(ព្រះវិហារ)៖ លោក សំ លាងទ្រី សមាជិកគណៈអចិន្ត្រៃយ៍គណៈកម្មាធិការគណបក្សប្រជាជនកម្ពុជាខេត្តព្រះវិហារ និងជាប្រធានក្រុមការងារគណបក្សចុះមូលដ្ឋានស្រុកឆែប នៅរសៀលថ្ងៃទី១៩ ខែកក្កដា ឆ្នាំ២០២៦ បានអញ្ជើញជាអធិបតីក្នុងពិធីបិទវគ្គត្រួតពិនិត្យការងារគណបក្ស ជូនដល់មន្ត្រីគណបក្សប្រជាជនកម្ពុជាស្រុកឆែប ដើម្បីពង្រឹងសមត្ថភាព និងបង្កើនប្រសិទ្ធភាពក្នុងការបំពេញភារកិច្ចបម្រើគណបក្ស និងប្រជាពលរដ្ឋ។

នៅក្នុងឱកាសនេះលោក សំ លាងទ្រី បានថ្លែងកោតសសើរ និងវាយតម្លៃខ្ពស់ដល់គណៈគ្រប់គ្រងវត្ត គ្រូឧទ្ទេស និងសិក្ខាកាម មន្ត្រីគណបក្សស្រុក ក៏ដូចបុគ្គលិកបម្រើការងាររបស់វគ្គ ដែលបានខិតខំយកអស់កម្លាំងកាយចិត្ត បទពិសោធន៍ និងចំណេះដឹង ធ្វើបទឧទ្ទេសនាម ព្រមទាំងសម្របសម្រួល ទទួលបានលទ្ធផលគួរជាទីគាប់ចិត្ត ធ្វើឱ្យសិក្ខាកាមទាំងអស់ បានសិក្សាឈ្វេងយល់នូវការងារជំនាញ ត្រួតពិនិត្យរបស់គណបក្ស និងបានផ្តល់ឱកាសក្នុងការលើកជាសំនួរ ចម្លើយយ៉ាងផុសផុលអស់រយះពេល២ថ្ងៃពេញនេះ ប្រកបដោយការទទួលខុសត្រូវខ្ពស់ និងទទួលផ្លែផ្កានៅថ្ងៃនេះ។

លោក សំ លាងទ្រី បានថ្លែងលើកឡើងថា​ ការរៀបចំវគ្គត្រួតពិនិត្យការងារគណបក្ស គឺជាផ្នែកមួយនៃការពង្រឹងគុណភាពធនធានមនុស្សរបស់គណបក្ស ដោយផ្តោតលើការយល់ដឹងអំពីតួនាទី ភារកិច្ច វិន័យ និងរបៀបរបបការងាររបស់មន្ត្រីគណបក្សនៅមូលដ្ឋាន សំដៅធានាឱ្យការអនុវត្តការងារប្រកបដោយប្រសិទ្ធភាព និងសម្រេចបានលទ្ធផលជាក់ស្តែង។

លោកបានថ្លែងគូសបញ្ជាក់ថា​ មន្ត្រីគណបក្សគ្រប់រូប ត្រូវបន្តលើកកម្ពស់ស្មារតីទទួលខុសត្រូវ សាមគ្គីភាព ឯកភាពផ្ទៃក្នុង និងប្រកាន់ខ្ជាប់នូវគោលការណ៍របស់គណបក្ស ព្រមទាំងត្រូវចុះជាប់ជាប្រចាំជាមួយប្រជាពលរដ្ឋ ដើម្បីស្តាប់សំណូមពរ ដោះស្រាយបញ្ហាប្រឈម និងឆ្លើយតបតាមតម្រូវការជាក់ស្តែងរបស់ប្រជាពលរដ្ឋឱ្យបានទាន់ពេលវេលា។

ជាមួយគ្នានេះ លោក សំ លាងទ្រី ក៏បានថ្លែងកោតសរសើរចំពោះការខិតខំប្រឹងប្រែងរបស់មន្ត្រីគណបក្សស្រុកឆែប ដែលបានចូលរួមយ៉ាងសកម្មក្នុងវគ្គត្រួតពិនិត្យការងារនេះ និងជំរុញឱ្យយកចំណេះដឹង និងបទពិសោធន៍ដែលទទួលបាន ទៅអនុវត្តជាក់ស្តែងក្នុងការបំពេញតួនាទី និងភារកិច្ចនៅតាមមូលដ្ឋាន ឱ្យកាន់តែមានប្រសិទ្ធភាពខ្ពស់។

សូមបញ្ជាក់ថា វគ្គបណ្តុះបណ្តាលស្តីពីការងារត្រួតពិនិត្យគណបក្ស ជូនដល់មន្រ្តីគណបក្សប្រជាជនកម្ពុជាស្រុកឆែប បានធ្វើឡើងរយះពេល២ថ្ងៃ ចាប់ពីថ្ងៃទី១៨-១៩ ខែកក្កដា ឆ្នាំ២០២៦ ដែលពិធីបើកវគ្គស្ថិតក្រោមវត្តមានលោក ខូយ ឃុនហ៊ អនុប្រធានគណៈកម្មាធិការគណបក្សខេត្ត និងជាប្រធានគណៈប្រចាំការ នៃគណៈអចិន្ត្រៃយ៍គណបក្សខេត្ត និងលោក ទែន សារ៉ុម សមាជិកអចិន្ត្រៃយ និងជាប្រធានគណៈកម្មាធិការត្រួតពិនិត្យគណបក្សខេត្ត ដោយនៅថ្ងៃបិទវគ្គធ្វើឡើងទៅក្រោមវត្តមានលោក សំ លាងទ្រី ប្រធានក្រុមការងារគណបក្សខេត្តចុះមូលដ្ឋានស្រុកឆែប។

លោក សំ លាងទ្រី ក៏បានប្រគល់វិញ្ញាបនបត្រលើកទឹកចិត្តដល់សិក្ខាកាមដែលបានចូលរួម និងបានថ្លែងណែនាំដល់សិក្ខាកាមដែលជាមន្រ្តីគណបក្ស ត្រូវបន្តបង្កើនសាមគ្គីភាពផ្ទៃក្នុងគណបក្ស ខិតខំប្រឹងប្រែងបំពេញភារកិច្ចដែលគណបក្សប្រគល់ជូន កសាងអំពើល្អជាមួយប្រជាពលរដ្ឋ ដើម្បីឲ្យគណបក្សទទួលបានជោគជ័យក្នុងការដឹកនាំកម្ពុជាជារៀងរហូតតរៀងទៅ។

វគ្គបណ្តុះបណ្តាលនេះ បានធ្វើឡើងក្នុងបរិយាកាសស្និទ្ធស្នាល ប្រកបដោយស្មារតីទទួលខុសត្រូវ និងការប្តេជ្ញាចិត្តខ្ពស់ពីសំណាក់មន្ត្រីគណបក្សទាំងអស់ ក្នុងការបន្តរួមចំណែកពង្រឹងគណបក្សឱ្យកាន់តែរឹងមាំ និងបម្រើផលប្រយោជន៍ប្រជាពលរដ្ឋប្រកបដោយប្រសិទ្ធភាព៕