(កំពង់ធំ)៖ នាព្រឹកថ្ងៃអាទិត្យ ទី១៩ ខែកក្កដា ឆ្នាំ២០២៦ នៅទីស្នាក់ការគណបក្សឃុំទ្រា លោក ផាង វី ប្រធានក្រុមការងារគណបក្សចុះមូលដ្ឋានឃុំទ្រា បានដឹកនាំក្រុមការងារជួបសំណេះសំណាល និងពិភាក្សាការងារជាមួយក្រុមយុវជនក្នុងឃុំទ្រា ស្រុកស្ទោង ខេត្តកំពង់ធំ។ ក្នុងនាមតំណាងរបស់លោក ថោ ជេដ្ឋា លោក ផាង វី បានលើកឡើងពីតួនាទី និងសារៈសំខាន់នៃកម្លាំងយុវជន ដែលជាសសរទ្រូងដ៏រឹងមាំ និងជាកម្លាំងចលករដ៏សកម្មក្នុងការចូលរួមបម្រើប្រជាពលរដ្ឋ និងអភិវឌ្ឍមូលដ្ឋាន។

លោកបានសង្កត់ធ្ងន់លើការអនុវត្តយុទ្ធសាស្ត្រ «ចាស់ស្គាល់ផ្លូវ ក្មេងមានកម្លាំង» ដើម្បីធានាបាននូវប្រសិទ្ធភាពការងារខ្ពស់។

លោកប្រធានក្រុមការងារបានណែនាំដល់សមាជិកបក្ស និងយុវជនទាំងអស់ ឱ្យបន្តពង្រឹងសាមគ្គីភាព និងចុះជិតស្និទ្ធជាមួយប្រជាពលរដ្ឋគ្រប់ពេលវេលា ដើម្បីក្តាប់បាននូវកង្វល់ និងដោះស្រាយបញ្ហាប្រឈមឱ្យបានទាន់ពេលវេលា។

ទន្ទឹមនឹងនេះ លោកបានជំរុញឱ្យគ្រប់សមាជិកទាំងអស់ ត្រៀមលក្ខណៈសម្បត្តិឱ្យបានរឹងមាំ ដើម្បីឆ្ពោះទៅដណ្តើមជ័យជម្នះជូនគណបក្ស សម្រាប់ការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៦ ឆ្នាំ២០២៧ និងការបោះឆ្នោតជ្រើសតាំងតំណាងរាស្ត្រ នីតិកាលទី៨ ឆ្នាំ២០២៨ ខាងមុខ។

នាថ្ងៃដដែល លោកប្រធានក្រុមការងារ និងក្រុមការងារ បានបន្តចុះពិនិត្យវឌ្ឍនភាពការងារស្ថាបនាផ្លូវលំមួយខ្សែ ដែលមានប្រវែង ១ ៣០០ម៉ែត្រ ស្ថិតក្នុងតំបន់អភិវឌ្ឍន៍ឆ្ពោះទៅកាន់វត្តទួលព្រះធាតុ។

ផ្លូវនេះគឺជាអំណោយដ៏ថ្លៃថ្លារបស់ឯកឧត្តមរដ្ឋមន្រ្ដី ថោ ជេដ្ឋា សម្រាប់ជួយសម្រួលដល់ការធ្វើដំណើរ និងការដឹកជញ្ជូនកសិផលរបស់ប្រជាពលរដ្ឋក្នុងមូលដ្ឋាន។

បច្ចុប្បន្ន ការសាងសង់សម្រេចបានលទ្ធផលប្រមាណជាង ៩០% នៃគម្រោងទាំងមូល ហើយក្រុមការងារបានប្តេជ្ញាជំរុញឱ្យការដ្ឋាននេះបញ្ចប់តាមផែនការដែលបានកំណត់ ដើម្បីឆាប់បានដាក់ឱ្យប្រើប្រាស់ជាផ្លូវការ និងបម្រើផលប្រយោជន៍ដល់ប្រជាពលរដ្ឋ។