(ភ្នំពេញ)៖ លោក ស៉ីវ រុន ប្រធានក្រុមប្រឹក្សាខេត្តកំពង់ឆ្នាំង លោក គុយ ចន្ថា សមាជិកក្រុមប្រឹក្សាខេត្ត លោក ឈាង វណ្ណៈ ប្រធានមន្ទីរព័ត៌មានខេត្តកំពង់ឆ្នាំង លោក ស៊ិន សូត្រ ចៅសង្កាត់ប្អេរ និងថ្នាក់ដឹកនាំ អាជ្ញាធរមូលដ្ឋាន ថ្នាក់ដឹកនាំសិប្បកម្មសាប៊ូ BK ដឹកនាំដោយលោក ស្រេង ប៊ូឃាង អគ្គនាយក និងលោក សែម ផល្លា អគ្គនាយករង បានអញ្ជើញចុះចែកអំណោយជូនប្រជាពលរដ្ឋ ដែលមានជីវភាពខ្វះខាតចំនួន ១០គ្រួសារ ស្ថិតនៅសង្កាត់ប្អេរ ក្រុងកំពង់ឆ្នាំង ខេត្តកំពង់ឆ្នាំង។

ក្នុងសកម្មភាពនាថ្ងៃទី១៩ ខែកក្កដា ឆ្នាំ២០២៦ នៅស្នាក់ការគណបក្សប្រជាជនកម្ពុជា សង្កាត់ប្អេរ លោកប្រធានក្រុមប្រឹក្សាខេត្តកំពង់ឆ្នាំង បានលើកឡើងថា សិប្បកម្មសាប៊ូ BK តែងតែបន្តចូលរួមក្នុងសកម្មភាពសប្បុរសធម៌ ដើម្បីចែករំលែកក្តីស្រឡាញ់ លើកទឹកចិត្ត និងសម្រាលទុក្ខលំបាកជូនបងប្អូនប្រជាពលរដ្ឋ ដែលមានជីវភាពខ្វះខាត។ សកម្មភាពនេះឆ្លុះបញ្ចាំងពីការប្តេជ្ញាចិត្តរបស់សិប្បកម្មក្នុងការចូលរួមអភិវឌ្ឍសង្គម និងរួមចំណែកជាមួយសហគមន៍។

ក្នុងឱកាសនេះ តំណាងសិប្បកម្មសាប៊ូ BK បានថ្លែងអំណរគុណយ៉ាងជ្រាលជ្រៅចំពោះថ្នាក់ដឹកនាំ និងអាជ្ញាធរមូលដ្ឋានគ្រប់លំដាប់ថ្នាក់ ដែលបានផ្តល់កិច្ចសហការ និងការគាំទ្រយ៉ាងល្អប្រសើរ ធ្វើឱ្យកម្មវិធីនេះប្រព្រឹត្តទៅដោយរលូន កក់ក្តៅ និងទទួលបានជោគជ័យ៕