(ប៉ៃលិន)៖ ដោយទទួលបានការអនុញ្ញាតពី បណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម (ARDB), លោក បាន លឹម និងលោក ប៉ិច សានី អគ្គនាយករង នៃធនាគារ ARDB រួមទាំងសហការី នៅថ្ងៃទី១៩ ខែកក្កដា ឆ្នាំ២០២៦ បានចុះត្រួតពិនិត្យកសិដ្ឋានចិញ្ចឹមមាន់យកស៊ុត និងខ្សែច្រវាក់ផលិតកម្មកែច្នៃចំណី របស់ក្រុមហ៊ុន Agritech Farm ដែលមានទីតាំងស្ថិតនៅសង្កាត់សាលាក្រៅ ក្រុងប៉ៃលិន ខេត្តប៉ៃលិន។

បច្ចុប្បន្ន ក្រុមហ៊ុន Agritech Farm កំពុងចិញ្ចឹមមាន់យកស៊ុតចំនួន ២៣ ម៉ឺនក្បាល ដែលអាចផ្ដល់ស៊ុតប្រមាណជាង ២១ ម៉ឺនគ្រាប់ ក្នុង១ថ្ងៃ។ ទន្ទឹមនេះ ក្រុមហ៊ុនក៏មានការកែច្នៃចំណីមាន់ ដែលផ្សំពីវត្ថុធាតុដើមក្នុងស្រុក ដែលអាចផលិតចំណីបានប្រមាណ ១៦០ តោនក្នុង១ថ្ងៃ និងអាចបង្កើនការផលិតបន្ថែមទៀត តាមតម្រូវការអតិថិជន។

បន្ថែមពីនេះ ក្រុមហ៊ុនក៏បាននិងកំពុងពង្រីកផលិតកម្មទៅខេត្តផ្សេងៗទៀត និងគំរូអាជីវកម្ម ដល់កសិករដែលមានចំណាប់អារម្មណ៍ចិញ្ចឹមមាន់យកស៊ុត ផងដែរ។

ក្នុងដំណើរចុះត្រួតពិនិត្យនេះ លោកអគ្គនាយករង បានថ្លែងកោតសរសើរអំពីបច្ចេកទេសទំនើប និងការអភិវឌ្ឍសមត្ថភាពរីកចម្រើនបានឆាប់រហ័សរបស់ក្រុមហ៊ុន ដែលអាចផ្ដល់ឱកាសការងារ និងជំនាញដល់យុវជន ព្រមទាំងជំរុញផលិតកម្មក្នុងស្រុកឱ្យកាន់ប្រសើរ និងកាត់បន្ថយការនាំចូល៕