(ក្រចេះ)៖ នៅព្រឹកថ្ងៃទី១៤ ខែកក្កដា ឆ្នាំ២០២៦នេះ ការិយាល័យសុវត្ថិភាពចរាចរណ៍ផ្លូវគោក នៃមន្ទីរសាធារណការ និងដឹកជញ្ជូនខេត្តក្រចេះ បានសហការជាមួយអធិការដ្ឋាននគរបាលស្រុកចិត្របុរី ចុះយុទ្ធនាការអប់រំផ្សព្វផ្សាយ ចែកខិតប័ណ្ណ និងឯកសារពាក់ព័ន្ធនឹងច្បាប់ស្តីពីសុវត្ថិភាពចរាចរណ៍ផ្លូវគោក។

កាចុះអប់រំណែនាំនេះ ធ្វើឡើងនៅតាមបណ្តោយផ្លូវខេត្តលេខ៣៧៧ ស្ថិតក្នុងឃុំថ្មគ្រែ ស្រុកចិត្របុរី ខេត្តក្រចេះ ក្នុងគោលបំណងដាស់តឿនក្រើនរំលឹក និងបង្កើនការយល់ដឹងដល់ប្រជាពលរដ្ឋ អ្នកបើកបរយានយន្តគ្រប់ប្រភេទ ឲ្យចូលរួមគោរពច្បាប់ចរាចរណ៍ទាំងអស់គ្នា ដើម្បីកាត់បន្ថយគ្រោះថ្នាក់ចរាចរណ៍ឲ្យនៅកម្រិតទាបបំផុត។

ក្នុងយុទ្ធនាការចុះអប់រំផ្សព្វផ្សាយផ្ទាល់នេះ ក្រុមការងារចម្រុះបានចែកជូននូវឯកសារច្បាប់ សម្ភារៈជំនួយស្មារតី និងចំណាំងផ្លាតសុវត្ថិភាព សរុបចំនួន៦៥៣សន្លឹក ដល់អ្នកធ្វើដំណើរតាមដងផ្លូវ រួមមាន ច្បាប់ចរាចរណ៍ផ្លូវគោក ចំនួន៤០ក្បាល, សៀវភៅ «អ្វីដែលអ្នកបើកបរត្រូវយល់ដឹង» មានចំនួន ១០០ក្បាល, ខិតប័ណ្ណជំនួយស្មារតីស្តីពីចរាចរណ៍ផ្លូវគោកចំនួន១០០សន្លឹក, ខិតប័ណ្ណ «អ្វីដែលអ្នកបើកបរត្រូវយល់ដឹង» ចំនួន១០០សន្លឹក, ខិតប័ណ្ណសីលធម៌ទាំង១០ សម្រាប់សុវត្ថិភាពចរាចរណ៍ ចំនួន១០០សន្លឹក, សៀវភៅឧបសម្ព័ន្ធសញ្ញាចរាចរណ៍៖ ចំនួន២ក្បាលប្រតិទិន ស្លាកសញ្ញាចរាចរណ៍ចំនួន១ក្បាល, ផ្ទាំងស្លាកសញ្ញាផ្សេងៗ និងបដាផ្សព្វផ្សាយ «ថ្ងៃនេះ ថ្ងៃស្អែក កុំឲ្យមានគ្រោះថ្នាក់ចរាចរណ៍» ចំនួន១០ផ្ទាំង និងចំណាំងផ្លាតសុវត្ថិភាព (សម្រាប់បិទលើចំណានយានយន្ត) ចំនួន២០០សន្លឹក។

ជាមួយគ្នានេះ មន្ត្រីជំនាញក៏បានធ្វើការណែនាំផ្ទាល់មាត់ ដល់អ្នកបើកបរម៉ូតូត្រូវពាក់មួកសុវត្ថិភាពឲ្យបានត្រឹមត្រូវ រីឯអ្នកបើកបររថយន្ត និងរថយន្តដឹកទំនិញត្រូវពិនិត្យលក្ខណៈបច្ចេកទេសយានយន្ត មិនត្រូវផ្ទុកលើសទម្ងន់កំណត់ និងត្រូវបិទស្ទីកគ័រចំណាំងផ្លាតនៅផ្នែកខាងក្រោយ ដើម្បីជួយបង្កើនមើលឃើញច្បាស់នៅពេលយប់ ជៀសវាងការបុករថយន្តពីក្រោយជាយថាហេតុ។ នៅយុទ្ធនាការនេះ ទទួលបានការចូលរួម និងគាំទ្រយ៉ាងខ្លាំងពីសំណាក់ប្រជាពលរដ្ឋក្នុងមូលដ្ឋាន ព្រមទាំងអ្នកធ្វើដំណើរ ដែលនេះស្តែងឲ្យឃើញពីការយកចិត្តទុកដាក់ខ្ពស់របស់អាជ្ញាធរមានសមត្ថកិច្ច ក្នុងការការពារអាយុជីវិត និងទ្រព្យសម្បត្តិរបស់ប្រជាពលរដ្ឋ ក្រោមពាក្យស្លោក «ថ្ងៃនេះ ថ្ងៃស្អែក កុំឲ្យមានគ្រោះថ្នាក់ចរាចរណ៍»៕