(រតនគិរី)៖ ដោយមានការសម្របសម្រួលនីតិវិធីពីលោក គង់ ស៊ីម៉េង ព្រះរាជអាជ្ញារងនៃអយ្យការអមសាលាដំបូងខេត្តរតនគិរី កម្លាំងគណៈបញ្ជាការឯកភាពស្រុកអណ្តូងមាសដឹកនាំដោយលោក មាស សារ៉េត អភិបាលស្រុក និងជាប្រធានគណៈបញ្ជការឯកភាពស្រុកអណ្តូងមាស នៅរសៀលថ្ងៃទី១៨ ខែកក្កដា ឆ្នាំ២០២៦ បានចុះបង្រ្កាបករណីធ្វើអាជីវកម្មរ៉ែខុសច្បាប់ នៅចំណុចក្រោយភូមិតាំងសេ(បរខាំ) ស្ថិតនៅភូមិតាំងសេ(បរខាំ) ឃុំញ៉ាង ស្រុកអណ្តូងមាស ខេត្តរតនគិរី។

ក្នុងប្រតិបត្តិការខាងលើនេះដែរ កម្លាំងសមត្ថកិច្ចបានឃាត់ខ្លួនឈ្មោះ ឡាង ស្រ៊ុន ភេទប្រុសអាយុ ៤៧ឆ្នាំ មានទីលំនៅបច្ចុប្បន្នភូមិស្រែអំពិល ស្រុកអូរគ្រៀងសែនជ័យ ខេត្តក្រចេះ ទទួលទីញដីពីប្រជាពលរដ្ឋក្នុង ១បេតម្លៃ ១៥,០០០រៀល, ដោយមានឈ្មោះ សុខ សាន្ត ជាអ្នកផ្ដល់លុយ និងសម្ភារៈផងដែរ ។

សម្ភារ:វត្ថុតាងដែលសមត្ថកិច្ចបានចុះបង្រ្កាបរួមមាន៖ ម៉ាស៊ីនកិនរ៉ែ ១គ្រឿង ក្បាលកិនថ្មចំនួន ១គ្រឿង ម៉ាស៊ីនបូមទឹកចំនួន ១គ្រឿង ទុយោបូមទឹកចំនួន ១ខ្សែ ទូយោបូមដីចំនួន ១ដើម ប៉ែលជោគដីចំនួន ៤ដើម ស្មៅជ័រសម្រាប់ចាប់មាសចំនួន ៤ដុំ ដែកត្បែងចំនួន ១ដើម ឆាងម៉ាងរ៉ែងម៉ាសចំនួន២។

បច្ចុប្បន្នជនសង្ស័យរួមនឹងវត្ថុតាង ត្រូវបានឃាត់ និងរក្សាទុកបណ្តោះអាសន្ន នៅអធិការដ្ឋាននគរបាលស្រុកអណ្តូងមាស ដើម្បីកសាងសំណុំរឿងចាត់ការតាមនីតិវិធី។ប្រភពព័ត៌មានដោយឡែកទៀតប្រាប់ឲ្យដឹងថា
ដីដែលក្រុមរ៉ែងមាសខុសច្បាប់គឺ ទិញពីបងប្អូនជនជាតិដឹកចេញពីតំបន់ភ្នំង៉ោក(ភាសាចារ៉ាយភ្នំមាស)។

សូមជម្រាបថា តាមដងទន្លេសេសាន្ត ចាប់ពីចំណុចព្រំប្រទល់ប្រទេសវៀតណាម (ស្រុកអូរយ៉ាដាវ) រហូតដល់ស្រុកសៀមប៉ាង ខេត្តស្ទឹងត្រែង សំបូរធនធានរ៉ែមាសលាយនៅជាមួយខ្សាច់ក្នុងទន្លេសេសាន ដូច្នេះទើបមានក្រុមហ៊ុនជាច្រើនខ្លះ មានអាជ្ញាបណ្ណ, ខ្លះទើបរត់ការណ៍សុំអាជ្ញាបណ្ណបូមខ្សាច់មានថៅកែជនជាតិខ្មែរ, ជនជាតិវៀតណាម, ជនជាតិចិន ប៉ុន្តែគោលបំណងក្រុមហ៊ុនទាំងនោះមិនដឹងថា ធ្វើអាជីវកម្មអ្វីឲ្យពិតប្រាកដទេ ពីព្រោះតាមដងទន្លេសេសាន្តនឹងគ្មានវិស័យសំណង់ទេ៕