៅលើវិស័យធារាសាស្ត្រ និងវិស័យទេសចរណ៍ ដែលវិស័យធារាសាស្រ្តដើរតួនាទីយ៉ាងសំខាន់ ក្នុងការអភិវឌ្ឍកសិកម្ម និងសេដ្ឋកិច្ច កត្តាដ៏សំខាន់នេះ រាជរដ្ឋាភិបាលក៏បានដាក់ចេញនូវយុទ្ធសាស្ត្រចតុកោណដំណាក់កាលទី៣ ដែលមានអាទិភាពខ្ពស់លើការគ្រប់គ្រងធនធានទឹក និងប្រព័ន្ធធានាសាស្ត្រ។ ដោយឡែក វិស័យទេសចរណ៍ រាជរដ្ឋាភិបាលកម្ពុជា ក៏មានគោលនយោបាយច្បាស់លាស់ ក្នុងការប្រែក្លាយទីតាំងមួយចំនួនក្នុងតំបន់ការពារធម្មជាតិ ដែលមានសក្តានុពលទេសចរណ៍ទៅជាតំបន់ទេសចរណ៍ធម្មជាតិ ដោយបាននាំមកនូវអត្ថប្រយោជន៍ជាច្រើន ទាំងកំណើនសេដ្ឋកិច្ច ក្នុងសហគមន៍ទាំងការអភិរក្សធនធានធម្មជាតិ និងជីវៈចម្រុះផងដែរ។

លោកអភិបាលស្រុក បានបន្ថែមថា កន្លងមកលោកបានផ្ដួចផ្ដើមក្នុងការកសាងប្រព័ន្ធធារាសាស្ត្រ មានដូចជាទំនប់បង្ហៀរទឹក និងបានប្រែក្លាយតំបន់នោះឲ្យទៅជាតំបន់ទេសចរណ៍ធម្មជាតិបាន១ទីតាំង គឺនៅចំណុចទំនប់អាងភ្នំព្រិច ស្ថិតក្នុងឃុំដារ ទីនោះក៏មានសក្តានុពលផ្នែកទេសចរណ៍ធម្មជាតិ ដែលសំបូរទៅដោយទេសភាពព្រៃភ្នំ ជុំវិញ គឺកសាងដោយថវិការបស់រដ្ឋបាលស្រុក បច្ចុប្បន្ននៅទីនោះកំពុងមានការទាក់ទាញភ្ញៀវទេសចរទៅលេងកម្សាន្ដជាបន្តបន្ទាប់។

ចំពោះការកសាងទំនប់បងកហៀរទឹកនៅទីនេះ លោកក៏នឹងប្រែក្លាយទីនេះឲ្យទៅជាតំបន់ទេសចរណ៍ធម្មជាតិ ដូចនៅតំបន់អាងភ្នំព្រិចនោះដែរ នៅទីនេះក្រៅពីផ្ដល់នូវអត្ថប្រយោជន៍ដល់ប្រជាកសិករ ទៅលើផ្នែកធារាសាស្ត្រវាក៏បានផ្ដល់នូវអត្ថប្រយោជន៍ដ៏សំខាន់ ទៅលើវិស័យទេសចរណ៍ធម្មជាតិ ដោយសារនៅតំបន់នេះ គឺមានសក្តានុពលផ្នែកទេសចរណ៍ដ៏សំខាន់ៗ ព្រោះជាតំបន់ជើងភ្នំជាច្រើនខ្នងតម្រាបជួរលាតសន្ធឹងវែងអន្លាយ លាយឡំទៅនិងធម្មជាតិព្រៃភ្នំមានពណ៌ខៀវស្រង៉ាត់ ដែលគួរជាទីគយគន់ និងមានភាពទាក់ទាញ។

ការផ្ដួចផ្ដើមកសាងទំនប់បង្ហៀរទឹក និងការកសាងផ្លូវមួយខ្សែនៅតាមបណ្ដោយជើងភ្នំនេះ ក្នុងគោលបំណងសំខាន់គឺដើម្បីលើកស្ទួយជីវភាពរ ស់នៅរបស់ប្រជាសហគមន៍ក្នុងមូលដ្ឋាន និងជំរុញការទាក់ទាញទេសចរណ៍ជាតិ-អន្តរជាតិ ក៏ដូចជាផ្ដល់ឱកាសការងារដល់ពលរដ្ឋក្នុងសហគមន៍ ពិសេសពង្រឹងប្រសិទ្ធភា ពក្នុងការអភិរក្សធនធានធម្មជាតិ និងជីវៈចម្រុះក៏ដូចជាបរិស្ថាន។ ការបង្កើតតំបន់ទេសចរណ៍ ដើម្បីទទួលបានភាពជោគជ័យក៏ត្រូវទាមទារឲ្យមានកិច្ចសហប្រតិបត្តិការរវាងវិស័យឯកជន សហគមន៍ និងដៃគូអភិវឌ្ឍន៍ផងដែរ៕