(ភ្នំពេញ)៖ លោក សារិន វណ្ណា ប្រធានមន្ទីររៀបចំដែនដីរាជធានីភ្នំពេញ បានបញ្ជាក់ថា នៅក្នុងអាណត្តិទី៧ ក្រោមគោលការណ៍បញ្ចកោណដំណាក់ទី១ របស់រាជរដ្ឋាភិបាល មន្ទីររៀបចំដែនដី រាជធានីភ្នំពេញ បានដោះស្រាយបញ្ចប់វិវាទបុរី ដីឡូត៍ ដែលក្ស័យធនបានចំនួន ៤៨គម្រោង ស្មើនឹងជាង ១ម៉ឺនគ្រួសារ។

តាមរយៈបណ្តាញទំនាក់ទំនងសង្គមផ្លូវការរបស់ខ្លួន នាថ្ងៃទី១៩ ខែកក្កដា ឆ្នាំ២០២៦នេះ លោក សារិន វណ្ណា បានបញ្ជាក់ថា សម្រាប់អាណត្តិទី៧ គោលការណ៍បញ្ចកោណដំណាក់ទី១ របស់រាជរដ្ឋាភិបាល មន្ទីររៀបចំដែនដី រាជធានីភ្នំពេញ បានចែកបណ្ណកម្មសិទ្ធិរួចចំនួន ១៣ខណ្ឌ និងកំពុងចុះបញ្ជីចំណែកឯកជន នៃអគារសហកម្មសិទ្ធិសម្រាប់ខណ្ឌចុងក្រោយទី១៤ (៧មករា) ដែលនឹងត្រូវបញ្ចប់ត្រឹមចុងឆ្នាំ២០២៦។

លោក សារិន វណ្ណា បានបន្ថែមថា មិនតែប៉ុណ្ណោះក៏បានដោះស្រាយបញ្ចប់វិវាទ បុរី ដីឡូត៍ ដែលក្ស័យធនបានចំនួន៤៨គម្រោង ស្មើនឹងជាង ១ម៉ឺនគ្រួសារ។ ទំនាស់ដីធ្លី និងសំណង់អន្តរគមន៍នៅក្រសួងដែនដីបានចំនួន ៦៧៨ករណី។

លោកបានបន្ថែមថា មន្ទីររៀបចំដែនដីរាជធានីភ្នំពេញ ក៏បានជួយចូលរួមចុះបញ្ជីមានលក្ខណៈជាប្រព័ន្ធ និងចែកបណ្ណកម្មសិទ្ធិ ជូនប្រជាពលរដ្ឋនៅខេត្តកំពង់ស្ពឺ បានចំនួនជាង ២៧ម៉ឺនក្បាលដី ព្រមទាំងជួយខេត្តរតនគីរីបានជាង ៣ម៉ឺនក្បាលដី។

បន្ថែមពីនេះមន្ទីរក៏បានសរសេរបញ្ចប់មុខសេវាសាធារណៈ តាមប្រព័ន្ធឌីជីថល លើវិស័យដីធ្លី និងសំណង់ រួចរាល់ផងដែរ (អាចប្រើប្រាស់បាន កើតឡើងដោយស្នាដៃកូនខ្មែរ) និងមានអ្នកចូលប្រើប្រាស់ចំនួន ១២ម៉ឺននាក់ (អាចវិភាគសេដ្ឋកិច្ច និងសរសេរគោលនយោបាយលើវិសយ័អចលនវត្ថុ)។

ចំពោះផែនទីវាយតម្លៃដីជាឌីជីថល សម្រាប់រាជធានីភ្នំពេញ កំពុងស្ថិតក្នុងការសាកល្បងប្រើប្រាស់នៅឡើយ។ បរិយាកាសគ្មានវិវាទ ទ្រនំសុភមង្គល និង សេវាគាប់ចិត្ត សម្រាប់ប្រជាជននៅរាជធានីភ្នំពេញ។ សូមកុំចាំដល់មានធនធានមនុស្ស ទើបមានកំណែទម្រង់៕