(សៀមរាប)៖ អាជ្ញាធរជាតិអប្សរា សហការជាមួយក្រសួងទេសចរណ៍ រដ្ឋបាលខេត្តសៀមរាប បើកវគ្គវិក្រឹតការពិសេសមគ្គុទ្ទេសក៏ទេសចរណ៍ តំបន់សៀមរាប-អង្គរ ជំនាន់ទី២ រយៈពេល៥ថ្ងៃ ជូនដល់មគ្គុទ្ទេសក៍ទេសចរណ៍ចំនួន៧០នាក់ មកពីសមាគមទេសចរណ៍៖ សមាគមជប៉ុន សមាគមកូរ៉េ សមាគមចិន សមាគមខ្មែរអង្គរ និងមកពីក្រៅសមាគម។

អញ្ជើញចូលរួមជាអធិបតី ក្នុងពិធីបើកវគ្គវិក្រឹតការពិសេសខាងលើ រួមមាន៖ លោកស្រី វណ្ណ សិរីរ័ត្ន អនុរដ្ឋលេខាធិការក្រសួងទេសចរណ៍ លោក ង៉ូវ សេងកាក់ អភិបាលរងខេត្តសៀមរាប លោក ភ័ន ផល្លា ប្រធាននាយកដ្ឋានរដ្ឋបាល និងបុគ្គលិក តំណាងលោក ហង់ ពៅ អគ្គនាយកអាជ្ញាធរជាតិអប្សរា។

វគ្គវិក្រឹតការពិសេសមគ្គុទ្ទេសក៍ទេសចរណ៍ តំបន់សៀមរាប-អង្គរ ជំនាន់ទី២ រៀបចំឡើងរយៈពេល៥ថ្ងៃ ចាប់ពីថ្ងៃទី១៣ រហូតដល់ថ្ងៃទី១៧ ខែកក្កដា ឆ្នាំ២០២៦។

វគ្គវិក្រឹតនេះ មានគោលបំណងអភិវឌ្ឍសមត្ថភាពថ្មីបន្ថែម ក៏ដូចជាផ្តល់ព័ត៌មានគ្រប់ជ្រុងជ្រោយ ដែលទាក់ទងទៅនឹងរបបគំហើញថ្មីៗ នៃការសិក្សាស្រាវជ្រាវ ការអភិវឌ្ឍផលិតផល ទេសចរណ៍ និងសេវាកម្មទេសចរណ៍ ព្រមទាំងនិន្នាការថ្មីៗ នៃវិស័យទេសចរណ៍នាពេលបច្ចុប្បន្ន តាមរយៈគ្រូបង្គោល ដែលជាថ្នាក់ដឹកនាំ និងមន្ត្រីជំនាញនៃអាជ្ញាធរជាតិអប្សរា៕