(សៀមរាប)៖ រដ្ឋបាលខេត្តសៀមរាប នៅព្រឹកថ្ងៃទី១៩ ខែកក្កដា ឆ្នាំ២០២៥នេះ បានរៀបចំដង្ហែក្បួនអបអរសាទរជ័យលាភីអង្គភាពផ្ដល់សេវាសាធារណៈគំរូ ក្នុងវិស័យអប់រំ និងសុខាភិបាលឆ្នាំ២០២៥ នៅតាមដងវិថីក្នុងក្រុងសៀមរាប ក្រោមវត្តមានរបស់លោក ប្រាក់ សោភ័ណ អភិបាលខេត្តសៀមរាប និងលោក លោកស្រី សមាជិកក្រុមប្រឹក្សាខេត្ត ថ្នាក់ដឹកនាំមន្ទីរ អង្គភាពជុំវិញខេត្ត និងលោកគ្រូ អ្នកគ្រូ សិស្សានុសិស្សជាច្រើនផងដែរ។

ពិធីដង្ហែក្បួននេះគឺដើម្បីអបអរសាទរ និងលើកទឹកចិត្តដល់កិច្ចខិតខំប្រឹងប្រែងក្នុងការផ្តល់សេវាសាធារណៈជូនបងប្អូនប្រជាពលរដ្ឋរបស់អង្គភាពជ័យលាភីទាំង៥ ប្រចាំឆ្នាំ២០២៥ របស់ខេត្តសៀមរាប ដើម្បីផ្សព្វផ្សាយឱ្យកាន់តែទូលំទូលាយអំពីការប្រកួតប្រជែងអង្គភាពផ្ដល់សេវាសាធារណៈគំរូក្នុងវិស័យអប់រំ និងវិស័យសុខាភិបាល សម្រាប់ឆ្នាំបន្តបន្ទាប់ទៀត។

សូមជម្រាបថា ដោយផ្អែកលើការអនុវត្តតាមនីតិវិធីយ៉ាងម៉ត់ចត់ អង្គភាពផ្ដល់សេវាសាធារណៈរួមមានអនុវិទ្យាល័យ សាលាបឋមសិក្សា និងមណ្ឌលសុខភាព ចំនួន៥ ក្នុងខេត្តសៀមរាប ត្រូវបានគណៈកម្មការវាយតម្លៃអង្គភាពផ្ដល់សេវាសាធារណៈថ្នាក់ជាតិ វាយតម្លៃថាជាអង្គភាព ទទួលបានជ័យលាភីអង្គភាពផ្ដល់សេវាសាធារណៈគំរូក្នុងវិស័យអប់រំ និងវិស័យសុខាភិបាលប្រចាំឆ្នាំ២០២៥ ព្រមជាមួយការទទួលស្គាល់ដ៏ខ្ពង់ខ្ពស់បំផុតពី សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។

ក្នុងនោះដែរអនុវិទ្យាល័យ មិត្តភាព ខ្មែរ-ជប៉ុនព្រះឥន្ទកោសា ទទួលបានជ័យលាភីលេខ១ ទូទាំងប្រទេស, មណ្ឌលសុខភាព គោកចក ទទួលបានជ័យលាភីលេខ១ ទូទាំងប្រទេស, មណ្ឌលសុខភាព ស្រែណូយ ទទួលបានជ័យលាភីលេខ៤ ទូទាំងប្រទេស, សាលាបឋមសិក្សា ក្រវ៉ាន់ ទទួលបានជ័យលាភីលេខ៤ ទូទាំងប្រទេស និងអនុវិទ្យាល័យ អរញ្ញរង្សី ទទួលបានជ័យលាភីលេខ៩ ទូទាំងប្រទេស៕