(ភ្នំពេញ)៖ ដើម្បីផ្តល់នូវសេវាគាប់ចិត្ត ស្របតាមទិសដៅរបស់ក្រសួងរៀបចំដែនដី នគរូបនីយកម្ម និងសំណង់ លោក សារិន វណ្ណា ប្រធានមន្ទីររៀបចំដែនដីរាជធានីភ្នំពេញ បានបង្ហាញបណ្ណសម្គាល់សិទ្ធិកាន់កាប់ចំនួន ៥ប្រភេទ ដែលម្ចាស់កម្មសិទ្ធិករ ធនាគារ មីក្រូហិរញ្ញវត្ថុ និង ម្ចាស់បំណុលឯកជន អាចស្នើសុំប្តូរថ្មីបាន។

តាមរយៈបណ្តាញសង្គមផ្លូវការដែលបណ្តាញព័ត៍មាន Fresh News ទទួលបាននៅថ្ងៃទី២០ ខែកក្កដា ឆ្នាំ២០២៦នេះ លោក សារិន វណ្ណា បានបញ្ជាក់ដូចនេះថា ដើម្បីផ្តល់នូវសេវាគាប់ចិត្ត ស្របតាមទិសដៅរបស់ក្រសួងរៀបចំដែនដី នគរូបនីយកម្ម និង សំណង់ សូមម្ចាស់កម្មសិទ្ធិករ ធនាគារ មីក្រូហិរញ្ញវត្ថុ និង ម្ចាស់បំណុលឯកជន សូមមេត្តាជ្រាបថា៖

១- បណ្ណកម្មសិទ្ធិដែលគ្មាន QR-Code អាចស្នើសុំប្តូរបាន។

២- បណ្ណកម្មសិទ្ធិដែលមាន QR.Code រួចតែស្គេនមិនចេញ ក៏អាចប្តូរបានដែរ។

៣- បណ្ណកម្មសិទ្ធិមានហើយតែខុសលេខកូត ដោយព្រំប្រទល់រដ្ឋបាល តាមប្រព័ន្ធថ្មី(CIS) ក៏អាចប្តូរបានដែរ។

៤- ការសរសេរខុស អក្ខរាវិរុទ្ធ ឆ្នាំកំណើត ប្រភេទទ្រព្យ ឬ សាវតាផ្សេងៗ មន្ទីរ និងព្រីនបណ្ណកម្មសិទ្ធិថ្មី ជំនួសជៀសវាងការកែជាទឹកក្រហម ដែលធ្វើអោយប៉ាះពាល់ដល់តម្លៃចាត់ចែងនៃអចលនវត្ថុទៅថ្ងៃក្រោយ។

៥- ការប្តូរបណ្ណសម្គាល់សិទ្ធិកាន់កាប់អចលនវត្ថុ (បណ្ណភោគៈ) មកជាបណ្ណកម្មសិទ្ធិ(Lmap) ស្របតាមក្រមរដ្ឋប្បវេណី ដោយតម្រូវអោយបង់កម្រៃសេវា ៦០មុឺនរៀលជូនរដ្ឋ តាមប្រកាសអន្តរក្រសួង រវាងក្រសួងរៀបចំដែនដី នគរូបនីយកម្ម និង សំណង់) និងក្រសួងក្រសួងសេដ្ឋកិច្ច និងហិរញ្ញាវត្ថុលើនីតិវិធីចុះបញ្ជីបំពេញបន្ថែម។

លោក សារិន វណ្ណា បានបន្ថែមថា យោងលើចំណុចដូចបានរៀបរាប់ខាងលើ មន្ទីរ និងរង់ចាំទទួលនូវសំណូមពរ និងសំណើររបស់បងប្អូនម្ចាស់កម្មសិទ្ធិករ ដោយក្តីគោរព និងទទួលស្វាគមន៍ដោយក្តីរីករាយ៕