(ចិន)៖ លោក ហួត ហាក់ រដ្ឋមន្ត្រីក្រសួងទេសចរណ៍ បានឆ្លៀតឱកាសជួបពិភាក្សាការងារអាហារពេលល្ងាច (Working Dinner) ជាមួយលោកស្រី Xu Xiaoxia (លោកស្រី អារុណ) ប្រធានផ្នែកភាសាខ្មែរ នៃមជ្ឈមណ្ឌលអាស៊ី-អាហ្វ្រិក នៃអគ្គស្ថានីយវិទ្យុ និងទូរទស្សន៍មជ្ឈិមចិន (China Media Group-CMG) និងជានាយិកាវិទ្យុមិត្តភាពកម្ពុជា-ចិន ព្រមទាំងលោកស្រី Kong Siqi អ្នកយកព័ត៌មានភាសាខ្មែរ នៃមជ្ឈមណ្ឌលអាស៊ី-អាហ្វ្រិក នៃអគ្គស្ថានីយវិទ្យុ និងទូរទស្សន៍មជ្ឈិមចិន (CMG) នៅល្ងាចថ្ងៃទី១៦ ខែកក្កដា ឆ្នាំ២០២៦ នៅរដ្ឋធានីប៉េកាំង។

ជំនួបនេះ បានធ្វើឡើងក្នុងឱកាសដែលលោក ហួត ហាក់ អមសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បំពេញទស្សនកិច្ចការងារនៅរដ្ឋធានីប៉េកាំង និងចូលរួមកម្មវិធី 2026 World AI Conference and High-Level Meeting on Global AI Governance ចាប់ពីថ្ងៃទី១៥-១៧ ខែកក្កដា ឆ្នាំ២០២៦ នៅទីក្រុងសៀងហៃ សាធារណរដ្ឋប្រជាមានិតចិន។

រដ្ឋមន្ត្រី ហួត ហាក់ បានកោតសរសើរ និងថ្លែងអំណរគុណយ៉ាងជ្រាលជ្រៅ ដល់អគ្គស្ថានីយវិទ្យុ និងទូរទស្សន៍មជ្ឈិមចិន (CMG) និងវិទ្យុមិត្តភាពកម្ពុជា-ចិន ក្រោមការដឹកនាំរបស់លោកស្រី Xu Xiaoxia ដែលតែងតែផ្តល់កិច្ចសហការល្អ និងជិតស្និទ្ធជាមួយក្រសួងទេសចរណ៍ ក្នុងការផ្តល់ព័ត៌មាន និងផ្សព្វផ្សាយអំពីវិស័យទេសចរណ៍កម្ពុជា ទៅកាន់ប្រជាជនចិន និងពិភពលោក។

ជាការឆ្លើយតប លោកស្រី Xu Xiaoxia ក្នុងនាមតំណាងថ្នាក់ដឹកនាំ CMG បានថ្លែងអំណរគុណជូនចំពោះឯកឧត្តមរដ្ឋមន្ត្រី និងសម្តែងការពេញចិត្តចំពោះកិច្ចសហការដ៏ជិតស្និទ្ធ និងប្រកបដោយផ្លែផ្កាជាមួយក្រសួងទេសចរណ៍ ព្រមទាំងបានបង្ហាញការប្ដេជ្ញាចិត្តដ៏មុតមាំ បន្តចូលរួមផ្សព្វផ្សាយសក្តានុពល និងគោលដៅទេសចរណ៍របស់កម្ពុជា រួមទាំងគោលនយោបាយនានារបស់រាជរដ្ឋាភិបាលកម្ពុជា ជាពិសេសគោលនយោបាយលើកលែងទិដ្ឋាការជូនប្រជាជនចិន ឱ្យកាន់តែទូលំទូលាយដល់ប្រជាជនចិន៕