(ភ្នំពេញ)៖ លោក សារិន វណ្ណា ប្រធានមន្ទីររៀបចំដែនដីរាជធានីភ្នំពេញ នៅថ្ងៃទី១៤ ខែកក្កដា ឆ្នាំ២០២៦នេះ បានអំពាវនាវដល់បងប្អូនប្រជាពលរដ្ឋខ្មែរ និងបងប្អូនកម្មករ កម្មការី ស្នាក់នៅ និងធ្វើការនៅក្រៅប្រទេស ដែលមិនទាន់មកទទួលយកបណ្ណកម្មសិទ្ធិ ដោយមូលហេតុ មិនជាប់បង់ពន្ធ ឬពន្ធសូន្យក្នុងរង្វង់ញាតិលើកទី១ សូមទាក់ទងផ្ញើបង្កាន់ដៃមកមន្ត្រីសុរិយោដី តាមរយៈ 017 830 840 ដើម្បីចាត់ចែងសម្រួលជូន។

លោកថា អគ្គនាយកដ្ឋានពន្ឋដារ រដ្ឋបាលរាជធានីភ្នំពេញ និងមន្ទីររៀបចំដែនដីរាជធានីភ្នំពេញ កំពុងសិក្សាក្នុងការផ្ញើបណ្ណកម្មសិទ្ធិតាមក្រុមការងារចុះមូលដ្ឋានក្រៅប្រទេស ឬស្ថានទូតខ្មែរ បើកជូនកម្មសិទ្ធិករ ដោយមិនគិតពីនិន្នាការនយោបាយ ឬគណបក្សណាមួយឡើយ។

តាមរយៈបណ្តាញទំនាក់ទំនងសង្គមផ្លូវការ លោក សារិន វណ្ណា បានបញ្ជាក់ដូច្នេះថា៖ «ដើម្បីសំរួលដល់បងប្អូនប្រជាពលរដ្ឋខ្មែរ និងបងប្អូនកម្មករ កម្មការី ស្នាក់នៅ និងធ្វើការនៅក្រៅប្រទេស (ចំណាយប្រាក់ និងប៉ះពាល់ការងារ) អគ្គនាយកដ្ឋានពន្ឋដារ រដ្ឋបាលរាជធានីភ្នំពេញ និងមន្ទីររៀបចំដែនដី រាជធានីភ្នំពេញ បាននិងកំពុងសិក្សារួមគ្នាលើកម្មសិទ្ធិកកស្ទះមួយចំនួន ដែលកម្មសិទ្ធិករមិនទាន់មកទទួលយក ដោយមូលហេតុផ្សេងៗគ្នា ដូចនេះ បណ្ណកម្មសិទ្ធិ មិនជាប់បង់ពន្ធ ឬពន្ធសូន្យក្នុងរង្វង់ញាតិលើកទី១ គួរបានផ្ញើជូនតាមក្រុមការងារចុះមូលដ្ឋានក្រៅប្រទេស ឬស្ថានទូតខ្មែរ បើកជូនកម្មសិទ្ធិករ ដោយមិនគិតពីនិន្នាការនយោបាយ ឬគណបក្សណាមួយឡើយ។ ខ្មែរត្រូវចេះជួយខ្មែរ។ សូមផ្តល់ព័ត័មាន និងបង្កាន់ដៃមន្ត្រីសុរិយោដីប្រគល់ជូនតាមរយៈ Telegram +855 17830840 Mr Seng Rithy»។

សូមជម្រាបថា លោក សារិន វណ្ណា ប្រធានមន្ទីររៀបចំដែនដីរាជធានីភ្នំពេញ បានបង្ហាញនូវការប្តេជ្ញាចិត្តខ្ពស់ ក្នុងការបម្រើសេវាសាធារណៈ ក្នុងវិស័យដីធ្លី ជូនបងប្អូនប្រជាពលរដ្ឋ ប្រកបដោយតម្លាភាព និងលុបបំបាត់អំពើពុករលួយ រួមទាំងភាពអសកម្មនានាផងដែរ។ ការប្តេជ្ញាចិត្តរបស់លោកទទួលបានការគាំទ្រ និងការសរសើរយ៉ាងខ្លាំងពីបងប្អូនប្រជាពលរដ្ឋ៕