(ភ្នំពេញ)៖ នៅថ្ងៃទី១៤ ខែកក្កដា ឆ្នាំ២០២៦នេះ លោក ហៃ វណ្ណា ប្រធានសមាគមជនជាតិ​ខ្មែររស់នៅប្រទេសជប៉ុន បានជួបពិភាក្សាការងារជាមួយលោក មាស សុខឆាយ នាយក​សា​ខា​ប្រចាំប្រទេសកម្ពុជា នៃក្រុមហ៊ុនអាកាសចរណ៍ជាតិកម្ពុជា (Air Cambodia) ដើម្បី​ពង្រឹង​កិច្ចសហប្រតិបត្តិការលើវិស័យអាកាសចរណ៍ ទេសចរណ៍ និងការតភ្ជាប់ទំនាក់ទំនង​រវាងកម្ពុជា និងជប៉ុន។

ក្នុងជំនួបនេះ ភាគីទាំងពីរបានផ្លាស់ប្តូរទស្សនៈ និងពិភាក្សាអំពីការជំរុញឱ្យប្រជាពលរដ្ឋខ្មែរ​រស់​នៅប្រទេសជប៉ុន បន្តគាំទ្រការធ្វើដំណើរតាមអាកាសចរណ៍ជាតិកម្ពុជា (Air Cambo​dia) ព្រមទាំងសហការផ្សព្វផ្សាយ និងទាក់ទាញភ្ញៀវទេសចរជប៉ុន​ ឱ្យមកទស្សនាប្រទេស​កម្ពុជាកាន់តែច្រើន សំដៅរួមចំណែកលើកកម្ពស់វិស័យទេសចរណ៍ និងជំរុញកំណើនសេដ្ឋ​កិច្ចជាតិ។

ក្នុងឱកាសនោះ ភាគីទាំងពីរក៏បានចុះហត្ថលេខាលើកិច្ចព្រមព្រៀងសហការជាដៃគូឧបត្ថម្ភ (Official Sponsor Partnership) សម្រាប់កម្មវិធីពិព័រណ៍អាស៊ី – Asian Festival – Angkor Days 2026 in Tokyo ដែលនឹងប្រព្រឹត្តទៅនាពេលខាងមុខ។ កិច្ចសហការនេះ​មានគោលបំណងរួមចំណែកផ្សព្វផ្សាយវប្បធម៌ អរិយធម៌ សក្តានុពលទេសចរណ៍ និងឱកាស​វិនិយោគរបស់កម្ពុជា ទៅកាន់សហគមន៍អន្តរជាតិ។

កិច្ចសហការនេះ គឺជាជំហានដ៏មានសារៈសំខាន់ក្នុងការពង្រឹងទំនាក់ទំនងរវាងវិស័យឯកជន សហគមន៍ខ្មែរនៅក្រៅប្រទេស និងដៃគូអន្តរជាតិ ដើម្បីរួមចំណែកលើកកម្ពស់កិត្តិយសជាតិ និងពង្រីកការផ្សព្វផ្សាយកម្ពុជាលើឆាកអន្តរជាតិ៕