(ត្បូងឃ្មុំ)៖ ក្រោមការដឹកនាំបញ្ជាផ្ទាល់ពីលោក ប៉ែន កុសល្យ អភិបាលខេត្តត្បូងឃ្មុំ និងជាប្រធានគណៈបញ្ជាការឯកភាពរដ្ឋបាលខេត្ត ដោយមានការសម្របសម្រួល ពីតំណាងអយ្យការ អមសាលាដំបូងខេត្ត កម្លាំងជំនាញបានបន្តចុះធ្វើរដ្ឋបាលចំហរ ត្រួតពិនិត្យតាមផ្ទះវីឡា ផ្ទះសំណាក់ និងបន្ទប់ជួល នៅភូមិត្រពាំងផ្លុងទី១ ឃុំត្រពាំងផ្លុង ស្រុកពញាក្រែក។

ប្រតិបត្តិការនេះ បានធ្វើឡើងកាលពីថ្ងៃទី១៣ ខែកក្កដា ឆ្នាំ២០២៦ ដែលជាផ្នែកមួយ នៃការអនុវត្តច្បាប់ជាបន្តបន្ទាប់។ ក្នុងប្រតិបត្តិការ ចុះត្រួតពិនិត្យចំនួន៤ទីតាំង ដែលមានបន្ទប់សរុប ៦៩បន្ទប់ កម្លាំងចម្រុះបានរកឃើញជនបរទេសចំនួន ២៤នាក់ ក្នុងនោះ មានស្រី២នាក់ រួមទាំងសម្ភារពាក់ព័ន្ធមួយចំនួនផងដែរ។

កម្លាំងជំនាញនៃស្នងការដ្ឋាននគរបាលខេត្តត្បូងឃ្មុំ បានសហការយ៉ាងជិតស្និទ្ធ ជាមួយកម្លាំងនាយកដ្ឋាននគរបាលព្រហ្មទណ្ឌ (ប្រចាំការខេត្តត្បូងឃ្មុំ) កម្លាំងជំនាញកងរាជអាវុធហត្ថខេត្តត្បូងឃ្មុំ និងអាជ្ញាធរមូលដ្ឋាន ភូមិ ឃុំ ស្រុក ដើម្បីធានាបាននូវប្រសិទ្ធភាព និងភាពរលូននៃបេសកកម្មនេះ។

ជាលទ្ធផល ជនបរទេសទាំងអស់ ដែលត្រូវបានរកឃើញ ត្រូវបានបញ្ជូនទៅកាន់ស្នងការដ្ឋាននគរបាលខេត្តត្បូងឃ្មុំ ដើម្បីបន្តនីតិវិធីតាមផ្លូវច្បាប់។

បច្ចុប្បន្ន គណៈបញ្ជាការឯកភាពរដ្ឋបាលខេត្ត កំពុងបន្តចុះស្រាវជ្រាវ ត្រួតពិនិត្យ និងស្វែងរកទីតាំងដែលសង្ស័យថាមានការលួចលាក់ប្រព្រឹត្តបទល្មើស និងការរស់នៅប្រមូលផ្តុំខុសច្បាប់ នៅក្នុងក្រុង-ស្រុកទាំង ៧ ក្នុងភូមិសាស្ត្រខេត្ត។

ទន្ទឹមនឹងនេះ ការផ្សព្វផ្សាយអនុក្រឹត្យលេខ ០៣ របស់រាជរដ្ឋាភិបាល ក៏នៅតែបន្តធ្វើឡើងជាប្រចាំ ដើម្បីពង្រឹងការអនុវត្តច្បាប់ និងសន្តិសុខសណ្តាប់ធ្នាប់សាធារណៈក្នុងខេត្ត៕