(ភ្នំពេញ)៖ លោក ស៊ី ជីនពីង ប្រធានាធិបតីចិន បានថ្លែងថា ចិន បន្តគាំទ្រការ​អភិវឌ្ឍសង្គម និងសេដ្ឋកិច្ចនៅកម្ពុជា ព្រមទាំងជំរុញក្របខ័ណ្ឌ​កិច្ចសហប្រតិ​បត្តិការត្បូងពេជ្រ និងពន្លឿនការសម្រេចបាននូវ «ច្រករបៀងឧស្សាហកម្ម និងបច្ចេកវិទ្យា» និង «ច្រករបៀងមច្ឆា និងអង្ករ» ដើម្បីធានាបានការ​រីកចម្រើន​ជាបន្តបន្ទាប់នៅកម្ពុជា។

លោកប្រធានាធិបតីចិន បានថ្លែងបែបនេះ នៅក្នុងជំនួបពិភាក្សាការងារជា​សម្តេច​មហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជានៅថ្ងៃទី១៧ ខែកក្កដា ឆ្នាំ២០២៦នៅទីក្រុងសៀងហៃ ប្រទេសចិន។

ក្នុងជំនួបនោះ លោកប្រធានាធិបតីចិន បានវាយតម្លៃខ្ពស់ចំពោះភាពរឹង​មាំនៃ​ទំនាក់​ទំនង និងមិត្តភាពដែកថែបរវាងចិន-កម្ពុជា ព្រមទាំងបានសង្កត់ធ្ងន់ថា ចិនគាំទ្រការអភិវឌ្ឍសង្គម-សេដ្ឋកិច្ចរបស់កម្ពុជា។ លោកប្រធានាធិបតី បាន​គូសបញ្ជាក់អំពីការបន្តកិច្ចសហប្រតិបត្តិការជាមួយកម្ពុជា ដោយជំរុញក្រប​ខ័ណ្ឌ​កិច្ចសហប្រតិបត្តិការត្បូងពេជ្រ និងពន្លឿនការសម្រេចបាននូវ «ច្រក​របៀង​ឧស្សាហកម្ម និងបច្ចេកវិទ្យា» និង «ច្រករបៀងមច្ឆា និងអង្ករ» ដើម្បី​ធានា​បាននូវការរីកចម្រើនជាបន្តបន្ទាប់។

សម្ដេចមហាបវរធិបតី បានអបអរសាទររដ្ឋាភិបាលចិន ចំពោះជោគជ័យនៃ​សន្និ​សីទបញ្ញាសិប្បនិម្មិតពិភពលោក ឆ្នាំ២០២៦។ សម្ដេចមហាបវរធិបតី បាន​ថ្លែងអំណរគុណដល់រដ្ឋាភិបាល និងប្រជាជនចិន ចំពោះការបន្តគាំទ្រ និង​ផ្ដល់ជំនួយ ដែលរួមចំណែកអភិវឌ្ឍសង្គម-សេដ្ឋកិច្ច កសាងហេដ្ឋារចនា​សម្ព័ន្ធ និងលើកស្ទួយជីវភាពប្រជាជនកម្ពុជា។

សម្ដេចមហាបវរធិបតី បានគូសបញ្ជាក់ជាថ្មីថា កម្ពុជាបន្តប្រកាន់ខ្ជាប់ឥតងាក​រេនូវគោលការណ៍ចិនមួយ ដោយចាត់ទុកបញ្ហាតៃវ៉ាន់ ហុងកុង ស៊ីចាំង និង​ស៊ីន​ជាំងជាកិច្ចការផ្ទៃក្នុងរបស់ចិន។ បន្ថែមលើនេះ សម្តេចមហាបវរធិបតី​នាយក​រដ្ឋមន្ត្រី បានវាយតម្លៃខ្ពស់ចំពោះភាពរីកចម្រើនជាលំដាប់​នៃទំនាក់​ទំនង​កម្ពុជា-ចិន ក្នុងនាមជាដៃគូយុទ្ធសាស្ត្រគ្រប់ជ្រុងជ្រោយ និងជាមិត្ត​ដែក​ថែប ហើយប្រទេសទាំងពីរកំពុងរួមគ្នាកសាង «សហគមន៍វាសនា​រួម​កម្ពុជា-ចិន គ្រប់រដូវកាល ក្នុងយុគសម័យថ្មី»។

ក្នុងជំនួបនោះ សម្តេចនាយករដ្ឋមន្ត្រីកម្ពុជា និងលោកប្រធានាធិបតី ស៊ី ជីនពីង បានបន្តពិភាក្សា និងផ្លាស់ប្ដូរយោបល់លើគំនិតផ្តួចផ្តើម និងទិសដៅ​ការ​ងារបន្ត សំដៅបន្តពង្រឹងនិងពង្រីកវិស័យគន្លឹះ នៃកិច្ចសហប្រតិបត្តិការ​រវាង​ប្រទេសទាំងពីរ ឱ្យកាន់តែស៊ីជម្រៅថែមទៀត រួមមាន៖ វិស័យនយោ​បាយ​-ការទូត, សេដ្ឋកិច្ចនិងពាណិជ្ជកម្ម, ហេដ្ឋារចនាសម្ព័ន្ធតភ្ជាប់, ថាមពលអគ្គិ​សនី, បញ្ញាសិប្បនិម្មិត និងសេដ្ឋកិច្ចឌីជីថល, កសិកម្ម, ការពារជាតិ និង​សន្តិសុខ។

សម្តេចមហាបវរធិបតី ក៏បានជម្រាបជូនឯកឧត្តមប្រធានាធិបតីចិន អំពីការ​វិវត្តថ្មីៗ​នៃស្ថានការណ៍ព្រំដែនកម្ពុជា-ថៃ និងសង្កត់ធ្ងន់អំពីការប្ដេជ្ញាចិត្ត និង​ជំហររបស់កម្ពុជាក្នុងការដោះស្រាយបញ្ហាព្រំដែនដោយសន្តិវិធី ផ្អែកលើច្បាប់​អន្តរជាតិ, និងអនុលោមតាមអនុសញ្ញា, សន្ធិសញ្ញា និងកិច្ចព្រមព្រៀង​ដែល​មាន​ស្រាប់រវាងកម្ពុជា និងថៃ៕