(ព្រៃវែង)៖ ក្រោមការយកចិត្តទុកដាក់ពីសំណាក់ឧបនាយករដ្ឋមន្ត្រី ស សុខា រដ្ឋមន្ត្រីក្រសួងមហាផ្ទៃ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តព្រៃវែង រួមជាមួយថ្នាក់ដឹកនាំខេត្ត និងក្រសួងពាក់ព័ន្ធជាច្រើនទៀត បានរួមគ្នាដាំកូនឈើរាប់ពាន់ដើមឡើងវិញ នៅតំបន់ប្រើប្រាស់ច្រើនយ៉ាងទួលព័ន្ធតាឡីបឹងស្នេហ៍។ សកម្មភាពនេះមានគោលបំណងសំខាន់ គឺដើម្បីពង្រឹង និងពង្រីកជម្រកធម្មជាតិដ៏សំខាន់សម្រាប់សត្វស្លាប និងជីវៈចម្រុះដទៃទៀត។

តំបន់ប្រើប្រាស់ច្រើនយ៉ាងទួលព័ន្ធតាឡីបឹងស្នេហ៍ ដែលជាផ្ទះដ៏កក់ក្តៅនៃជីវៈចម្រុះ និងជាដង្ហើមសេដ្ឋកិច្ច-ធម្មជាតិដ៏សំខាន់របស់ប្រជាពលរដ្ឋនៅក្នុងខេត្តព្រៃវែង។ ទោះជាយ៉ាងណា សម្រស់ដ៏ស្រស់ត្រកាល និងសន្តិភាពនៃតំបន់អភិរក្សមួយនេះ ពេលខ្លះត្រូវបានរំខានដោយពាក្យចចាមអារ៉ាម និងព័ត៌មានបំភ្លៃពីខាងក្រៅផងដែរ។ ដើម្បីស្វែងរកការពិត និងយល់ដឹងកាន់តែច្បាស់អំពីទឹកដីដ៏មានសក្ដានុពលមួយនេះ ក្រុមការងារអ្នកសារព័ត៍មានប្រចាំខេត្តព្រៃវែង បានចុះទៅជួបសម្ភាសន៍ផ្ទាល់ជាមួយអ្នកថែរក្សាការពារ ក៏ដូចជាប្រជាពលរដ្ឋដែលរស់នៅជុំវិញតំបន់នេះ។

បើតាមលោក នួន សារ៉េត អនុប្រធានសហគមន៍តំបន់ប្រើប្រាស់ច្រើនយ៉ាងទួលព័ន្ធតាឡីបឹងស្នេហ៍ បានរៀបរាប់ដោយស្នាមញញឹមថា សហគមន៍តំបន់ប្រើប្រាស់ច្រើនយ៉ាងទួលពន្ធ័តាឡីបឹងស្នេហ៍ គឺករកើតឡើងក្នុងឆ្នាំ២០០៦ នៅអំឡុងឆ្នាំ២០១៩កន្លងទៅនេះ គឺសហគមន៍បានបង្កើតឡើងវិញដោយមានលោកមេឃុំគឺគាត់បានបង្កើតឱ្យរៀបចំជាសហគមន៍អភិរក្សសត្វទួលពន្ធ័តាឡីបឹងស្នេហ៍ ក្រោយពីបានបង្កើតសហគមន៍រួច សហគមន៍នេះ ក៏បានទទួលភ្ញៀវទេសចរណ៍នៅឆ្នាំ២០២០ ដែលមានភ្ញៀវទេសចរចូលមកលេងទស្សនានៅក្នុងតំបន់នេះរាប់រយរាប់ពាន់នាក់ផងដែរ។ តំបន់នេះមានការការពារសត្វស្លាបការដាំដុះព្រៃលិចទឹក និងរុក្ខជាតិឡើងវិញ ដែលជាបេសកកម្មចំបងរបស់សហគមន៍នៅទីនេះផងដែរ។

លោក នួន សារ៉េត បានបន្តថា ក្រោមយកចិត្តទុកដាក់និងគិតគូរខ្ពស់ ពីឧបនាយករដ្ឋមន្ត្រី ស សុខា រដ្ឋមន្ត្រីក្រសួងមហាផ្ទៃ,ក្រសួងបរិស្ថាន និងថ្នាក់ដឹកនាំខេត្តព្រៃវែង និងមន្ទីរបរិស្ថានខេត្ត លោកអភិបាលស្រុកបាភ្នំ បានរៀបចំតំបន់នេះឱ្យមានភ្ញៀវទេសចរឡើងវិញ គឺមានការអភិវឌ្ឍ ក្នុងនោះបានដាំដុះកូនឈើឡើងវិញ ដោយសារកូនឈើមួយចំនួនបានងាប់ ខណៈសត្វស្លាបនៅតំបន់នេះវាច្រើន ដូច្នេះបានប្រឹងប្រែងរកគ្រប់វិធីដើម្បីទាក់ទាញ ដើម្បីដាំកូនឈើឡើងវិញដើម្បីទុកជម្រកសត្វស្លាបដ៏មានសក្តានុពលនេះផងដែរ៕