(កណ្តាល)៖ លោក ស៊ុយ ឆៃលាង ប្រធានក្រុមការងារចលនាកសាងសមាជិកគណបក្សមូលដ្ឋានខេត្តកណ្តាល កាលពីថ្ងៃអាទិត្យ ទី១៩ ខែកក្កដា ឆ្នាំ២០២៦ បានអញ្ជើញចូលរួមក្នុងពិធីសំណេះសំណាល និងលើកស្លាកគណបក្សប្រជាជនកម្ពុជានៅភូមិព្រៃទម្លាប់ ឃុំបែកចាន ស្រុកអង្គស្នួល ខេត្តកណ្តាល។ ពិធីនេះមានការចូលរួមពីថ្នាក់ដឹកនាំ និងសមាជិកគណបក្សជាច្រើនរូប។

ក្នុងឱកាសនោះ លោក ស៊ុយ ឆៃលាង បានពាំនាំនូវការសួរសុខទុក្ខពីសម្ដេចតេជោ ហ៊ុន សែន ប្រធានគណបក្សប្រជាជនកម្ពុជា និងជាប្រធានព្រឹទ្ធសភា ព្រមទាំងការផ្តាំផ្ញើសួរសុខទុក្ខពីលោក គួច ចំរើន និងលោក នូ សាខន។ លោកបានថ្លែងអំណរគុណដល់កងកម្លាំងប្រដាប់អាវុធដែលបានពលីជីវិត និងបន្តការពារជាតិមាតុភូមិ ធ្វើឱ្យប្រជាពលរដ្ឋអាចរស់នៅប្រកបមុខរបរដោយសុខសន្តិភាព។

លោកបានសង្កត់ធ្ងន់ថា ក្រោមមាគ៌ាដឹកនាំរបស់គណបក្សប្រជាជនកម្ពុជា ដែលមានសម្ដេចតេជោ ហ៊ុន សែន ជាប្រមុខដឹកនាំដ៏ឆ្នើម ប្រទេសជាតិមានការរីកចម្រើន ឈានឡើង និងកាត់បន្ថយភាពក្រីក្ររបស់ប្រជាពលរដ្ឋ។ លោកបានប្រៀបធៀបគណបក្សប្រជាជនកម្ពុជាទៅនឹង «ជំរំទេវតា» ដែលផ្តល់ភាពកក់ក្តៅ សុវត្ថិភាព និងសាមគ្គីភាពដល់សមាជិកទាំងអស់។

លោក ស៊ុយ ឆៃលាង ក៏បានរំលឹកដល់សមាជិកថ្មីចាស់ឱ្យចងចាំថ្ងៃកំណើតគណបក្ស២៨ មិថុនា ឆ្នាំ១៩៥១ និងថ្ងៃ៧ មករា ឆ្នាំ១៩៧៩ ដែលជាថ្ងៃរំដោះប្រទេសចេញពីរបបប្រល័យពូជសាសន៍។

លោកបានអំពាវនាវឱ្យប្រជាពលរដ្ឋបន្តគាំទ្រ និងបោះឆ្នោតជូនគណបក្សប្រជាជនកម្ពុជា នៅឆ្នាំ២០២៧ និងឆ្នាំ២០២៨ ខាងមុខ ព្រមទាំងជំរុញឱ្យយុវជនចូលរួមចំណែកកសាង និងការពារមាតុភូមិ តាមរយៈការអនុវត្តច្បាប់ស្តីពីកាតព្វកិច្ចយោធា និងការចូលរួមអភិវឌ្ឍសង្គម។

លោកក៏បានលើកឡើងពីយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលអាណត្តិទី៧ ដើម្បីសម្រេចចក្ខុវិស័យកម្ពុជាជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងចំណូលខ្ពស់នៅឆ្នាំ២០៥០។

ជាចុងក្រោយ លោកបានអំពាវនាវឱ្យប្រជាពលរដ្ឋខ្មែរមានជំនឿទុកចិត្តលើរាជរដ្ឋាភិបាលក្នុងការការពារអធិបតេយ្យភាពជាតិ និងរួមសាមគ្គីគ្នាដើម្បីសន្តិភាព និងការអភិវឌ្ឍប្រកបដោយចីរភាព៕