ជនជាតិភាគតិច «ជង» និង «ព័រ» នៅពោធិ៍សាត់ ស្នើចុះបញ្ជីដីព្រៃអារក្ស និងដីកប់សព ដើម្បីរក្សាអត្តសញ្ញាណវប្បធម៌
20-07-2026 11:51
(ពោធិ៍សាត់)៖ ជនជាតិភាគតិច «ជង» និង «ព័រ» ដែលរស់នៅក្នុងភូមិតាដេស ឃុំសំរោង ស្រុកភ្នំក្រវាញ ខេត្តពោធិ៍សាត់ បានស្នើសុំដល់រាជរដ្ឋាភិបាល និងអាជ្ញាធរខេត្តឱ្យជួយទទួលស្គាល់ និងចុះបញ្ជីដីព្រៃអារក្ស និងដីកប់សពជាកម្មសិទ្ធិសមូហភាពស្របច្បាប់។
ការស្នើសុំនេះគឺក្នុងគោលបំណងដ៏សំខាន់ ដើម្បីថែរក្សាការពារនូវទំនៀមទម្លាប់ វប្បធម៌ និងជំនឿប្រពៃណីរបស់ពួកគាត់ ដែលបានបន្សល់ទុកតាំងពីបុរាណកាលមក។
បើតាមលោក សារូ វុធ ប្រធានសហគមន៍ដៃគូសំរោង បានបញ្ជាក់ថា ក្នុងសហគមន៍នេះមានជនជាតិជង ៣៥គ្រួសារ និងជនជាតិព័រ ៣០គ្រួសារ ដែលភាគច្រើននៅតែប្រកាន់ខ្ជាប់នូវមុខរបរ និងទំនៀមទម្លាប់បុរាណ គឺការអាស្រ័យផលអនុផលព្រៃឈើ។
លោកថា ជនជាតិដើមភាគតិចរបស់លោកមានបំណងចង់រក្សាដីព្រៃអារក្សមួយកន្លែងឈ្មោះថា ភ្នំព្រអង្គ ដែលមានទំហំ ២៤ហិកតា និងដីព្រៃកប់សពមួយកន្លែងទៀតទំហំ ៤ហិកតា។ ការចុះបញ្ជីជាផ្លូវការនេះ នឹងជួយការពារតំបន់ទាំងនេះពីការរំលោភបំពាន ព្រមទាំងរក្សាបាននូវអត្តសញ្ញាណវប្បធម៌ និងធនធានធម្មជាតិឱ្យគង់វង្សយូរអង្វែង។
ចំពោះលោក សន សារឿន មេភូមិតាដេស បានបន្ថែមថា តំបន់ដីព្រៃអារក្ស និងដីកប់សពទាំងពីរនេះ គឺជាទីតាំងបុរាណកាលសម្រាប់ជនជាតិដើមភាគតិចព័រ និងជង ធ្វើការគោរពបូជាតាមបែបប្រពៃណីទាំងអរូបីយ (ការបន់ស្រន់ សែនព្រេន) និងរូបបីយ (ទីកន្លែងសម្រាប់បន់ស្រន់)។
ដោយឡែកលោក ទូច សុផានី ប្រធានគម្រោងអភិវឌ្ឍន៍សហគមន៍ នៃអង្គការសម្ព័ន្ធមិត្តសត្វព្រៃ (Wildlife Alliance) ក៏បានគាំទ្រ និងកំពុងជួយដល់ប្រជាសហគមន៍ ដើម្បីឱ្យពួកគាត់មានសិទ្ធិប្រើប្រាស់ និងគោរពបូជាជំនឿដូនតា។
ពាក់ព័ន្ធនឹងសំណើនេះ លោក ខ្វៃ អាទិត្យា អនុរដ្ឋលេខាធិការ និងជាអ្នកនាំពាក្យក្រសួងបរិស្ថាន បានចុះពិនិត្យដោយផ្ទាល់ កាលពីថ្ងៃទី១៧ ខែកក្កដា ឆ្នាំ២០២៦ ហើយបានឱ្យដឹថា ក្រសួងនឹងខិតខំចូលរួមធ្វើយ៉ាងណាឱ្យតំបន់ទាំងនេះកំណត់ទីតាំងបានច្បាស់លាស់សម្រាប់បម្រើផលប្រយោជន៍សហគមន៍មូលដ្ឋាន។
អ្នកនាំពាក្យក្រសួងបរិស្ថាន សង្ឃឹមថា តំបន់ទាំងនេះនឹងក្លាយជាប្រយោជន៍សម្រាប់សហគមន៍ ក៏ដូចជាសេដ្ឋកិច្ចប្រទេសជាតិ តាមរយៈការទាក់ទាញវិស័យទេសចរណ៍ប្រកបដោយសក្តានុពល។ ការទទួលស្គាល់ និងចុះបញ្ជីដីទាំងនេះ មិនត្រឹមតែជាការគោរពដល់ទំនៀមទម្លាប់ប្រពៃណីប៉ុណ្ណោះទេ ថែមទាំងជាការរួមចំណែកដល់ការអភិវឌ្ឍសហគមន៍ និងការអភិរក្សធនធានធម្មជាតិផងដែរ៕
