(ភ្នំពេញ)៖ លោក ស៊ុន មេសា អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានឱ្យដឹងថា ក្នុងរយៈពេលជាង ២ខែប៉ុណ្ណោះ កម្មវិធីទទួលស្គាល់ជំនាញអតីតពលករខ្មែរ ដែលវិលត្រឡប់មកពីប្រទេសថៃ សម្រេចបានអ្នកចូលរួមជាង ៧,៥០០នាក់ ដែលជាលទ្ធផលលើសការរំពឹងទុក បើធៀបនឹងផែនការដែលគ្រោងសម្រេចនៅក្នុងឆ្នាំ២០២៦។ បច្ចុប្បន្ន ក៏នៅមានអតីតពលករជាច្រើនរយនាក់ទៀត កំពុងបន្តចុះឈ្មោះដើម្បីទទួលការវាយតម្លៃ និងទទួលស្គាល់ជំនាញ។

នាឱកាសនេះដែរ លោក ស៊ុន មេសា បានបញ្ជាក់ថា កម្មវិធីនេះជាជំហានដំបូងក្នុងការជួយអតីតពលករឱ្យទទួលបានវិញ្ញាបនបត្រទទួលស្គាល់ជំនាញផ្លូវការ។ ប្រសិនបើមានតម្រូវការបន្ថែម រាជរដ្ឋាភិបាលនឹងពង្រីកកម្មវិធីទៅកាន់វិស័យផ្សេងៗទៀត ដើម្បីផ្តល់ឱកាសដល់អតីតពលករ និងពលរដ្ឋខ្មែរនៅក្នុងប្រទេស។
ជាក់ស្តែង ក្រោយទទួលបានវិញ្ញាបនបត្រទទួលស្គាល់ជំនាញ ប្រាក់ចំណូលរបស់កម្មករជំនាញបានកើនឡើងគួរឱ្យកត់សម្គាល់។ អ្នកខ្លះដែលធ្លាប់រកបានប្រមាណ ២៥០បាតក្នុងមួយថ្ងៃនៅប្រទេសថៃ អាចរកចំណូលបានពី ៦ម៉ឺន ទៅ ៨ម៉ឺនរៀលក្នុងមួយថ្ងៃនៅកម្ពុជា ខណៈអ្នកមានបទពិសោធន៍គ្រប់គ្រងការដ្ឋាន អាចទទួលបានរហូតដល់ ១០ម៉ឺនរៀលក្នុងមួយថ្ងៃ។

អ្នកនាំពាក្យរូបនេះ បានបន្តថា អ្នកដែលមានជំនាញអគ្គិសនី ឬជំនាញផ្សេងៗ ក៏អាចចេញប្រកបអាជីវកម្មដោយខ្លួនឯង ដោយសារមានវិញ្ញាបនបត្របញ្ជាក់សមត្ថភាព និងទទួលបានទំនុកចិត្តពីអតិថិជនកាន់តែខ្ពស់។ កម្មវិធីនេះ ទទួលបានការគាំទ្រពីវិស័យឯកជន ព្រោះការវាយតម្លៃសមត្ថភាពត្រូវបានអនុវត្ត ដោយអ្នកជំនាញមកពីវិស័យឯកជន ដែលធានាគុណភាព និងឆ្លើយតបនឹងតម្រូវការទីផ្សារការងារ។

ជាមួយគ្នានេះ រាជរដ្ឋាភិបាលក៏បានដកចេញនូវរបាំងនានា ដើម្បីសម្រួលដល់អតីតពលករក្នុងការចូលរួម ដោយរដ្ឋជាអ្នករ៉ាប់រងការចំណាយទាំងស្រុង និងបន្ធូរបន្ថយលក្ខខណ្ឌឯកសារ។ សម្រាប់អ្នកមិនចេះអក្សរ ក៏មានមន្ត្រីជួយអានសំណួរ និងបំពេញឯកសារជូនផងដែរ។ កម្មវិធីទទួលស្គាល់ជំនាញនេះ ត្រូវបានចាត់ទុកថា ជាយុទ្ធសាស្ត្រសំខាន់ក្នុងការអភិវឌ្ឍធនធានមនុស្ស បង្កើនឱកាសការងារ លើកកម្ពស់ប្រាក់ចំណូល និងជួយពង្រឹងសមត្ថភាពកម្លាំងពលកម្មកម្ពុជា ឱ្យឆ្លើយតបនឹងតម្រូវការទីផ្សារការងារកាន់តែមានប្រសិទ្ធភាព៕

សូមទស្សនាវីដេអូទាំងស្រុងដូចខាងក្រោម៖