(តាកែវ)៖ ប្រជាពលរដ្ឋជាង ៣០០នាក់ ដែលរស់នៅក្នុងស្រុកអង្គបូរី និងស្រុកព្រៃកប្បាស ខេត្តតាកែវ បាននាំគ្នាឡើងមកកាន់សាលាខេត្តតាកែវ នៅព្រឹកថ្ងៃពុធ ទី១៥ ខែកកក្កដា ឆ្នាំ២០២៦ ដើម្បីស្នើសុំអន្តរាគមន៍ ពីអភិបាលខេត្តតាកែវ ក្នុងការចេញប័ណ្ណកម្មសិទ្ធិលើដីអាស្រ័យផលរបស់ពួកគាត់ ដែលបានកាន់កាប់អស់រយៈពេលជាច្រើនឆ្នាំមកហើយ។

យោងតាមការលើកឡើងរបស់ប្រជាពលរដ្ឋ ដីអាស្រ័យផលរបស់ពួកគាត់ស្ថិតនៅក្នុងដែនសហគមន៍នេសាទបាស្រែ ដែលពួកគាត់បានគ្រប់គ្រងជាយូរមកហើយ។ ពួកគាត់បានដាក់ពាក្យស្នើសុំចុះបញ្ជីក្បាលដី និងធ្វើប័ណ្ណកម្មសិទ្ធិពីអាជ្ញាធរខេត្តតាកែវ តាំងពីខែមីនា ឆ្នាំ២០២៦ ប៉ុន្តែរហូតមកដល់ពេលនេះ ពួកគាត់មិនទាន់ទទួលបានដំណឹងអ្វីនៅឡើយទេ។ ហេតុដូច្នេះហើយ ទើបពួកគាត់សម្រេចចិត្តឡើងមកកាន់សាលាខេត្ត ដើម្បីស្វែងរកដំណោះស្រាយ។

លោក នួន សុធា ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្តតាកែវ បានបញ្ជាក់ថា ពាក់ព័ន្ធនឹងដីសហគមន៍នេសាទបាស្រែមួយផ្នែកក្នុងឃុំបាស្រែ ស្រុកអង្គរបុរី ដែលប្រជាពលរដ្ឋបានស្នើសុំចុះបញ្ជី និងធ្វើប័ណ្ណកម្មសិទ្ធិនេះ រដ្ឋបាលខេត្តតាកែវបានណែនាំដល់រដ្ឋបាលស្រុកអង្គបូរី ឲ្យចុះធ្វើអត្តសញ្ញាណកម្ម និងធ្វើរបាយការណ៍មកកាន់រដ្ឋបាលខេត្ត ដើម្បីបន្តនីតិវិធីស្នើសុំ ស.ជ.ណ ពីរាជរដ្ឋាភិបាល។

លោក ប៊ុន សម្បត្តិ នាយកទីចាត់ការអន្តរវិស័យរបស់រដ្ឋបាលខេត្តតាកែវ ដែលបានចេញមកជួបប្រជាពលរដ្ឋ បានថ្លែងថា រដ្ឋបាលខេត្តមិនបានព្រងើយកន្តើយចំពោះករណីនេះឡើយ ជាពិសេសលោកអភិបាលខេត្តតាកែវ បានយកចិត្តទុកដាក់ខ្ពស់ និងបានលើកឡើងនៅក្នុងកិច្ចប្រជុំកាលពីពេលថ្មីៗនេះ ដោយបានបញ្ជូនសំណើរបស់ប្រជាពលរដ្ឋទៅរាជរដ្ឋាភិបាលដើម្បីចេញ ស.ជ.ណ។

លោកបានបន្ថែមថា ការងារនេះអាចនឹងចាប់ផ្ដើមចុះវាស់វែង និងចេញប័ណ្ណកម្មសិទ្ធិជូនប្រជាពលរដ្ឋនៅដើមឆ្នាំ២០២៧ ខាងមុខ។ ការប្តេជ្ញាចិត្តនេះបង្ហាញពីការយកចិត្តទុកដាក់របស់អាជ្ញាធរខេត្ត ក្នុងការដោះស្រាយបញ្ហាប្រឈមរបស់ប្រជាពលរដ្ឋ ដើម្បីធានាបាននូវសិទ្ធិស្របច្បាប់លើដីធ្លីរបស់ពួកគាត់៕