(បន្ទាយមានជ័យ)៖ នៅថ្ងៃទី១៥ ខែកក្កដា ឆ្នាំ២០២៦ លោក ប្រាក់ ប៉ូលី អភិបាលរងខេត្តបន្ទាយមានជ័យ បានដឹកនាំក្រុមការងារចម្រុះខេត្ត ក្រោមការសម្របសម្រួលនីតិវិធីដោយលោក សំរិទ្ធ សុខុន ព្រះរាជអាជ្ញារង នៃអយ្យការអមសាលាដំបូងខេត្ត ចុះត្រួតពិនិត្យទីតាំងចំនួន៤ ក្នុងភូមិសាស្ត្រក្រុងប៉ោយប៉ែ​ត រកឃើញជនបរទេសសរុបចំនួន៦៣នាក់។

ក្នុងចំណោមជនបរទេសទាំង៦៣នាក់នេះ ក្នុងនោះ ស្រីចំនួន៣៤នាក់ មាន២សញ្ជាតិ ជនជាតិថៃមានចំនួន៦០នាក់(ស្រី៣៣នាក់) និងជនជាតិចំនួនចិន៣ នាក់(ស្រី១)។

ប្រតិបត្តិការនេះធ្វើឡើងក្រោមការបញ្ជាផ្ទាល់ពីលោក អ៊ុំ រាត្រី ប្រធានគណៈបញ្ជាការឯកភាពខេត្តបន្ទាយមានជ័យ និងក្រោមការសម្របសម្រួលរបស់លោក កើត វណ្ណារ៉េត ព្រះរាជអាជ្ញាអមសាលាដំបូងខេត្តបន្ទាយមានជ័យ។

យោងតាមរបាយការណ៍របស់អាជ្ញាធរខេត្តបន្ទាយមានជ័យ បានបញ្ជាក់ថា សម្រាប់ទីតាំងដែលបានចុះពិនិត្យទាំង៤ ក្នុងនោះបានបិទសៀល១ទីតាំងពាក់ព័ន្ធបទល្មើសOnline Scams ។ ទីតាំងទាំងនេះ មានដូចខាងក្រោម៖
* ទីតាំងទី១៖ នៅអគារកម្ពស់៨ជាន់ នៅជាន់ផ្ទាល់ដី មាន៣២បន្ទប់ ជាបន្ទប់ស្នាក់នៅ នៅភូមិក្បាលស្ពាន១ សង្កាត់អូរជ្រៅ ដែលមានម្ចាស់ឈ្មោះ គង់ ថាវរ: រកឃើញជនជាតិថៃស្នាក់នៅប្រមូលផ្ដុំចំនួន៣៣នាក់ (ស្រី១៩នាក់) បច្ចុប្បន្នបម្រើការងារនៅកាស៊ីណូហូលីដេ។ ទីតាំងពុំមានសម្ភារ:សង្ស័យ អប់រំ។

+ទីតាំងទី២៖ ផ្ទះ១ល្វែង មាន២បន្ទប់ ជាបន្ទប់ស្នាក់នៅ នៅភូមិគីឡូម៉ែត្រលេខ៤ សង្កាត់ផ្សារកណ្ដាល មានជនជាតិចិនចំនួន៣នាក់ស្រី១នាក់ ។ទីតាំងពុំមានសម្ភារ:សង្ស័យ អប់រំ។

+ទីតាំងទី៣៖ ផ្ទះ២ល្វែង កម្ពស់៣ជាន់ មាន១៥បន្ទប់ នៅភូមិទួលប្រាសាទ សង្កាត់ប៉ោយប៉ែត មានជនជាតិថៃចំនួន៧នាក់ស្រី៣នាក់ បញ្ជូនទៅសាកសួរនៅអធិការដ្ឋាននគរបាលក្រុង ពាក់ព័ន្ធករណីប្រព្រឹត្តបទល្មើសល្បែងស៊ីសងខុសច្បាប់។

+ទីតាំងទី៤ ៖ផ្ទះ២ល្វែង ២ជាន់ផ្ទាល់ដី រកឃើញជនជាតិថៃ២០នាក់(ស្រី១១នាក់) រកឃើញមានសម្ភារ:សង្ស័យពាក់ព័ន្ធបទល្មើសឆបោកតាមប្រព័ន្ធបច្ចេកវិទ្យា(Online Scams)មួយចំនួន រួមមាន កុំព្យូទ័រAll-in-one ១៨គ្រឿង, ទូរសព្ទ២៣គ្រឿង, អាយផេត១២, ទូរខលសេនធឺ, អាវប៉ូលីសថៃ២ ខោ១,ខ្នោះ១, ស៊ីមកាត និងឯកសារមួយចំនួន។លទ្ធផលកោសល្យវិច្ច័យជាក់ស្ដែង រកឃើញថាជាករណីឆបោកតាមប្រព័ន្ធបច្ចេកវិទ្យា ក្រោមរូបភាព បន្លំខ្លួនជាស្ថាប័នមានសមត្ថកិច្ច និងលួងលោមស្នេហា មានទិសដៅឆបោកទៅប្រទេសថៃ។

សមត្ថកិច្ចបានបញ្ជូនជនបរទេស ទៅមណ្ឌលកងវ៉ាខេត្ត ដកហូតវត្ថុតាងរក្សាទុកនៅស្នងការខេត្ត និងបិទទីតាំងជាបណ្ដោះអាសន្ន៕