យុវជនបង្ហាញការគាំទ្រយ៉ាងក្លៀវក្លាចំពោះយុទ្ធនាការដាំកូនឈើ ដើម្បីបរិស្ថានបៃតង (Video inside)
18-07-2026 14:21
(ពោធិ៍សាត់)៖ យុវជនកម្ពុជាជាច្រើនបាននិងកំពុងបង្ហាញការគាំទ្រយ៉ាងផុសផុល និងចូលរួមយ៉ាងសកម្មនៅក្នុងយុទ្ធនាការដាំកូនឈើ ដែលរៀបចំឡើងដោយស្ថាប័នរដ្ឋាភិបាល អង្គការសង្គមស៊ីវិល និងសហគមន៍នានា។ ការចូលរួមនេះបានឆ្លុះបញ្ចាំងពីស្មារតីទទួលខុសត្រូវខ្ពស់របស់យុវជនចំពោះការការពារបរិស្ថាន និងការអភិវឌ្ឍប្រកបដោយចីរភាពសម្រាប់ប្រទេសជាតិ។
បើតាមយុវតី ផេង លីណា ជាសិស្សសិក្សានៅវិទ្យាល័យប្រម៉ោយ ស្រុកវាលវែង បានបង្ហាញការសប្បាយចិត្ត និងគាំទ្រយ៉ាងខ្លាំងចំពោះយុទ្ធនាការដាំកូនឈើនៅក្នុងមូលដ្ឋានរស់នៅរបស់ខ្លួន។ យុវតីរូបនេះយល់ច្បាស់ថា ព្រៃឈើ ជាអ្នកបង្កើតឧកស៉ីហ្សែនឱ្យភពផែនដី ព្រៃឈជាជម្រកសម្រាប់សត្វព្រៃ។ ព្រៃឈើជាចំណែកមួយដ៏សំខាន់ទាក់ទាញភ្ញៀវទេសចរឱ្យមកទស្សនានៅតំបន់នេះជាដើម។
ចំពោះយុវជន ឌួង ដាវលុយ បានបង្ហាញទស្សនយល់ឃើញស្រដៀងគ្នាថាព្រៃឈើ ជួយដល់ជីវិតមនុស្ស សត្វ និងភពផែនដី តាមរយៈការបញ្ចេញឧស្ម័យឧកស៉ីហ្សែន ជួយលើកម្ពស់ដល់បរិស្ថាន។
យុវជនរូបនេះ ក៏បានអំពាវនាវដល់ប្រជាជនពលរដ្ឋទាំងអស់ សូមរួមគ្នាដាំដើមឈើឱ្យមានច្រើនតាមអ្វីដែលអាចធ្វើទៅបាន ជាពិសេសសូមកុំកាប់បំផ្លាញព្រៃឈើឱ្យសោះ។
យុទ្ធនាការដាំកូនឈើនេះមានគោលបំណងសំខាន់ក្នុងការបង្កើនគម្របព្រៃឈើ កាត់បន្ថយផលប៉ះពាល់នៃការប្រែប្រួលអាកាសធាតុ និងបង្កើតបរិស្ថានរស់នៅប្រកបដោយផាសុកភាព។ យុវជនបានយល់ដឹងយ៉ាងច្បាស់អំពីសារៈសំខាន់នៃដើមឈើ ដែលជាប្រភពអុកស៊ីសែន ជម្រកសត្វព្រៃ និងជាកត្តាដ៏សំខាន់ក្នុងការរក្សាលំនឹងប្រព័ន្ធអេកូឡូស៊ី។ ពួកគេបានចំណាយពេលវេលា និងកម្លាំងកាយចិត្តចូលរួមដាំកូនឈើនៅតាមទីសាធារណៈ សាលារៀន វត្តអារាម និងតំបន់ដែលរងការបាត់បង់ព្រៃឈើ។
សកម្មភាពដ៏មានអត្ថន័យនេះមិនត្រឹមតែបានរួមចំណែកដល់ការបៃតងនៃភពផែនដីប៉ុណ្ណោះទេ ប៉ុន្តែក៏បានជំរុញស្មារតីសាមគ្គីភាព និងការស្រឡាញ់ធម្មជាតិក្នុងចំណោមយុវជនផងដែរ។ ពួកគេបានក្លាយជាគំរូដ៏ល្អមួយសម្រាប់សង្គមទាំងមូល ក្នុងការចូលរួមថែរក្សា និងការពារធនធានធម្មជាតិ ដែលជាកេរដំណែលដ៏មានតម្លៃសម្រាប់មនុស្សជំនាន់ក្រោយ។ ការប្តេជ្ញាចិត្តរបស់យុវជនក្នុងការចូលរួមយុទ្ធនាការដាំកូនឈើនេះ គឺជាសញ្ញាណដ៏វិជ្ជមានមួយដែលបង្ហាញថា កម្ពុជានឹងមានអនាគតបៃតង និងប្រកបដោយចីរភាព។
គួរឱ្យដឹងថា នាថ្ងៃទី១៧ ខែកក្កដា ឆ្នាំ២០២៦ លោក ខ្វៃ អាទិត្យា អនុរដ្ឋលេខាធិការ និងជាអ្នកនាំពាក្យក្រសួងបរិស្ថាន រួមសហការជាមួយរដ្ឋាបាលខេត្តពោធិ៍សាត់ អង្គការសម្ព័ន្ធមិត្តសត្វព្រៃ (WA) អាជ្ញាធរមូលដ្ឋាន ប្រជាសហគមន៍ និងសិស្សានុសិស្ស នៅវិទ្យាល័យប្រម៉ោយ ស្រុកវាលវែង បានរៀបចំពិធីដាំកូនឈើចំនួន៥០០ដើម នៅក្នុងសហគមន៍តំបន់ការពារធម្មជាតិភូមិទំព័រ៕
