(ភ្នំពេញ)៖ លោក ហ៊ិន ច័ន្ទតារា ប្រធានមជ្ឈមណ្ឌលវាយតម្លៃសមត្ថភាព នៃ (NPIC) បានលើកឡើងថា វិទ្យាស្ថានជាតិពហុបច្ចេកទេសកម្ពុជា កំពុងរៀបចំការវាយតម្លៃសមត្ថភាពតាមប្រព័ន្ធ RPL (Recognition of Prior Learning) សម្រាប់បងប្អូនពលករខ្មែរដែលត្រឡប់មកពីប្រទេសថៃ ដើម្បីទទួលបានវិញ្ញាបនបត្រជំនាញវិជ្ជាជីវៈកម្រិត ២ ដែលទទួលស្គាល់ដោយក្រសួងការងារ និងបណ្ដុះបណ្ដាលវិជ្ជាជីវៈ។

នាឱកាសនេះដែរ លោក ហ៊ិន ច័ន្ទតារា បានឲ្យដឹងថា RPLគឺជាដំណើរការនៃការវាយតម្លៃស្តង់ដាជាតិស្តង់ដាជាតិ ដែលយើងមានតម្លៃសមត្ថភាពវាស់វែង នូវសមត្ថភាពពិតទាំងចំណេះដឹង ទាំងជំនាញ និងអ្នកដែលសិក្សាពីមុន ដើម្បីទទួលបាននូវវិញ្ញាបនបត្រជំនាញកម្រិតពីរ ផ្លូវការមួយ ចំពោះការធ្វើតេស្ដនេះ គឺធ្វើសម្រាប់បងប្អូនពលករដែលមកពីថៃ ហើយនៅក្នុងនេះគឺមានចំនួន ជំនាញនៅវិទ្យាស្ថានជាតិពហុបច្ចេកទេសកម្ពុជា ជំនាញទីមួយ គឺការងារកំបោ, ការងារការ៉ូ, ការដំឡើងពុម្ព, ការដំឡើងបំពង់ទឹក, ការដំឡើងបណ្ដាញអគ្គិសនីក្នុងអគារ,ការងារដំឡើងសរសៃដែក, ការងាររន្ទា និងការផ្សារអគ្គិសនី។ ជំនាញទាំងនេះ កំពុងមានតម្រូវការខ្ពស់នៅលើទីផ្សារការងារទាំងក្នុងរាជធានីភ្នំពេញ និងតាមបណ្ដាខេត្ត។

លោកបានបន្ដថា អ្វីដែលជាចំណុចពិសេសនោះ គឺបេក្ខជនមិនត្រូវបង់ថ្លៃសេវាវាយតម្លៃឡើយ ដោយរាជរដ្ឋាភិបាលជាអ្នកទទួលបន្ទុកចំណាយទាំងស្រុង។ ការចូលរួមវាយតម្លៃនេះ មិនត្រឹមតែជួយសន្សំពេលវេលា និងកាត់បន្ថយការចំណាយប៉ុណ្ណោះទេ ប៉ុន្តែថែមទាំងផ្តល់ឱកាសទទួលបានវិញ្ញាបនបត្រផ្លូវការ បង្កើនឱកាសការងារ និងបង្កើនប្រាក់ចំណូលផងដែរ។

បន្ថែមពីនេះ ប្រធានមជ្ឈមណ្ឌលវាយតម្លៃសមត្ថភាពរូបនេះ បានបញ្ជាក់ថា ការវាយតម្លៃត្រូវបានអនុវត្តប្រកបដោយសុក្រឹតភាព យុត្តិធម៌ និងតម្លាភាព។ អ្នកវាយតម្លៃសុទ្ធតែជាអ្នកជំនាញ ដែលបានឆ្លងកាត់ការបណ្តុះបណ្តាលពីក្រសួងការងារ និងមានបទពិសោធន៍ជាក់ស្តែងក្នុងវិស័យសំណង់។ ដំណើរការវាយតម្លៃទាំងមូលក៏មានការថតវីដេអូ និងត្រួតពិនិត្យដោយនាយកដ្ឋានស្តង់ដារ ដើម្បីធានាថាលទ្ធផលមានភាពត្រឹមត្រូវ និងអាចទុកចិត្តបាន។

សូមបញ្ជាក់ដែរថា កម្មវិធីនេះ ត្រូវបានចាត់ទុកថាជាឱកាសដ៏មានតម្លៃសម្រាប់ពលករខ្មែរដែលមានបទពិសោធន៍ការងារពីក្រៅប្រទេស ក្នុងការទទួលបានការទទួលស្គាល់សមត្ថភាពជាផ្លូវការ និងពង្រឹងការប្រកួតប្រជែងនៅលើទីផ្សារការងារក្នុងប្រទេស៕