(ភ្នំពេញ)៖ ក្រសួងរ៉ែ និងថាមពល ក្រសួងសាធារណការ និងដឹកជញ្ជូន អគ្គិសនីកម្ពុជា និងរដ្ឋបាលរាជធានីភ្នំពេញ រដ្ឋបាលខេត្តកណ្តាល រដ្ឋបាលខេត្តកំពង់ឆ្នាំង រដ្ឋបាលខេត្តបាត់ដំបង រដ្ឋបាលខេត្តបន្ទាយមានជ័យ រដ្ឋបាលខេត្តសៀមរាប រដ្ឋបាលខេត្តកំពង់ចាម រដ្ឋបាលខេត្តកំពង់ស្ពឺ រដ្ឋបាលខេត្តតាកែវ រដ្ឋបាលខេត្តព្រះសីហនុ រដ្ឋបាលខេត្តកោះកុង រដ្ឋបាលខេត្តកំពត រដ្ឋបាលខេត្តកែប បានចូលរួមចុះអនុស្សរណៈនៃការយោគយល់គ្នា ស្តីពីកិច្ចសហប្រតិបត្តិការក្នុងការដំឡើងប្រព័ន្ធអំពូលភ្លើងបំភ្លឺផ្លូវប្រើថាមពលពីពន្លឺព្រះអាទិត្យ តាមបណ្តាញផ្លូវជាតិ និងផ្លូវសាធារណៈ និងផ្លូវស្ថិតក្នុងក្រុង ដែលជាទីប្រជុំជន និងជាតំបន់ទេសចរណ៍។

ពិធីចុះអនុស្សចុះអនុស្សរណៈនៃការយោគយល់គ្នានេះបានធ្វើឡើងនៅថ្ងៃទី១៤ ខែកក្កដា ឆ្នាំ២០២៦នេះ ក្រោមវត្តអធិបតីភាពលោក កែវ រតនៈ រដ្ឋមន្ត្រីក្រសួងរ៉ែ និងថាមពល និងលោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន និងមានការចូលរួមពីលោកបណ្ឌិត ប្រាំង ជលសា ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយកអគ្គិសនីកម្ពុជា លោកអភិបាលខេត្តទាំង១៣ និងមានមន្ត្រីជាន់ខ្ពស់ក្រសួងរ៉ែ និងថាមពល ក្រសួងសាធារណការ និងដឹកជញ្ជូន និងអគ្គិសនីកម្ពុជាច្រើនរូបទៀត។

សូមបញ្ជាក់ថា បន្ទាប់ពីទទួលបានការគាំទ្រ និងសាទរពីប្រជាពលរដ្ឋគ្រប់មជ្ឈដ្ឋាន អំពីការសាកល្បងដំឡើងប្រព័ន្ធអំពូលភ្លើងបំភ្លឺផ្លូវប្រើថាមពលពីពន្លឺព្រះអាទិត្យនៅផ្លូវជាតិលេខ៥ ក្នុងខេត្តពោធិ៍សាត់ និងមានសំណូមពរជាច្រើនឱ្យបន្តពង្រីក បន្ថែមលើផ្លូវជាតិលេខ៥នេះទាំងមូល លោករដ្ឋមន្ត្រីក្រសួងរ៉ែ និងថាមពល និងលោករដ្ឋមន្ត្រីក្រសួងសាធារណការ និងដឹកជញ្ជូន បានចង្អុលបង្ហាញឱ្យអគ្គិសនីកម្ពុជា ពិនិត្យលទ្ធភាពពង្រីកការដំឡើងប្រព័ន្ធអំពូលភ្លើងបំភ្លឺផ្លូវប្រើថាមពល ពីពន្លឺព្រះអាទិត្យបន្ថែមនៅតាមផ្លូវជាតិលេខ៥ លេខ៦ តំបន់ទេសចរណ៍នៅភាគខាងត្បូងនៃព្រះរាជាណាចក្រកម្ពុជា ដោយត្រូវប្រើប្រាស់ថវិកាមូលនិធិសង្គមរបស់អគ្គិសនីកម្ពុជា ដែលកំណត់ដោយរាជរដ្ឋាភិបាល និងមានការត្រួតពិនិត្យ ដោយសវនកម្មត្រឹមត្រូវ ។

បន្ទាប់ពីការចុះពិនិត្យនិងសិក្សារួចមក ក្រសួងរ៉ែ និងថាមពល ក្រសួងសាធារណការ និងដឹកជញ្ជូន បានអនុញ្ញាតឱ្យអគ្គិសនីកម្ពុជា ផ្តល់អំណោយប្រព័ន្ធអំពូលភ្លើងបំភ្លឺផ្លូវប្រើថាមពលពីពន្លឺព្រះអាទិត្យ នៅតាមបណ្តាញ ផ្លូវជាតិមួយចំនួនទៀតដែលនៅមិនទាន់បានបំពាក់អំពូលភ្លើងបំភ្លឺ រួមមាន៖ កំណាត់ផ្លូវជាតិលេខ៥ ចន្លោះពីព្រំប្រទល់រាជធានីភ្នំពេញ-ខេត្តកណ្តាល ដល់ព្រំប្រទល់ខេត្តកំពង់ឆ្នាំង-ពោធិ៍សាត់ និងពីព្រំប្រទល់ខេត្តពោធិ៍សាត់-បាត់ដំបង ដល់ខេត្តបន្ទាយមានជ័យ ដោយត្រូវដំឡើងប្រព័ន្ធអំពូល ភ្លើងបំភ្លឺនៅលើមេនីដ្យានទ្រូងផ្លូវ។ កំណាត់ផ្លូវជាតិលេខ៦ ស្ថិតក្នុងភូមិសាស្ត្រខេត្តកំពង់ចាម សៀមរាប និងបន្ទាយមានជ័យ ចាប់ពីស្រុកជើងព្រៃ(ស្គន់) ដល់ព្រំប្រទល់ ខេត្តកំពង់ធំ និងចាប់ពីស្រុកជីក្រែង ដល់ក្រុងសេរីសោភ័ណ ដោយត្រូវដំឡើងប្រព័ន្ធអំពូលភ្លើងបំភ្លឺនៅអមសងខាងផ្លូវ។

កំណាត់ផ្លូវជាតិលេខ៧ ពីស្រុកជើងព្រៃ (ស្គន់) ដល់ទីក្រុងកំពង់ចាម ក្នុងខេត្តកំពង់ចាម ដោយត្រូវដំឡើងប្រព័ន្ធអំពូលភ្លើងបំភ្លឺនៅលើមេនីដ្យានទ្រូងផ្លូវ, ផ្លូវជាតិលេខ២១ ពីក្រុងតាខ្មៅក្នុងខេត្តកណ្តាល ដល់ព្រំដែនប្រទេសវៀតណាម ដោយត្រូវដំឡើងប្រព័ន្ធអំពូល ភ្លើងបំភ្លឺនៅអមសងខាងផ្លូវ, ផ្លូវក្រវាត់ក្រុងទី២ និងផ្លូវក្រវាត់ក្រុងទី៣ នៅក្នុងភូមិសាស្រ្តរាជធានីភ្នំពេញ ដោយត្រូវដំឡើងប្រព័ន្ធអំពូលភ្លើង បំភ្លឺនៅអមសងខាង និងលើមេនីដ្យានទ្រូងផ្លូវ, ផ្លូវស្ថិតក្នុងក្រុង ដែលជាទីប្រជុំជន និងជាតំបន់ទេសចរណ៍ នៅក្នុងភូមិសាស្ត្រ ខេត្តកំពង់ស្ពឺ ខេត្តតាកែវ ខេត្តព្រះសីហនុ ខេត្តកោះកុង ខេត្តកំពត និងខេត្តកែប ។

លើកឡើងនៅក្នុងពិធីចុះអនុស្សចុះអនុស្សរណៈនៃការយោគយល់គ្នានេះ លោកបណ្ឌិត ប្រាំង ជលសា បានបញ្ជាក់ឱ្យដឹងថា ក្នុងការងារដំឡើងប្រព័ន្ធអំពូលភ្លើងបំភ្លឺផ្លូវដោយប្រើថាមពលពីពន្លឺព្រះអាទិត្យ តាមបណ្តាញផ្លូវជាតិ និងផ្លូវសាធារណៈក្នុងរាជធានី-ខេត្ត ទាំង ១៣ខាងលើនេះ អគ្គិសនីកម្ពុជាបានប៉ាន់ស្មានចំណាយប្រមាណ ៥លានដុល្លារអាមេរិក ក្នុងអនុវត្តការងារពង្រីកការដំឡើងប្រព័ន្ធអំពូលភ្លើងបំភ្លឺផ្លូវប្រើថាមពលពីពន្លឺព្រះអាទិត្យនៅតាមកំណាត់ផ្លូវជាតិ បណ្តាញផ្លូវថ្នល់សរុបប្រមាណ ១.០០០គីឡូម៉ែត្រ។

លោកបណ្ឌិត ប្រាំង ជលសា បានបន្ថែមថា សម្រាប់ការរៀបចំដំឡើងប្រព័ន្ធអំពូលភ្លើងបំភ្លឺផ្លូវប្រើថាមពលពីពន្លឺព្រះអាទិត្យនៅតាមកំណាត់ផ្លូវជាតិ បណ្តាញផ្លូវថ្នល់សរុបប្រមាណ ១.០០០គីឡូម៉ែត្រនេះ អគ្គិសនីកម្ពុជានឹងដំឡើងឱ្យបានរួចរាល់ក្នុងរយៈពេលយ៉ាងយូរ ២ឆ្នាំ ហើយបន្ទាប់ពីបញ្ចប់ការសាងសង់រួច ក្រសួងរ៉ែ និងថាមពល និងអគ្គិសនីកម្ពុជា នឹងប្រគល់ជូនក្រសួងសាធារណការ និងដឹកជញ្ជូន រដ្ឋបាលរាជធានី-ខេត្ត បន្តគ្រប់គ្រង និងដំណើរការថែទាំ ដើម្បីឱ្យហេដ្ឋារចនាសម្ព័ន្ធនេះ នៅបន្តបំភ្លឺជូនបងប្អូនប្រជាពលរដ្ឋជានិរន្តរ៍។

នាឱកាសនោះថ្នាក់ដឹកនាំក្រសួងរ៉ែ និងថាមពល ថ្នាក់ដឹកនាំក្រសួងសាធារណការ និងដឹកជញ្ជូន អគ្គិសនីកម្ពុជា និងរដ្ឋបាលរាជធានី-ខេត្តពាក់ព័ន្ធ មានជំនឿចិត្តយ៉ាងមុតមាំថា ការចុះហត្ថលេខាលើអនុស្សរណៈនៃការយោគយល់រួមគ្នានាថ្ងៃនេះ នឹងបានជាប្រយោជន៍ដល់ប្រជាពលរដ្ឋនូវសុខសុវត្ថិភាព លើកស្ទួយសោភ័ណភាព និងសុខុមាលភាពក្នុងការរស់នៅ ជាពិសេសកាត់បន្ថយគ្រោះថ្នាក់ចរាចរណ៍ និងបទល្មើសផ្សេងៗ ក៏ដូចជាជួយជំរុញបង្កើនសកម្មភាពសេដ្ឋកិច្ចពេលយប់ តាមរយៈទេសចរណ៍ជាដើម៕