(កំពត)៖ លោកបណ្ឌិត ហ៊ុន សុខា ទីប្រឹក្សាសម្តេចតេជោ ហ៊ុន សែន និងជាប្រធានក្រុមការងារចលនាកសាងសមាជិកគណបក្សចុះមូលដ្ឋានខេត្តកំពត នារសៀលថ្ងៃទី១៧ ខែកក្កដា ឆ្នាំ២០២៦ បានអញ្ជើញនាំយក គ្រឿងសម្ភារសិក្សា និងកុំព្យូទ័រលើតុប្រភេទ All-in-one ចំនួន ១០៣គ្រឿង ដែលជាអំណោយដ៏ថ្លៃថ្លារបស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ទៅប្រគល់ជូនលោកគ្រូ អ្នកគ្រូ និងសិស្សានុសិស្សនៅវិទ្យាល័យទាំង៥ នៃស្រុកអង្គរជ័យ។

ពិធីប្រគល់-ទទួលនេះ មានការអញ្ជើញចូលរួមពីលោកស្រីប្រធានក្រុមប្រឹក្សាស្រុក លោកអភិបាលស្រុក លោកអភិបាលរងស្រុក អង្គភាពនានា អាជ្ញាធរដែនដី រួមទាំងលោកគ្រូ អ្នកគ្រូ សិស្សានុសិស្ស និងប្រជាការពារចំនួន ៥៩៧រូប។

ក្នុងឱកាសនោះ លោកបណ្ឌិត ហ៊ុន សុខា បានគូសបញ្ជាក់អំពីចក្ខុវិស័យរបស់រាជរដ្ឋាភិបាល និងក្រសួងអប់រំ យុវជន និងកីឡា ក្នុងអាណត្តិនេះ ដែលផ្តោតសំខាន់លើការពង្រឹងគុណភាពអប់រំផ្នែកវិទ្យាសាស្ត្រ និងបច្ចេកវិទ្យាឌីជីថល ដែលជាអាទិភាពចម្បងមួយនៃបញ្ចកោណទី១ នៃការអភិវឌ្ឍធនធានមនុស្ស។

លោកបណ្ឌិត បានបន្ថែមថា ការរួមបញ្ចូលបច្ចេកវិទ្យាឌីជីថលទៅក្នុងការសិក្សា ពិតជាមានសារៈសំខាន់ណាស់ដើម្បីឱ្យសិស្សានុសិស្សអភិវឌ្ឍជំនាញសំខាន់ៗសម្រាប់អាជីពការងារដែលមិនអាចខ្វះបានក្នុងបរិបទថ្មីនេះ ហើយលើសពីនេះយើងត្រូវចាំបាច់នូវការពង្រឹងសមត្ថភាពគ្រូបង្រៀនឱ្យទទួលបានការបណ្ដុះបណ្ដាលការប្រើប្រាស់ឧបករណ៍ឌីជីថលប្រកបដោយប្រសិទ្ធភាព លើកកម្ពស់ការបង្រៀន និងរៀនឱ្យស្របនឹងវិធីសាស្ត្រនៃការអប់រំក្នុងសតវត្សទី២១ ដើម្បីឱ្យសិស្សានុសិស្សយើងទទួលបានបទពិសោធន៍ការសិក្សាដែលមានលក្ខណៈទំនើប អន្តរកម្ម និងអាចស្វ័យសិក្សាបានដោយខ្លួនឯង។

លោកបណ្ឌិត ហ៊ុន សុខា លើកទឹកចិត្តដល់វិទ្យាល័យទាំង៥​​ នៅក្នុងស្រុកអង្គរជ័យ ដែលទទួលបានសម្ភារក៏ដូចជាកុំព្យូទ័រលើតុប្រភេទ All in one ជាអំណោយដ៏ថ្លៃថ្លារបស់សម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី​​​ ហ៊ុនសែន តាមរយៈលោក ភឺន ផល្លា នាពេលនេះសូមយកទៅប្រើប្រាស់ជាប្រយោជន៍ដល់ការបង្រៀនដល់ សិស្សានុសិស្សតាមរយៈការអនុវត្តកម្មវិធីអប់រំផ្សេងៗបន្ថែមលើមុខវិជ្ជាដែលមានស្រាប់ ដើម្បីឱ្យវិទ្យាល័យនីមួយៗឈានមុខក្នុងការអនុវត្តកម្មវិធីសិក្សាបច្ចេកវិទ្យាបែបទំនើប ដោយសិស្សានុសិស្សអាចសិក្សាតាមគោលវិធីសាស្ត្រថ្មី ដូចជាការផ្សារភ្ជាប់បច្ចេកវិទ្យានឹងការអប់រំបំណិនជីវិត ការសិក្សាតាមបែបគម្រោងជាដើម។ លោកក៏លើកទឹកចិត្តសិស្សឱ្យចូលរួមប្រកួតប្រជែងកម្មវិធីបច្ចេកវិទ្យាកម្រិតសាកលលោក ទៅតាមលទ្ធភាពដែលយើងអាចធ្វើបាន ធ្វើយ៉ាងណាពង្រីកសក្ដានុពលរបស់ សិស្សានុសិស្សកម្ពុជាយើងឱ្យកាន់តែទូលំទូលាយលើការអប់រំបច្ចេកវិទ្យា។

លោកបណ្ឌិត ហ៊ុន សុខា ក៏​បានថ្លែងអំណរគុណចំពោះវត្តមានរបស់ក្រុមប្រឹក្សាស្រុក អភិបាលស្រុក អភិបាលរងស្រុក អង្គភាព នានា និងអាជ្ញាធរដែនដីក្នុងស្រុក ដែលបានចំណាយពេលវេលាដ៏មានតម្លៃអញ្ជើញ ចូលរួមនៅក្នុងពិធីនេះ នឹងបានផ្ដល់នូវអំណោយសម្ភារៈសិក្សារួមទាំងថវិកាមួយចំនួនជូនដល់លោកគ្រូ អ្នកគ្រូ សិស្សានុសិស្ស និងប្រជាការពារផងដែរ៕