(ភ្នំពេញ)៖ ក្រុមការងារអធិការកិច្ចនៃអគ្គនាយកដ្ឋានគាំពារបរិស្ថាន ក្រសួងបរិស្ថាន សហការជាមួយមន្ទីរបរិស្ថានរាជធានីភ្នំពេញ និងអាជ្ញាធរមូលដ្ឋាន បានរកឃើញក្រុមហ៊ុន ហ្វាង ស៊ីង ហ្គាម៉ិន ឯ.ក (FANG XING GARMENT CO., LTD.) ដែលមានទីតាំងស្ថិតនៅភូមិឫស្សី សង្កាត់ស្ទឹងមានជ័យ២ ខណ្ឌមានជ័យ រាជធានីភ្នំពេញ បានប្រើប្រាស់កម្ទេចក្រណាត់ដុតក្នុងឡចំហាយ និងពុំមានបំពាក់ប្រព័ន្ធចម្រោះសម្រាប់សម្អាតផ្សែង។

ការរកឃើញនេះធ្វើឡើងនៅថ្ងៃទី១៣ ខែកក្កដា ឆ្នាំ២០២៦។ តាមការត្រួតពិនិត្យបឋម គុណភាពខ្យល់ចេញពីបំពង់ផ្សែងឡចំហាយរបស់ក្រុមហ៊ុន ត្រូវបានរកឃើញថាមានកម្រិតលើសពីស្តង់ដារកំណត់។ លើសពីនេះ ក្រុមហ៊ុនក៏ពុំមានកិច្ចសន្យាការពារបរិស្ថាន និងលិខិតអនុញ្ញាតបញ្ចេញសំណល់ពាក់ព័ន្ធនោះទេ។

ជាវិធានការ ក្រសួងបរិស្ថានបានតម្រូវឱ្យក្រុមហ៊ុនបញ្ឈប់ជាបន្ទាន់នូវការដុតកម្ទេចក្រណាត់ក្នុងឡចំហាយ ព្រមទាំងបំពាក់ប្រព័ន្ធសម្អាតផ្សែងឱ្យបានត្រឹមត្រូវ និងបញ្ចេញផ្សែងអនុលោមតាមស្តង់ដារកំណត់ស្តីពីការគ្រប់គ្រងគុណភាពខ្យល់។ ជាមួយគ្នានេះ ក្រុមហ៊ុនត្រូវរៀបចំកិច្ចសន្យាការពារបរិស្ថានដាក់ជូនក្រសួងពិនិត្យ និងស្នើសុំលិខិតអនុញ្ញាតបញ្ចេញសំណល់ពាក់ព័ន្ធ។

ក្រសួងក៏បានចាត់វិធានការពិន័យអន្តរការណ៍ចំពោះក្រុមហ៊ុន ដោយយោងតាមក្រមបរិស្ថាននិងធនធានធម្មជាតិ មាត្រា១៦១ មាត្រា១៧៣ និងមាត្រា៦៦៨ រួមទាំងអនុក្រឹត្យលេខ៤២ ស្តីពីការត្រួតពិនិត្យការបំពុលខ្យល់។ ក្រុមហ៊ុនក៏ត្រូវផ្ដល់សំណងផលប៉ះពាល់សុខភាពសាធារណៈ និងការខូចខាតបរិស្ថានតាមការវាយតម្លៃជាក់ស្តែងពីមន្ត្រីជំនាញផងដែរ។ ការអនុវត្តច្បាប់នេះ គឺដើម្បីធានាបាននូវបរិស្ថានស្អាត និងសុខភាពសាធារណៈល្អប្រសើរ៕