(ភ្នំពេញ)៖ នៅថ្ងៃទី១៩ ខែកក្កដា ឆ្នាំ២០២៦ លោក ឫទ្ធី សុគន្ធារិទ្ធ អនុរដ្ឋលេខាធិការ ក្រសួងមុខងារសាធារណៈ សមាជិកគណៈកម្មាធិការកណ្តាល​ សហភាពសហព័ន្ធយុវជនកម្ពុជា​ និងជាប្រធានសហភាពសហព័ន្ធយុវជនកម្ពុជា​ ក្នុងវិស័យមុខងារសាធារណៈ បានដឹកនាំប្រតិភូយុវជនជំនាន់ Z ចំនួន ៨នាក់ ចូលរួម “កម្មវិធីបទពិសោធវប្បធម៌ក្វាងស៊ី សម្រាប់យុវជនអាស៊ាន-ចិន ឆ្នាំ២០២៦”។ កម្មវិធីដ៏មានសារៈសំខាន់នេះ នឹងប្រព្រឹត្តទៅរយៈពេល ៥ថ្ងៃ នៅតំបន់ស្វយ័តក្វាងស៊ី ក្រុងណាននីង នៃសាធារណរដ្ឋប្រជាមានិតចិន។

ដំណើរទស្សនកិច្ចផ្លាស់ប្តូរវប្បធម៌នេះ មានគោលបំណងសំខាន់ក្នុងការផ្លាស់ប្តូរចំណេះដឹង បទពិសោធន៍ និងពង្រឹងចំណងមិត្តភាព សាមគ្គីភាព និងភាតរភាពយ៉ាងជិតស្និទ្ធរវាងបណ្តាប្រទេសអាស៊ាន និងចិន។ ពិសេសជាងនេះទៅទៀត គឺក្នុងបរិបទនៃយុគសម័យបច្ចេកវិទ្យាបញ្ញាសិប្បនិម្មិត (AI) ដែលកំពុងរីកចម្រើនយ៉ាងឆាប់រហ័ស។ យុវជនជំនាន់ Z ដែលជាទំពាំងស្នងឫស្សី នឹងទទួលបានឱកាសដ៏ល្អដើម្បីស្វែងយល់ពីវប្បធម៌ចិន និងចែករំលែកវប្បធម៌ខ្មែរទៅកាន់មិត្តភក្តិអន្តរជាតិ។

កម្មវិធីនេះត្រូវបានគេរំពឹងថា នឹងក្លាយជាកម្លាំងចលករបន្ថែមទៀត ក្នុងការកសាងសហគមន៍ជោគវាសនារួមគ្រប់រដូវកាល រវាងអាស៊ាន-ចិន។ លើសពីនេះ ក៏នឹងចូលរួមចំណែកធ្វើឱ្យសម្បូរណ៍បែបនូវកិច្ចផ្លាស់ប្តូរប្រជាជននិងប្រជាជន ក្នុងក្របខណ្ឌកិច្ចសហប្រតិបត្តិការត្បូងពេជ្រ ដែលជាយន្តការដ៏សំខាន់មួយក្នុងការជំរុញទំនាក់ទំនងទ្វេភាគី និងពហុភាគីឱ្យកាន់តែរឹងមាំ និងស៊ីជម្រៅ។ តាមរយៈការចូលរួមនេះ យុវជនកម្ពុជានឹងទទួលបានបទពិសោធន៍ថ្មីៗ និងពង្រីកបណ្តាញទំនាក់ទំនងអន្តរជាតិ ដែលជាមូលដ្ឋានគ្រឹះដ៏ល្អសម្រាប់អនាគតរបស់ពួកគេ។