(ភ្នំពេញ)៖ លោក គង់ អាទិត្យ ប្រធានសហភាពការងារកម្ពុជា បានលើកឡើងថា កម្មវិធីវាយតម្លៃ និងទទួលស្គាល់ជំនាញវិជ្ជាជីវៈ បានឆ្លើយតបយ៉ាងចំតម្រូវការរបស់ពលករខ្មែរ ដែលត្រឡប់មកពីប្រទេសថៃ។ ទោះបីជាពួកគាត់មានបទពិសោធន៍ការងារច្រើនក៏ដោយ ប៉ុន្តែភាគច្រើននៅមិនទាន់មានវិញ្ញាបនបត្រ ឬការទទួលស្គាល់ជាផ្លូវការតាមស្តង់ដារជាតិ ដែលជាកត្តាសំខាន់សម្រាប់ការស្វែងរកការងារ និងការបង្កើនប្រាក់ចំណូល។

លោក គង់ អាទិត្យ បានបន្ដថា ការផ្តល់សេវាទទួលស្គាល់ជំនាញនេះ មិនត្រឹមតែជួយបញ្ជាក់ពីសមត្ថភាពរបស់ពលករប៉ុណ្ណោះទេ ប៉ុន្តែថែមទាំងបង្កើនទំនុកចិត្តពី និយោជក និងម្ចាស់គម្រោងផងដែរ។ ក្នុងទីផ្សារការងារ ដែលមានតម្រូវការអ្នកជំនាញកាន់តែខ្ពស់ អ្នកដែលមានការទទួលស្គាល់ជំនាញជាផ្លូវការ នឹងមានឱកាសទទួលបានការងារល្អ ប្រាក់ខែខ្ពស់ និងអាចចរចាតម្លៃការងារបានប្រសើរជាងអ្នកដែលមិនមានវិញ្ញាបនបត្រ។

ប្រធានសហភាពរូបនេះ ក៏បានអំពាវនាវដល់បងប្អូនពលករខ្មែរ ដែលបានវិលត្រឡប់មកពីប្រទេសថៃ ឱ្យមកដាក់ពាក្យចូលរួមវាយតម្លៃ និងទទួលស្គាល់ជំនាញ តាមរយៈក្រសួងការងារ និងគ្រឹះស្ថានបណ្តុះបណ្តាលបច្ចេកទេសនានា ដើម្បីទទួលបានវិញ្ញាបនបត្រស្តង់ដារ បង្កើនឱកាសការងារ ប្រាក់ចំណូល និងលើកកម្ពស់ជីវភាពគ្រួសារ។

ជាមួយគ្នានេះ លោក គង់ អាទិត្យ ក៏បានស្នើឱ្យពង្រឹងការផ្សព្វផ្សាយកម្មវិធីនេះឱ្យបានទូលំទូលាយ និងពង្រីកវិសាលភាពនៃការផ្តល់សេវា ដើម្បីឱ្យពលករ អាចទទួលបានការវាយតម្លៃ និងការទទួលស្គាល់ជំនាញបានឆាប់រហ័ស ស្របតាមតម្រូវការជាក់ស្តែងនៃទីផ្សារការងារ៕

សូមទស្សនាវីដេអូទាំងស្រុងដូចខាងក្រោម៖