មេបញ្ជាការកងរាជអាវុធហត្ថខេត្តកំពង់ស្ពឺ ដឹកនាំកិច្ចប្រជុំត្រួតពិនិត្យ និងផ្សព្វផ្សាយត្រៀមលក្ខណៈ ក្នុងការស្វែងទីទួលសុវត្ថិភាព ដើម្បីជួយសង្គ្រោះប្រជាពលរដ្ឋនារដូវវស្សា
17-07-2026 11:51
(កំពង់ស្ពឺ)៖ ដោយអនុវត្តតាមការចង្អុលបង្ហាញតម្រង់ទិសរបស់ នាយឧត្តមសេនីយ៍ សៅ សុខា អគ្គមេបញ្ជាការរង កងយោធពលខេមរភូមិន្ទ និងជាមេបញ្ជាការ កងរាជអាវុធហត្ថលើផ្ទៃប្រទេស ព្រមទាំងមានការណែនាំដោយផ្ទាល់ពីសំណាក់ លោកបណ្ឌិត ជាម ច័ន្ទសោភ័ណ អភិបាលខេត្តកំពង់ស្ពឺ ក្រោមការដឹកនាំប្រកបដោយភាពមុឺងម៉ាត់ និងការយកចិត្តទុកដាក់ខ្ពស់បំផុតរបស់លោកឧត្តមសេនីយ៍ត្រី ម៉េង ស្រ៊ុន មេបញ្ជាការ កងរាជអាវុធហត្ថខេត្តកំពង់ស្ពឺ នាព្រឹកថ្ងៃទី១៦ ខែកក្កដា ឆ្នាំ២០២៦ បានអញ្ជើញជាអធិបតីភាពដឹកនាំកម្លាំងជំនាញកងរាជអាវុធហត្ថខេត្តកំពង់ស្ពឺ បើកកិច្ចប្រជុំបន្ទាន់ក្នុងការត្រៀមលក្ខណៈទាំងកម្លាំង មធ្យោបាយ ឧបករណ៍ និងសម្ភារៈផ្សេងៗទៀតដែលមាន ដើម្បីត្រៀមលក្ខណៈចុះជួយសង្គ្រោះប្រជាពលរដ្ឋឲ្យទាន់ពេលវេលា ដែលអាចកើតមានឡើងជាយថាហេតុក្នុងរដូវវស្សា ក្នុងឆ្នាំ២០២៦នេះផងដែរ។
កិច្ចប្រជុំនេះផ្ដោតលើការត្រៀមកម្លាំង មធ្យោបាយ ការស្វែងរកទីទួលសុវត្ថិភាព និងការចែករំលែកស្បៀងអាហារ ដើម្បីកាត់បន្ថយការខូចខាត និងអាយុជីវិត។ ដោយបានរៀបចំធ្វើឡើងនៅទីបញ្ជាការកងរាជអាវុធហត្ថខេត្តកំពង់ស្ពឺ ពិសេសដោយមានការចង្អុលបង្ហាញរបស់នាយឧត្តមសេនីយ៍ សៅ សុខា អគ្គមេបញ្ជាការរង កងយោធពលខេមរភូមិន្ទ និងជាមេបញ្ជាការ កងរាជអាវុធហត្ថលើផ្ទៃប្រទេស និងមានការណែនាំដោយផ្ទាល់ពីសំណាក់លោកបណ្ឌិត ជាម ច័ន្ទសោភ័ណ អភិបាលខេត្តកំពង់ស្ពឺ ក្នុងការត្រៀមលក្ខណៈដើម្បីត្រៀមកម្លាំងជួយសង្រ្គោះគ្រោះមហន្តនារដូវវស្សាឆ្នាំ២០២៦នេះ។
ថ្លែងនៅក្នុងកិច្ចប្រជុំ លោកឧត្តមសេនីយ៍ត្រី ម៉េង ស្រ៊ុន មេបញ្ជាការ បានដាក់បទបញ្ជាឲ្យកម្លាំងកងរាជអាវុធហត្ថតាមបណ្តា-ក្រុងស្រុកទាំងអស់ ត្រូវត្រៀមមធ្យោបាយ ឧបករណ៍ និងសម្ភារៈផ្សេងៗទៀតដែលមាន ដើម្បីត្រៀមលក្ខណៈចុះជួយសង្គ្រោះប្រជាពលរដ្ឋឲ្យទាន់ពេលវេលាជាចាំបាច់បំផុតតាមដែលអាចធ្វើទៅបាន ព្រោះថាគ្រោះមហន្តរាយ គឺជាការបំផ្លិចបំផ្លាញធ្ងន់ធ្ងរដល់ជីវិត ទ្រព្យសម្បត្តិ និងបរិស្ថាន។
លោកឧត្តមសេនីយ៍ត្រី ម៉េង ស្រ៊ុនការ បានបន្តទៀតថា ការត្រៀមបង្ការ និងទប់ស្កាត់គ្រោះមហន្តរាយ គឺជាការងារអាទិភាពខ្ពស់ដែលទាមទារការយកចិត្តទុកដាក់លះបង់ និងការទទួលខុសត្រូវធ្ងន់ធ្ងរ ហើយក្រុមការងារអាវុធហត្ថតែងតែពលីកម្លាំងកាយចិត្តទាំងថ្ងៃទាំងយប់ ដោយត្រូវរៀបចំផែនការទប់ទល់ និងត្រៀមមធ្យោបាយសង្គ្រោះបន្ទាន់ ដើម្បីការពារអាយុជីវិត និងទ្រព្យសម្បត្តិថែមទៀតផងដែរជាពិសេស។
លោកឧត្តមសេនីយ៍ត្រី ម៉េង ស្រ៊ុន បានបញ្ជាក់ថា ប្រសិនបើជាប្រជាពលរដ្ឋនៅក្នុងភូមិសាស្ត្រខេត្តកំពង់ស្ពឺ បានជួបហេតុការណ៍ ឬឧបទ្ទវហេតុផ្សេងៗហើយត្រូវការជំនួយអន្តរាគមន៍សង្គ្រោះពីកម្លាំងកងរាជអាវុធហត្ថខេត្តកំពង់ស្ពឺ សូមបងប្អូនទំនាក់ទំនងមកលេខទូរស័ព្ទអន្តរាគមន៍សង្គ្រោះបន្ទាន់ HotLine 1292 ដោយមិនចំណាយលុយនៅក្នុងការខលឡើយ24/24ម៉ោង ឬអាចទំនាក់ទំនងតាមបណ្តាញ CoolApp, Telegram, WhatsApp និងតាមរយៈលេខទូរស័ព្ទ 010 61 68 68៕
