​(ភ្នំពេញ)៖ លោក ចាន់ យុត្ថា រដ្ឋលេខាធិការ និងជាអ្នកនាំពាក្យក្រសួងធនធានទឹក និងឧតុនិយម បានបង្ហាញបច្ចុប្បន្នភាពអំពីស្ថានភាពជំនន់ទឹកភ្លៀង ដែលបាននិងកំពុងកើតឡើងនៅតាមបណ្តាខេត្តមួយចំនួន ជាពិសេសនៅតំបន់ជួរភ្នំក្រ​វ៉ាញ ខណៈស្ថានភាពស្ថិតក្នុងកម្រិតអាចគ្រប់គ្រងបាន និងមិន​បានផ្តល់ផលប៉ះពាល់នោះទេ។

លោកបានបញ្ជាក់ថា ភ្លៀងបានចាប់ផ្តើមធ្លាក់ខ្លាំងតាំងពីថ្ងៃទី១០ ខែកក្កដា ឆ្នាំ២០២៦ ដោយធ្លាក់ជាប់ៗគ្នានៅតំបន់ជួរភ្នំក្រវាញ ក្នុងភូមិសាស្ត្រខេត្តបាត់ដំបង ពោធិ៍សាត់ កំពង់ស្ពឺ កោះកុង ព្រះសីហនុ និងផ្នែកខ្លះនៃខេត្តប៉ៃលិន រួមទាំងតំបន់ឆ្នេរ និងលំហសមុទ្រផងដែរ។

ក្រៅពីនេះ ជំនន់ទឹកភ្លៀងក៏បានកើតឡើងនៅក្រុងកំពត ដោយសារភ្លៀងធ្លាក់ជាង ១១០មីលីម៉ែត្រ ប៉ុន្តែស្ថានភាពបានធូរស្រាលទៅវិញហើយ។ ចំណែកនៅខេត្តកោះកុង ​មានជំនន់ហូរស្រុងពីតំបន់ជួរភ្នំ បណ្តាលឱ្យរាំងស្ទះដល់ ការធ្វើដំណើរនៅតំបន់ខ្លះ ហើយអាជ្ញាធរបានផ្អាកផ្លូវមួយចំនួនជាបណ្តោះអាសន្ន។ ចំណែកនៅជីផាត ស្ថានភាពទឹកក៏កំពុងស្រកបណ្តើរៗ។

ដោយឡែកនៅខេត្តព្រះសីហនុ ផ្លូវជាតិលេខ៤ ដែលធ្លាប់លិច នៅឆ្នាំនេះ មិនមានការលិចនោះទេ ដោយសារក្រសួងសាធារណការបានកែសម្រួលរួចរាល់ ប៉ុន្តែផ្លូវនៅក្នុងឃុំមួយចំនួនដូចជាឃុំអូរត្រេះ និងឃុំដងពែង នៅតែលិច ហើយស្ថានភាពរំពឹងថានឹងធូរស្រាលនៅពេលល្ងាច។

រីឯនៅនៅខេត្តបាត់ដំបងវិញ ភ្លៀងធ្លាក់ខ្លាំងនៅស្រុកសំឡូត ប៉ុន្តែទឹកបានធូរស្រាលច្រើនហើយ និងបា​នហូរចូលអាងទឹកសេកសក បន្ទាប់ពីក្រសួងបានបើកទ្វាររំដោះទឹកចេញ។ តែយ៉ាងណាលោកបញ្ជាក់ថា ស្ថានភាពទឹកស្ទឹងសង្កែ កំពុងងើបឡើង ដូច្នេះប្រជាពលរដ្ឋដែលរស់នៅអមសងខាងស្ទឹង ត្រូវមានការប្រុងប្រយ័ត្ន។

ដោយឡែកនៅខេត្តកំពង់ស្ពឺ ដែលកាលពីថ្ងៃទី១២ កក្កដា មានបាក់ស្ពាននៅស្រុកភ្នំស្រួច និង មានជំនន់ទឹកភ្លៀងនៅតំបន់ខ្នងផ្សារ ភ្នំឱរ៉ាល់ បានធូរស្រាលហើយ ស្របពេលដែលទឹកស្ទឹងព្រែកត្នោត ក៏មិនទាន់បង្ហាញសញ្ញាណអ្វីដែរ។

​លោក ចាន់ យុត្ថា បានបញ្ជាក់ថា ស្ថានភាពទឹកជំនន់ទាំងមូលគឺអាចគ្រប់គ្រងបានទាំងស្រុង។ តែយ៉ាងណា លោកសម្តែងការសោកស្តាយ ចំពោះករណីលិចទូកនេសាទបណ្តាលឱ្យប្រជានេសាទម្នាក់ស្លាប់នៅឃុំថ្មស ស្រុកបទុមសាគរ ខេត្តកោះកុង។ គិតត្រឹមរសៀលថ្ងៃទី១៣ ខែកក្កដា ឆ្នាំ២០២៦ ​សពអ្នកនេសាទរូបនេះក៏ត្រូវបានរកឃើញផងដែរ​៕