សម្តេចមហាបវរធិបតី ហ៊ុន ម៉ាណែត៖ កម្ពុជាផ្តល់តម្លៃខ្ពស់ចំពោះការចូលរួមដោយស្ថាបនារបស់ចិន ក្នុងការជំរុញកិច្ចសន្ទនា និងកិច្ចសហប្រតិបត្តិការ អន្តរជាតិលើអភិបាលកិច្ច AI (Video inside)
17-07-2026 15:06
(សៀងហៃ, ចិន)៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានថ្លែងថា កម្ពុជា ផ្តល់តម្លៃខ្ពស់ចំពោះការចូលរួមដោយស្ថាបនារបស់ចិនក្នុងការជំរុញកិច្ចសន្ទនា និងកិច្ចសហប្រតិបត្តិការអន្តរជាតិលើអភិបាលកិច្ចបញ្ញាសិប្បនិម្មិត (AI)។
នៅព្រឹកថ្ងៃសុក្រ ទី១៧ ខែកក្កដា ឆ្នាំ២០២៦ សន្និសីទពិភពលោកស្តីពីបញ្ញាសិប្បនិម្មិត (AI) ត្រូវបានបើកជាផ្លូវការនៅទីក្រុងសៀងហៃ ប្រទេសចិន។ ពិធីបើកសន្និសីទនេះ ធ្វើឡើងក្រោមអធិបតីភាពលោក ស៊ី ជីនពីង ប្រធានាធិបតីចិន។ សន្និសីទបញ្ញាសិប្បនិម្មិតពិភពលោកឆ្នាំ២០២៦ ត្រូវបានធ្វើឡើងក្រោមមូលបទ «ភាពជាដៃគូក្នុងក្របខ័ណ្ឌបញ្ញាសិប្បនិម្មិត ដើម្បីអនាគតកាន់តែត្រចះត្រចង់»។ ក្នុងពិធីបើកសន្និសីទពិភពលោកនេះ មានការអញ្ជើញចូលរួមថ្នាក់ដឹកនាំប្រទេសនានា និងអង្គការអន្តរជាតិ ព្រមទាំងអ្នកកំណត់គោលនយោបាយជាច្រើនរូប។
ក្នុងសុន្ទរកថាគន្លឹះបើកសន្និសីទពិភពលោកនេះ សម្តេចមហាបវរធិបតី ហ៊ុន ម៉ាណែត បានវាយតម្លៃខ្ពស់ ចំពោះរដ្ឋាភិបាលចិន ដែលបានបានរៀបចំសន្និសីទដ៏មានសារៈសំខាន់នេះឡើង។ សម្តេចមហាបវរធិបតី បានគូសរំលេចថា បច្ចេកវិទ្យាបញ្ញាសិប្បនិម្មិត (AI) កំពុងធ្វើបរិវត្តកម្មយ៉ាងខ្លាំងក្លាទៅលើសេដ្ឋកិច្ច, សេវាសាធារណៈ, សន្ដិសុខ និងភាពប្រកួតប្រជែងក្នុងល្បឿនមួយដែលមិនធ្លាប់មានពីមុនមក។ ក្នុងបរិការណ៍នេះ បញ្ហាប្រឈមនៅចំពោះមុខលែងជាសំណួរថា តើ AI នឹងផ្លាស់ប្ដូរអនាគតឬទេ ប៉ុន្តែជាសំណួរថា តើត្រូវធ្វើយ៉ាងណា ដើម្បីធានាថា ប្រទេសនីមួយៗ អាចទទួលបានអត្ថប្រយោជន៍ពីបច្ចេកវិទ្យានេះដោយសមធម៌, ប្រកបដោយការទទួលខុសត្រូវ និងមានចីរភាព។
សម្តេចមហាបវរធិបតី បានគូសរំលេចថា កម្ពុជាផុ្តល់តម្លៃខ្ពស់ចំពោះការចូលរួមដោយស្ថាបនារបស់ចិន នៅក្នុងការជំរុញកិច្ចសន្ទនា និងកិច្ចសហប្រតិបត្តិការអន្តរជាតិលើអភិបាលកិច្ច AI តាមរយៈគំនិតផ្ដួចផ្ដើម ដូចជាគំនិតផ្ដួចផ្ដើមអភិបាលកិច្ច AI សកល និងផែនការសកម្មភាពអភិបាលកិច្ច AI សកលជាដើម។ គំនិតផ្ដួចផ្ដើមទាំងនេះ រួមចំណែកដល់ការពង្រឹងកិច្ចសហប្រតិបត្តិការពហុភាគីអន្តរជាតិ និងការកសាងសមត្ថភាព AI, ជាពិសេសសម្រាប់បណ្ដាប្រទេសកំពុងអភិវឌ្ឍ និងប្រទេសលោកខាងត្បូង។
សម្តេចមហាបវរធិបតីនាយករដ្ឋមន្ត្រី បានលើកឡើងដែរថា សន្និសីទពិភពលោកស្ដីពីបញ្ញាសិប្បនិម្មិត បានក្លាយជាវេទិកាដ៏មានសារៈសំខាន់ក្នុងការបង្កើនការចូលរួមក្នុងអភិបាលកិច្ច AI សកល និងបំប្លែងការប្ដេជ្ញាចិត្តរួមគ្នារបស់បណ្ដាប្រទេសលើកិច្ចសហប្រតិបតិ្តការអន្តរជាតិ ឱ្យទៅជាកិច្ចសន្ទនា និង ភាពជាដៃគូជាក់ស្ដែង។
«កម្ពុជាមានជំនឿយ៉ាងមុតមាំថា ក្របខ័ណ្ឌពហុភាគី ដែលបើកចំហ, បរិយាបន្ន និងប្រកបដោយកិច្ចសហប្រតិបត្តិការ គឺពិតជាចាំបាច់ ដើម្បីធានាថា ប្រទេសទាំងអស់, ទោះមានកម្រិតនៃការអភិវឌ្ឍយ៉ាងណាក៏ដោយ, អាចចូលរួម និងទទួលបានអត្ថប្រយោជន៍ពីបដិវត្តន៍ AI។ អភិបាលកិច្ច AI ពិតប្រាកដគួរតែជួយពង្រឹងបន្ថែមទៀតនូវកិច្ចសហប្រតិបត្តិការអន្តរជាតិ ដោយនៅតែគោរពទៅលើពិពិធភាពនៃបរិបទជាតិ និង មាគ៌ាអភិវឌ្ឍន៍មូលដ្ឋានដោយឯករាជ្យរបស់ប្រទេសនីមួយៗ»។ នេះជាការគូសរំលេចរបស់សម្តេចមហាបវរធិបតី ហ៊ុន ម៉ាណែត។
សម្តេចមហាបវរធិបតី បានលើកឡើងដែរថា អត្ថប្រយោជន៍ពិតប្រាកដនៃយុគសម័យ AI មិនអាចសម្រេចបានពេញលេញ ដោយការធ្វើសកម្មភាពតែឯកឯងនោះទេ។ លក្ខណៈឆ្លងដែននៃកាលានុវត្តភាព និងបញ្ហាប្រឈមទាំងនេះ ទាមទារឱ្យមានកិច្ចសហប្រតិបត្តិការអន្តរជាតិដែលកាន់តែរឹងមាំ និង មានប្រសិទ្ធភាពបន្ថែមទៀត ដោយត្រូវឈរលើមូលដ្ឋាននៃការគោរពគ្នាទៅវិញទៅមក, ការទទួលខុសត្រូវរួមគ្នា និងភាពជាដៃគូជាក់ស្ដែង។
សម្តេចនាយករដ្ឋមន្ត្រី បានសង្កត់ធ្ងន់ថា កម្ពុជាស្វាគមន៍រាល់កិច្ចសហប្រតិបត្តិការជាយុទ្ធសាស្ត្រ ដែលជួយសម្រួលដល់ការចែករំលែកចំណេះដឹង, ការផ្ទេរបច្ចេកវិទ្យា, ការកសាងសមត្ថភាព, ការស្រាវជ្រាវរួមគ្នា និង ការវិនិយោគប្រកបដោយគោលដៅច្បាស់លាស់ នៅក្នុងប្រព័ន្ធអេកូឡូស៊ី AI ដែលកំពុងរីកលូតលាស់៕
