(ភ្នំពេញ)៖ ក្រសួងសុខាភិបាល បានចេញសេចក្តីអំពាវនាវដល់ប្រជាពលរដ្ឋទូទាំងប្រទេស ឱ្យបង្កើនការប្រុងប្រយ័ត្នខ្ពស់ និងអនុវត្តតាមវិធានការណែនាំនានា ដើម្បីការពារសុខភាព និងអាយុជីវិត ត្រៀមបង្ការ និងឆ្លើយតបនឹងគ្រោះទឹកជំនន់ ដែលអាចកើតមានឡើងជាយថាហេតុ។

ការអំពាវនាវនេះ ធ្វើឡើងបន្ទាប់ពីក្រសួងធនធានទឹក និងឧតុនិយមបានជូនដំណឹងជាបន្តបន្ទាប់អំពីស្ថានភាពភ្លៀងធ្លាក់ច្រើន ដែលអាចបង្កជាជំនន់ទឹកភ្លៀងរហ័ស និងការហក់ឡើងនៃកម្រិតទឹកស្ទឹង ព្រែក។

ដើម្បីកាត់បន្ថយហានិភ័យ និងផលប៉ះពាល់ពីគ្រោះធម្មជាតិនេះ ក្រសួងសុខាភិបាលបានណែនាំឱ្យប្រជាពលរដ្ឋតាមដានស្ថានភាពទឹកជំនន់ជាប្រចាំ ត្រៀមទីទួលសុវត្ថិភាព បម្រុងទុកស្បៀងអាហារ និងឱសថសង្គ្រោះបន្ទាន់។ ក្នុងអំឡុងពេលមានទឹកជំនន់ ប្រជាពលរដ្ឋត្រូវជៀសវាងចូលទៅក្នុងផ្ទះ ឬអគារទ្រុឌទ្រោម និងមិនត្រូវប៉ះពាល់គ្រឿងប្រើប្រាស់អគ្គិសនី ដោយដៃសើម ឬកំពុងឈរនៅក្នុងទឹកជាដាច់ខាត។

ទន្ទឹមនឹងនេះ ការការពារជំងឺក៏ជាចំណុចសំខាន់ផងដែរ ដោយត្រូវសម្រាន្តក្នុងមុងគ្រប់ពេល ដើម្បីការពារជំងឺគ្រុនឈាម គ្រុនចាញ់ និងគ្រុនឈីក។ ត្រូវងូតទឹកដុះសាប៊ូឱ្យបានស្អាត ដើម្បីបង្ការជំងឺសើស្បែក។ ចំពោះស្ត្រីមានផ្ទៃពោះ ត្រូវតាមដាន និងពិនិត្យផ្ទៃពោះតាមកាលកំណត់ ហើយបើជិតដល់ពេលសម្រាល ត្រូវរកកន្លែងស្នាក់នៅក្បែរមណ្ឌលសុខភាព ឬមន្ទីរពេទ្យដែលនៅជិតបំផុត។

ក្រសួងក៏បានអំពាវនាវឱ្យមានការយកចិត្តទុកដាក់ជួយមនុស្សចាស់ កុមារ និងជនពិការភាព ដោយត្រៀមឈើច្រត់ រទេះរុញ ឬឱសថដែលពួកគាត់កំពុងប្រើប្រាស់ជាប្រចាំ។ លើសពីនេះ ការធ្វើដំណើរតាមទូក ឬកាណូត មិនត្រូវដាក់មនុស្សហួសកម្រិតឡើយ ហើយត្រូវមានភ្លើងបំភ្លឺ និងអាវពោងសុវត្ថិភាពជានិច្ច។ ការប្រុងប្រយ័ត្នចំពោះសត្វអសិរពិសក៏ចាំបាច់ផងដែរ។

ក្រសួងសុខាភិបាលសង្ឃឹមយ៉ាងមុតមាំថា ប្រជាពលរដ្ឋទាំងអស់នឹងចូលរួមអនុវត្តតាមការណែនាំទាំងនេះ ដើម្បីធានាសុវត្ថិភាព និងកាត់បន្ថយផលប៉ះពាល់ជាអតិបរមាពីគ្រោះទឹកជំនន់៕