(ភ្នំពេញ)៖ លោក ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានអញ្ជើញជាអធិបតីក្នុងពិធីបិទសិក្ខាសាលាស្តីពី «ការចែករំលែកបទពិសោធន៍ក្នុងការរចនាប្លង់លម្អិត និងការត្រួតពិនិត្យគុណភាពការសាងសង់ហេដ្ឋារចនាសម្ព័ន្ធផ្លូវជនបទ» នារសៀលថ្ងៃទី១៤ ខែកក្កដា ឆ្នាំ២០២៦ នៅទីស្ដីការក្រសួងអភិវឌ្ឍន៍ជនបទ។ ដោយមានវត្តមានអញ្ជើញចូលរួមពី ថ្នាក់ដឹកនាំក្រសួង ថ្នាក់ដឹកនាំគម្រោងអភិវឌ្ឍន៍ផ្លូវជនបទ ទីប្រឹក្សាបច្ចេកទេសគម្រោង តំណាងអ្នកទទួលការសាងសង់ ព្រមទាំងមន្រ្តីបច្ចេកទេសផ្លូវជនបទ និងមន្ទីរអភិវឌ្ឍន៍ជនបទជធានី-ខេត្ត សរុបចំនួន ២៥០រូប។

ជាកិច្ចចាប់ផ្ដើម លោក ជ្រាយ ប៉ុម អគ្គនាយកបច្ចេកទេស បានឡើងរាយការណ៍ដោយសង្ខេបអំពីលទ្ធផលនៃសិក្ខាសាលាជូនអង្គពិធី ដោយបានបញ្ជាក់ជូនថា សិក្ខាសាលា ត្រូវបានរៀបចំឡើងរយៈពេល ០១ថ្ងៃ ដោយមានការធ្វើបទបង្ហាញនូវប្រធានបទសំខាន់ៗចំនួន ៣ រួមមាន៖ ទី១.ស្តីពី “បទពិសោធន៍ក្នុងការរចនាប្លង់លម្អិត និងការអនុវត្ត”, ទី២.ស្តីពី “ការពិនិត្យគុណភាពសាងសង់ហេដ្ឋារចនាសម្ព័ន្ធផ្លូវជនបទក្រោមក្របខណ្ឌគម្រោងប្រើប្រាស់ថវិកាគាំទ្រពីដៃគូអភិវឌ្ឍន៍” និងទី៣.ស្តីពី “ការអនុវត្តកិច្ចសន្យា FIDIC” ព្រមទាំងមានការលើកឡើងជាសំនួរ ការពិភាក្សា និងចែករំលែកបទពិសោធន៍ល្អៗទៅលើបទបង្ហាញនីមួយៗប្រកបដោយន័យស្ថាបនាផងដែរ។

បន្ទាប់ពីបានស្ដាប់របាយការណ៍នៃសិក្ខាសាលារួចមក លោក ឆាយ ឫទ្ធិសែន បានថ្លែងអំណរគុណចំពោះ ថ្នាក់ដឹកនាំ មន្រ្តីរាជការ និងអង្គសិក្ខាសាលាទាំងមូលដែលបានលះបង់ពេលវេលាដ៏មានតម្លៃចូលរួមក្នុងសិក្ខាសាលាដ៏មានសារៈសំខាន់នេះរហូតដល់ពិធីបិទបញ្ចប់ ព្រមទាំងបានថ្លែងការកោតសរសើរ និងវាយតម្លៃខ្ពស់ចំពោះក្រុមការងារដែលខិតខំរៀបចំសិក្ខាសាលា ក៏ដូចជាវាគ្មិនដែលបានចំណាយកម្លាំងកាយ-ចិត្ត ចូលរួមធ្វើបទបង្ហាញ ចែករំលែកបទពិសោធន៍ទាក់ទងនឹងការរចនាប្លង់ ការអនុវត្ត និងការត្រួតពិនិត្យគុណភាពការសាងសង់ហេដ្ឋារចនាសម្ព័ន្ធផ្លូវជនបទដើម្បីពង្រឹងគុណភាពនៃការអភិវឌ្ឍហេដ្ឋារចនាសម្ព័ន្ធ និងគមនាគមន៍ជនបទឱ្យកាន់តែមានប្រសិទ្ធភាព និងប្រកបដោយគុណភាព។

លោករដ្ឋមន្ដ្រី បានគូសបញ្ជាក់ថា ផ្អែកតាមចក្ខុវិស័យនៃគោលនយោបាយជាតិស្តីពីការអភិវឌ្ឍជនបទ ដែលកំណត់ថា “កសាងសង្គមជនបទឱ្យមានវិបុលភាពប្រកបដោយបរិយាបន្ន សមធម៌ និងចីរភាព ទាំងផ្នែកសេដ្ឋកិច្ច សង្គម និងវប្បធម៌” ក្រសួងអភិវឌ្ឍន៍ជនបទ នៅតែបន្តយកចិត្តទុកដាក់ និងផ្តល់អាទិភាពខ្ពស់លើការអភិវឌ្ឍហេដ្ឋារចនាសម្ព័ន្ធនិងគមនាគមន៍ផ្លូវជនបទ ប្រកបដោយគុណភាព និងភាពធន់ ដែលជាបុរលក្ខខណ្ឌមិនអាចខ្វះបាន ដើម្បីបង្កើនការតភ្ជាប់និងធានាបាននូវការប្រើប្រាស់ឱ្យបានយូរអង្វែង មានភាពធន់នឹងការប្រែប្រួលអាកាសធាតុ និងជំរុញការធ្វើសមាហរណកម្មវិស័យសេដ្ឋកិច្ច សង្គមកិច្ច និងវប្បធម៌រវាងតំបន់ជនបទនិងទីក្រុង ផ្សារភ្ជាប់សកម្មភាពធុរកិច្ចផ្សេងៗឱ្យមានភាពរស់រវើកបន្ថែមទៀត ដែលនឹងចូលរួមចំណែកលើកកម្ពស់កម្រិតជីវភាពរស់នៅរបស់ប្រជាជននៅតំបន់ជនបទឱ្យកាន់តែប្រសើរឡើង។

ជាមួយគ្នានោះដែរ លោករដ្ឋមន្ដ្រី បានអនុសាសន៍សំខាន់ៗមួយចំនួនជូនដល់អង្គសិក្ខាសាលា ដើម្បីយកទៅអនុវត្តលើការងារសាងសង់ហេដ្ឋារចនាសម្ព័ន្ធផ្លូវជនបទឱ្យមានគុណភាព និងភាពធន់ ក្នុងគោលបំណងបម្រើដល់សេចក្តីត្រូវការរបស់ប្រជាពលរដ្ឋនៅតំបន់ជនបទមានប្រសិទ្ធភាព និងចូលរួមចំណែកអភិវឌ្ឍតំបន់ជនបទឱ្យកាន់តែរីកចម្រើន ដែលជាការចូលរួមសម្រេចឱ្យនូវចក្ខុវិស័យ “កម្ពុជាជាប្រទេសមានប្រាក់ចំណូលខ្ពស់នាឆ្នាំ២០៥០” ក្រោមការដឹកនាំដ៏ឈ្លាសវៃប្រកប ដោយគតិបណ្ឌិតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។

ជាទីបញ្ចប់ លោករដ្ឋមន្ដ្រី បានអញ្ជើញផ្ដល់កិត្តិយសប្រគល់លិខិតថ្លែងអំណរគុណជូនវាគ្មិនកិត្តិយសដែលបានធ្វើបទបង្ហាញជូនអង្គសិក្ខាសាលា ក្រោមបរិយាកាសរីករាយ និងស្និទ្ធស្នាលយ៉ាងក្រៃលែង៕