(ស្ទឹងត្រែង)៖ ក្រុមការងាររាជរដ្ឋាភិបាលចុះមូលដ្ឋានស្រុកសេសាន ដឹកនាំដោយលោកស្រី ឡុង ភិរម្យ រដ្ឋលេខាធិការក្រសួងទេសចរណ៍ និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកសេសាន នៅថ្ងៃទី១៩ ខែកក្កដា ឆ្នាំ២០២៦ បានសហការជាមួយរដ្ឋបាលស្រុកសេសាន និងពុទ្ធបរិស័ទក្នុងមូលដ្ឋាន រៀបចំពិធីនាំយកទៀនព្រះវស្សា ទេយ្យទាន និងបច្ច័យ វេរប្រគេនជូនព្រះសង្ឃដែលគង់ចាំព្រះវស្សា នៅតាមវត្តអារាមចំនួន ១៦ វត្តទូទាំងស្រុកសេសាន។

ជាមួយគ្នានេះផងដែរ ក៏មានការរៀបចំពិធីនិមន្តព្រះសង្ឃចេញបិណ្ឌបាត ដោយមានព្រះសង្ឃចំនួន ១០០ អង្គ និមន្តទទួលបិណ្ឌបាតពីពុទ្ធបរិស័ទ ដែលបានអញ្ជើញចូលរួមយ៉ាងច្រើនកុះករ បង្ហាញពីសេចក្តីជឿជាក់ និងការគោរពបូជាចំពោះព្រះពុទ្ធសាសនា ដែលជាសាសនារបស់ជាតិខ្មែរ។

ពិធីដ៏មានអត្ថន័យនេះ បានប្រារព្ធធ្វើឡើងនៅវត្ត បុព្វតាយារាម (ហៅវត្តច្រប់) ស្ថិតក្នុងឃុំក្បាលរមាស ស្រុកសេសាន ខេត្តស្ទឹងត្រែង ដោយមានការអញ្ជើញចូលរួមពី លោក ឈរ រតនៈ អនុរដ្ឋលេខាធិការ នៃក្រសួងបរិស្ថាន និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកសៀមប៉ាង លោក ស្រ៊ន សំឫទ្ធី អភិបាលរងខេត្តស្ទឹងត្រែង តំណាងឲ្យលោកអភិបាលខេត្ត និងជាអនុប្រធាន ក្រុមការងារចុះមូលដ្ឋានស្រុក ព្រមទាំង លោក អ៊ុក ចាន់ថន ប្រធានក្រុមប្រឹក្សាស្រុក លោក សុវណ្ណ ពិសេដ្ឋ អភិបាលស្រុកសេសាន ក្រុមប្រឹក្សាស្រុក គណៈអភិបាល មន្ត្រីរាជការ អាជ្ញាធរមូលដ្ឋាន និងពុទ្ធបរិស័ទជាច្រើនកុះករ។

ក្នុងឱកាសនោះ លោកស្រី ឡុង ភិរម្យ បានថ្លែងថា ការនាំយកទៀនព្រះវស្សា និងទេយ្យទានមកវេរប្រគេននាពេលនេះ គឺជាការបង្ហាញពីស្មារតីរួមចំណែកក្នុងការថែរក្សា និងលើកកម្ពស់វិស័យព្រះពុទ្ធសាសនា ដែលជាមូលដ្ឋានសំខាន់នៃសង្គមខ្មែរ ព្រមទាំងជួយទ្រទ្រង់ដល់ជីវភាពព្រះសង្ឃសាមណេរ ក្នុងអំឡុងពេលគង់ចាំព្រះវស្សា អស់រយៈពេល ៣ខែ តាមបែបបទព្រះធម៌វិន័យ។

លោកស្រី ក៏បានអំពាវនាវឲ្យអាជ្ញាធរមូលដ្ឋាន និងប្រជាពលរដ្ឋ បន្តគាំទ្រ និងចូលរួមថែរក្សាប្រពៃណីវប្បធម៌ល្អៗរបស់ជាតិ ជាពិសេសការអនុវត្តពិធីបុណ្យចូលព្រះវស្សា ដែលជាប្រពៃណីបុរាណមានតម្លៃខ្ពស់ និងជាអត្តសញ្ញាណដ៏សំខាន់របស់ជាតិខ្មែរ។

គួរបញ្ជាក់ផងដែរថា ពិធីបុណ្យចូលព្រះវស្សា គឺជាពិធីសាសនាសំខាន់មួយក្នុងព្រះពុទ្ធសាសនា ដែលមានប្រវត្តិយូរអង្វែងតាំងពីសម័យព្រះពុទ្ធកាល។ ព្រះសង្ឃត្រូវគង់នៅក្នុងវត្តអារាមមួយកន្លែងអស់រយៈពេល ៣ខែ ចាប់ពីថ្ងៃ ១៥កើត ខែអាសាឍ ដល់ថ្ងៃ ១៥កើត ខែអស្សុជ ដើម្បីជៀសវាងការធ្វើដំណើរដែលអាចបំផ្លាញសត្វល្អិត និងរុក្ខជាតិ ក្នុងរដូវវស្សា។

ក្នុងអំឡុងពេលនេះ ពុទ្ធបរិស័ទតែងនាំយកទៀនព្រះវស្សា និងទេយ្យទានផ្សេងៗ ដូចជា អង្ករ ម្ហូបអាហារ ឱសថ និងបច្ច័យ មកវេរប្រគេនដល់ព្រះសង្ឃ ដើម្បីគាំទ្រដល់ការអនុវត្តធម៌ និងការសិក្សាព្រះធម៌វិន័យ។ ទៀនព្រះវស្សា ក៏មានន័យជានិមិត្តរូបនៃពន្លឺបញ្ញា ដែលបំភ្លឺផ្លូវជីវិត និងជំរុញឲ្យមនុស្សប្រព្រឹត្តអំពើល្អតាមបែបព្រះធម៌៕