(ភ្នំពេញ)៖ ឆ្លើយតបនឹងការស្នើសុំរបស់ប្រជាពលរដ្ឋ ! លោកបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន បានប្រកាសថា ក្នុងពិធី «ពន្លកបៃតង» ឆ្នាំ២០២៧ ក្រសួងបរិស្ថាន នឹងត្រៀមកូនទុរេន និងពូជដើមសំរ៉ង់ ចែកជូនពលរដ្ឋយកទៅដាំដោយឥតគិតថ្លៃ។

ក្នុងឱកាសផ្តល់បទសម្ភាសន៍ដល់ក្រុមអ្នកសារព័ត៌មាន ក្រោយបញ្ចប់ពិធីបិទពិព័រណ៍ផ្សព្វផ្សាយ និងចែកកូនឈើ «ពន្លកបៃតង» ដែលរៀបចំដោយក្រសួងបរិស្ថាន រយៈពេល៣ថ្ងៃ ចាប់ពីថ្ងៃទី១០ ដល់ថ្ងៃទី១៣ ខែកក្កដា ឆ្នាំ២០២៦ លោកបណ្ឌិត អ៊ាង សុផល្លែត បានឱ្យដឹងថា៖ «មានបងប្អូនយើងច្រើននិយាយលេង គាត់សុំកូនទុរេន អ៊ឹចឹងទេឆ្នាំក្រោយ មានកូនទុរេន ខ្ញុំធានាថាមានតិចច្រើនមិនទាន់ដឹងទេប៉ុន្តែនឹងមានឱ្យគាត់»។

ជាមួយគ្នានេះដែរ រដ្ឋមន្ត្រីក្រសួងបរិស្ថាន ក៏ប្រកាសបន្ថែមពូជកូនសំរ៉ង់ សម្រាប់ចែកជូនប្រជាពលរដ្ឋយកទៅដាំឱ្យច្រើន ដើម្បីធ្វើយ៉ាងណាបង្កើនចំនួនដើមសំរ៉ង់នេះឱ្យកាន់តែច្រើនឡើង និងធានាថាដើមសំរ៉ង់មិនដាច់ពូជនៅក្នុងព្រៃធម្មជាតិ។

គួរឱ្យដឹងថា ពិព័រណ៍ផ្សព្វផ្សាយ និងចែកកូនឈើ «ពន្លកបៃតង» ដែលបានប្រព្រឹត្តទៅនៅរាជធានីភ្នំពេញ ចាប់ពីថ្ងៃទី១០ ដល់ថ្ងៃទី១៣ ខែកក្កដា ឆ្នាំ២០២៦ ក្រសួងបរិស្ថាន បានចែកកូនឈើចម្រុះបានចំនួន ១,២លានដើម។ ព្រឹត្តិការណ៍នេះគឺជាឆ្នាំទី៣ ហើយដែលក្រសួងបានរៀបចំឡើង ដោយរួមបញ្ចូលទាំងការប្រកាសព្រឹត្តិការណ៍ «ដាំដើមត្នោតមួយលានដើម» នៅមុខទីស្តីការក្រសួងបរិស្ថាន ប្រកបដោយភាពអធិកអធម និងមានអ្នកចូលរួមយ៉ាងច្រើនកុះករ។

លោកបណ្ឌិត អ៊ាង សុផល្លែត បានថ្លែងថា ពិព័រណ៍ «ពន្លកបៃតង» មិនត្រឹមតែជាពិធីចែកកូនឈើប៉ុណ្ណោះទេ ប៉ុន្តែជាការចាប់ផ្តើមរួមគ្នាជាចលនាជាតិមួយ ដែលមានគោលបំណងលើកកម្ពស់ការចូលរួមរបស់ប្រជាពលរដ្ឋគ្រប់រូបក្នុងការការពារ និងស្ដារធនធានធម្មជាតិ។ ឯកឧត្តមបានបញ្ជាក់ថា «ពន្លកបៃតង» គឺជានិមិត្តរូបនៃក្តីសង្ឃឹម ការទទួលខុសត្រូវ និងការចាប់ផ្តើមថ្មី សម្រាប់កម្ពុជាបៃតង ស្អាត និងប្រកបដោយចីរភាព។

លោករដ្ឋមន្ត្រីក៏បានប្រកាសថាក្រសួងបរិស្ថាននឹងបន្តរៀបចំពិព័រណ៍ «ពន្លកបៃតង» លើកទី៤ នៅឆ្នាំករោយទៀត ដើម្បីឱ្យប្រជាពលរដ្ឋខ្មែរទាំងអស់គ្នាអាចចូលរួមបានគ្រប់ៗគ្នា៕