(ភ្នំពេញ)៖ ពលករខ្មែរដែលបានវិលត្រឡប់មកពីប្រទេសថៃ បានបង្ហាញការគាំទ្រចំពោះការរៀបចំប្រឡងទទួលស្គាល់សមត្ថភាពជំនាញ (RPL) របស់ក្រសួងការងារ និងបណ្តុះបណ្តាលវិជ្ជាជីវៈ ដោយចាត់ទុកថា វិញ្ញាបនបត្រនេះជួយបង្កើនឱកាសការងារ ប្រាក់ចំណូល និងការទទួលស្គាល់សមត្ថភាពវិជ្ជាជីវៈ។

នាឱកាសនេះដែរ លោក គីម ថេង ជាពលករត្រឡប់មកពីប្រទេសថៃ បានបញ្ជាក់ថា៖ «លោកបានមកប្រឡងយកវិញ្ញាបនបត្រជំនាញផ្នែកសំណង់នៅសាលាកប់ស្រូវ បន្ទាប់ពីធ្វើការនៅប្រទេសថៃ អស់រយៈពេលជិតមួយឆ្នាំ។ លោកបានលើកឡើងថា ការទទួលបានវិញ្ញាបនបត្រនឹងជួយឱ្យមានភាពងាយស្រួល ក្នុងការស្វែងរកការងារ ទទួលបានប្រាក់ឈ្នួលប្រសើរជាងមុន និងអាចបញ្ជាក់ពីសមត្ថភាពជំនាញនៅពេលដាក់ពាក្យចូលបម្រើការងារ»។

លោកបានបន្ថែមថា ការវិលត្រឡប់មកធ្វើការនៅកម្ពុជាមានភាពប្រសើរជាង ដោយសារនៅជិតក្រុមគ្រួសារ មានឱកាសការងារច្រើន ជាពិសេសក្នុងវិស័យសំណង់ និងរោងចក្រ។ លោកក៏បានអំពាវនាវដល់ពលករខ្មែរដែលកំពុងស្នាក់នៅប្រទេសថៃ ឱ្យពិចារណាវិលត្រឡប់មកប្រទេសកម្ពុជា និងចូលរួមប្រឡងយកវិញ្ញាបនបត្រជំនាញ ដើម្បីបង្កើនសមត្ថភាពប្រកួតប្រជែងក្នុងទីផ្សារការងារ។

ដោយឡែក លោក នាង ចំណាន មកពីខេត្តកំពង់ធំ បានឱ្យដឹងថា ការដែលចូលរួមប្រឡង RPL លើជំនាញបណ្តាញអគ្គិសនីក្នុងអគារ ដើម្បីទទួលបានសញ្ញាបត្របញ្ជាក់សមត្ថភាពវិជ្ជាជីវៈ។ លោកបានបន្តថា វិញ្ញាបនបត្រនេះមានសារៈសំខាន់ ព្រោះអាចយកមកប្រើប្រាស់ជាភស្តុតាងក្នុងការវាយតម្លៃសមត្ថភាព និងជួយឱ្យការស្វែងរកការងារកាន់តែងាយស្រួល។

លោកក៏បានលើកឡើងថា ប្រទេសកម្ពុជាបច្ចុប្បន្នមានឱកាសការងារច្រើន ហើយការធ្វើការនៅក្នុងស្រុកមានភាពងាយស្រួលជាង ព្រោះអាចរស់នៅជិតគ្រួសារ។ ជាមួយគ្នានេះ លោកបានអំពាវនាវឱ្យពលករដែលវិលត្រឡប់មកពីប្រទេសថៃ ចូលរួមប្រឡង RPL ដើម្បីទទួលបានវិញ្ញាបនបត្រជំនាញ និងបង្កើនឱកាសទទួលបានការងារល្អ និងប្រាក់ចំណូលសមរម្យ។

លើសពីនេះ ពលករទាំងពីរ ក៏បានថ្លែងអំណរគុណដល់ក្រសួងការងារ ដែលបានរៀបចំការប្រឡងទទួលស្គាល់សមត្ថភាពជំនាញ (RPL) ដើម្បីផ្តល់ឱកាសឱ្យពលករទទួលបានវិញ្ញាបនបត្រជំនាញ និងលើកកម្ពស់គុណភាពកម្លាំងពលកម្មកម្ពុជាឱ្យកាន់តែមានសមត្ថភាពប្រកួតប្រជែងក្នុងទីផ្សារការងារ៕