(ព្រះវិហារ)៖ ដោយយល់ឃើញពីស្ថានភាពខ្វះខាតផ្នែកជីវភាពរបស់ក្រុមគ្រួសារកងទ័ពជួរមុខ ដែលកំពុងឈរជើងនៅតំបន់ភ្នំខ្មោច ស្ថិតក្នុងភូមិសែនជ័យ ឃុំស្រអែម ស្រុកជាំក្សាន្ត ខេត្តព្រះវិហារ នៅព្រឹកថ្ងៃទី១៩ ខែកក្កដា ឆ្នាំ២០២៦នេះ ក្រុមសេនាតេជោសន្តិភាព តំណាងលោក កែវ ផុង ជំនួយការផ្ទាល់សម្តេចតេជោ បាននាំយកអំណោយដ៏ថ្លៃថ្លារបស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដើម្បីចែកជូនដល់ក្រុមគ្រួសារកងទ័ពទាំងនោះ។

អំណោយដែលបានចែកជូនដល់គ្រួសារកងទ័ពនីមួយៗ រួមមាន អង្ករ មី ទឹកសុទ្ធ ទឹកត្រី ទឹកស៊ីអ៊ីវ ត្រីខ ទឹកដោះគោ និងថវិកាមួយចំនួន ដើម្បីជួយដោះស្រាយបញ្ហាប្រឈមជាក់ស្តែងក្នុងការរស់នៅប្រចាំថ្ងៃរបស់ពួកគាត់។

ការផ្តល់អំណោយនេះ ធ្វើឡើងក្នុងគោលបំណងបង្ហាញពីការយកចិត្តទុកដាក់ និងគិតគូរខ្ពស់របស់ថ្នាក់ដឹកនាំចំពោះសុខទុក្ខរបស់កងទ័ពជួរមុខ និងក្រុមគ្រួសារ ដែលបានលះបង់កម្លាំងកាយចិត្តការពារបូរណភាពទឹកដី។

ដោយសារស្ថានភាពអាកាសធាតុមិនអំណោយផល និងទីតាំងពិបាកចូលទៅដល់ ព្រមទាំងមិនមានទីតាំងសមរម្យសម្រាប់ប្រមូលផ្តុំនោះ ក្រុមការងារក៏បានសម្រេចផ្តល់ជូនអំណោយទាំងនោះដោយផ្ទាល់នៅតាមផ្លូវក្បែរលំនៅឋានរបស់បងប្អូនកងទ័ព ដើម្បីបង្កលក្ខណៈងាយស្រួល និងជៀសវាងការធ្វើដំណើរឆ្ងាយរបស់ពួកគាត់។