(ភ្នំពេញ)៖ អគ្គលេខាធិការដ្ឋានព្រឹទ្ធសភាកម្ពុជា បានចេញសេចក្តីជូនដំណឹង ស្តីពីការដាក់ឱ្យដំណើរការគេហទំព័រផ្លូវការ និងការចុះឈ្មោះ ចូលរួមសន្និសីទប្រធានសភា នៃអន្តរសភាលើកទី២ (ISC-2) ក្នុងនាមកម្ពុជាធ្វើជាម្ចាស់ផ្ទះ ដែលនឹងប្រព្រឹត្តទៅចាប់ពីថ្ងៃទី២៦ ដល់ថ្ងៃទី២៨ ខែសីហា ឆ្នាំ២០២៦ ខាងមុខនេះ។

សេចក្តីជូនដំណឹង បានបញ្ជាក់ថា «សភានៃព្រះរាជាណាចក្រកម្ពុជា បានរៀបចំដាក់ឱ្យដំណើរការជាផ្លូវការនូវគេហទំព័រ (Website) របស់សន្និសីទ ដែលមានអាសយដ្ឋាន៖ www.iscpp2.senate.gov.kh ឬតាមរយៈស្កែន QR Code ខាងក្រោម»។

គេហទំព័រផ្លូវការខាងលើ មានគោលបំណងផ្សព្វផ្សាយ ឱ្យបានទូលំទូលាយអំពីព្រឹត្តិការណ៍ ដ៏មានសារៈសំខាន់ និងលេចធ្លោនេះ ជាពិសេសកិច្ចខិតខំប្រឹងប្រែងរបស់សភាកម្ពុជាក្នុងការ រៀបចំសន្និសីទ ក៏ដូចជាការសម្រួលដល់ការចុះឈ្មោះ និងទំនាក់ទំនងរបស់គណៈប្រតិភូចូលរួម និងអ្នកសារព័ត៌មានជាតិ-អន្តរជាតិ ជាមួយគណៈកម្មការរៀបចំសន្និសីទ៕