(ភ្នំពេញ)៖ រដ្ឋបាលរាជធានីភ្នំពេញ បានបន្តចុះស្តារប្រព័ន្ធលូជាអាទិភាព សំដៅធ្វើយ៉ាងណាការពារការដក់ទឹក និងការលិចដោយទឹកភ្លៀងលើផ្លូវសំខាន់ៗជាបន្តបន្ទាប់។ ជាក់ស្តែងនាព្រឹកថ្ងៃទី១៣ ខែកក្កដា ឆ្នាំ២០២៦ លោក ឯក ឃុនដឿន អភិបាលរងរាជធានីភ្នំពេញ តំណាងលោក ឃួង ស្រេង អភិបាលរាជធានីភ្នំពេញ បានដឹកនាំក្រុមការងារចុះស្តារប្រព័ន្ធលូ ដើម្បីកាយភក់ និងសំរាម ដែលអាចធ្វើឱ្យរាំងស្ទះដល់លំហូរទឹកភ្លៀង ដែលចាប់ផ្តើមពីចំណុចផ្លូវលេខ២១១ និងទៅកាន់ផ្លូវសំខាន់ៗជាច្រើនទៀត ដូចជាផ្លូវលេខ២១៥, ផ្លូវលេខ១៨២, ប្រមាណជា ៣.២៣៤ម៉ែត្រ ក្នុងភូមិសាស្ត្រខណ្ឌ ៧មករា ដែលជាខណ្ឌអទិភាព និងស្ថិតនៅកណ្តាលរាជធានីភ្នំពេញ។

ក្នុងឱកាសនេះលោក ឯក ឃុនដឿន បានឱ្យក្រុមការងារអនុវត្តតាមការណែនាំរបស់លោក ឃួង ស្រេង អភិបាលរាជធានីភ្នំពេញ ដែលបានណែនាំឱ្យយកចិត្តទុកដាក់ ចំពោះផ្លូវណា ឬតំបន់ណាដែលចាំបាច់ ត្រូវធ្វើការស្តារភ្លាមៗ ដើម្បីធានាថា ប្រព័ន្ធលូមិនរាំងស្ទះកាកសំណល់ និងសំរាម សំដៅបើកមុខលូឱ្យស្អាតល្អ និងធ្វើឱ្យលំហូរទឹកភ្លៀងអាចហូរចេញបានលឿន និងបានឱ្យក្រុមការងារឆែកមើលតាមប្រព័ន្ធលូ ដែលមិនទាន់មានការតភ្ជាប់បង្ហូរចេញត្រូវតភ្ជាប់ ខណៈបណ្តាញលូណាដែលមិនទាន់បើកមុខធំ ក៏ត្រូវបើកឱ្យអស់ ដោយសារស្ថានីយបូមទឹកមួយចំនួន បានសាងសង់រួចរាល់ អាចធានាដល់លំហូរទឹកភ្លៀងបានហើយ។

លោក ឯក ឃុនដឿន ក្នុងនាមរដ្ឋបាលរាជធានីភ្នំពេញ ក៏បានអំពាវនាវដល់ប្រជាពលរដ្ឋទាំងអស់ មេត្តាកុំចាក់សាប រៀបការូឡាលើគម្របលូ និងយកដីចាក់បិទមាត់លូផងដែរ។

សម្រាប់យុទ្ធនាការស្ដារលូ អណ្ដូងលូ កាយភក់ និងសំរាម ក្នុងខណ្ឌកណ្ដាលក្រុងទាំង ៥នេះ ជាផែនការរបស់រដ្ឋបាលរាជធានីភ្នំពេញ ហើយការងារទាំងនេះ ធ្វើឡើងក្រោមការយកចិត្តទុកដាក់ពីលោក ឃួង ស្រេង អភិបាលរាជធានីភ្នំពេញ ក្នុងផែនការត្រៀមរំដោះជំនន់ទឹកភ្លៀង ដេីម្បីបញ្ចៀសការជន់លិចផ្ទះសម្បែង និងហេដ្ឋារចនាសម្ព័ន្ធនានាក្នុងរដូវវស្សានេះ។

គួរបញ្ជាក់ដែរថា សកម្មភាពចុះស្តារ និងកាយភក់យកសំរាម ចេញពីបណ្តាញលូ ក្នុងខណ្ឌ៧មករា នាពេលនេះ គឺជាការពង្រីកសកម្មភាពស្តារ និងកាយភក់ និងសំរាមបន្តពីខណ្ឌសំខាន់ៗផ្សេងៗ ជាពិសេសខណ្ឌដែលនៅកណ្តាល​រាជធានីភ្នំពេញទាំង ៥តែម្តង ពោលរដ្ឋបាលរាជធានីភ្នំពេញ បានអនុវត្តចំពោះខណ្ឌដូនពេញ, ខណ្ឌចំការមន និងខណ្ឌ ៧មករា ជាខណ្ឌទី៣ ផងដែរ។ ក្នុងប្រតិបត្តិការចុះស្តារលូ និងកាយភក់យកសំរាមចេញពីប្រព័ន្ធលូនេះ ធ្វើឡើងដោយមានគ្រឿងចក្រជាច្រើនគ្រឿង រដ្ឋបាលរាជធានីនិងពីមន្ទីរសាធារណការ និងដឹកជញ្ជូនរាជធានីភ្នំពេញផងដែរ៕