អង្គការសង្គមស៊ីវិលក្នុងខេត្តក្រចេះ បានវាយតម្លៃខ្ពស់ចំពោះកិច្ចខិតខំប្រឹងប្រែងរបស់រាជរដ្ឋាភិបាលក្នុងការកសាង សង្គមឌីជីថលកម្ពុជា និងប្ដេជ្ញាចិត្ដចូលរួមទប់ស្កាត់ព័ត៌មានក្លែងក្លាយនិងការឆបោកតាមអនឡាញក្នុងសហគមន៍
20-07-2026 13:37
(ក្រចេះ)៖ វេទិកាសម្ព័ន្ធសង្គមស៊ីវិល (វ.ស.ស.) នៃទីស្តីការគណៈរដ្ឋមន្ត្រី បានសហការជាមួយរដ្ឋបាលខេត្តក្រចេះ រៀបចំវេទិកាសន្ទនា ក្រោមប្រធានបទស្ដីពី «ការពង្រឹងសមត្ថភាពអង្គការសង្គមស៊ីវិលក្នុងយុគសម័យឌីជីថល» នៅព្រឹកថ្ងៃទី២០ ខែកក្កដា ឆ្នាំ២០២៦ នៅក្រុងក្រចេះ។ វេទិកាសន្ទនានេះបានប្រព្រឹត្ដទៅក្រោមអធិបតីភាពឯកឧត្តម ប៉ៃ សំបូរ អគ្គលេខាធិការនៃអគ្គលេខាធិការដ្ឋាន វ.ស.ស. និងជាតំណាងដ៏ខ្ពង់ខ្ពស់ឯកឧត្តម កឹមរ័ត្ន វិសិដ្ឋ នាយករងខុទ្ទកាល័យសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា និងជាប្រធានក្រុមប្រឹក្សាភិបាល វ.ស.ស. និងឯកឧត្តម ដួង ពៅ អភិបាលរងនៃគណៈអភិបាលខេត្តក្រចេះ តំណាងដ៏ខ្ពង់ខ្ពស់ឯកឧត្តម វ៉ា ថន អភិបាលនៃគណៈអភិបាលខេត្តក្រចេះ ដោយមានការអញ្ជើញចូលរួមពីអង្គការសង្គមស៊ីវិលក្នុងខេត្តក្រចេះ និងអាជ្ញាធរមូលដ្ឋានជាច្រើននាក់។
ថ្លែងក្នុងអង្គវេទិកាសន្ទនានាព្រឹកនេះ ឯកឧត្តម ប៉ៃ សំបូរ បានលើកបង្ហាញអំពីបេសកកម្មរបស់ វ.ស.ស. ដែលជាអង្គភាពមួយរបស់ទីស្ដីការគណៈរដ្ឋមន្ដ្រីក្នុងការសម្របសម្រួល និងបង្កើនកិច្ចសហប្រតិបត្ដិការរវាងអង្គការសង្គមស៊ីវិលជាមួយរាជរដ្ឋាភិបាលនិងរដ្ឋបាលថ្នាក់ក្រោមជាតិ ដើម្បីកសាងសុខដុមនីយកម្មសង្គមស៊ីវិលនៅកម្ពុជា។ ទន្ទឹមនឹងនេះ ឯកឧត្តមបានគូសបញ្ជាក់អំពីកិច្ចខិតខំរបស់រាជរដ្ឋាភិបាល នីតិកាលទី៧ នៃរដ្ឋសភា ក្រោមការដឹកនាំប្រកបដោយគតិបណ្ឌិតនិងថាមវន្ដរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្នុងការកសាងរដ្ឋាភិបាលឌីជីថលដោយឈរលើសសរស្ដម្ភចំនួន ៣ គឺពលរដ្ឋឌីជីថល រដ្ឋាភិបាលឌីជីថល និងធុរកិច្ចឌីជីថល ដើម្បីលើកកម្ពស់ការបម្រើសេវាសាធារណៈឱ្យកាន់តែល្អប្រសើរ។ ឯកឧត្ដមក៏បានបញ្ជាក់សាជាថ្មីអំពីការយកចិត្ដទុកដាក់ខ្ពស់របស់រាជរដ្ឋាភិបាលចំពោះអង្គការសង្គមស៊ីវិល ដែលតែងតែចាត់ទុកអង្គការសង្គមស៊ីវិល គឺជាដៃគូអភិវឌ្ឍន៍សង្គម-សេដ្ឋកិច្ច ដែលមិនអាចខ្វះបាន។ ឯកឧត្តមបានសង្កត់ធ្ងន់ថា ការរួមចំណែកយ៉ាងសកម្មរបស់អង្គការសង្គមស៊ីវិលនាពេលកន្លងមក ពិតជាបានចូលរួមយ៉ាងសំខាន់ដល់ការអភិវឌ្ឍមូលដ្ឋាន រួមទាំងការលើកកម្ពស់សុខុមាលភាពនិងជីវភាពរស់នៅរបស់ប្រជាពលរដ្ឋប្រកបដោយបរិយាបន្ន។ ឯកឧត្តមក៏បានថ្លែងនូវការកោតសរសើរនិងវាយតម្លៃខ្ពស់ចំពោះកិច្ចសហប្រតិបត្តិការយ៉ាងជិតស្និទ្ធជាមួយអាជ្ញាធរមូលដ្ឋានក្នុងខេត្តក្រចេះ និងការចូលរួមចំណែកយ៉ាងធំធេងរបស់អង្គការសង្គមស៊ីវិលក្នុងការអភិវឌ្ឍមូលដ្ឋាននាពេលកន្លងមក។ ឯកឧត្តមក៏បានលើកទឹកចិត្តឱ្យអង្គការសង្គមស៊ីវិលធ្វើការផ្សព្វផ្សាយក្នុងមូលដ្ឋាន ដើម្បីជំរុញឱ្យប្រជាជនបញ្ជូនកូនៗទៅសិក្សាវគ្គជំនាញវិជ្ជាជីវៈរយៈពេលខ្លីនៅវិទ្យាស្ថាន TVET ខេត្តក្រចេះ ដើម្បីពង្រឹងសមត្ថភាពនិងស្វែងរកការងារធ្វើនៅតាមរោងចក្រនៅក្នុងមូលដ្ឋានខេត្តនេះ ដែលអាចចូលរួមចំណែកដល់ការកាត់បន្ថយចំណាកស្រុកនិងលើកកម្ពស់ជីវភាពរស់នៅកាន់តែល្អប្រសើរ។
ជាមួយគ្នានេះ ឯកឧត្តម ដួង ពៅ អភិបាលរងនៃគណៈអភិបាលខេត្តក្រចេះ ក៏បានថ្លែងនូវការកោតសរសើរនិងវាយតម្លៃខ្ពស់ចំពោះការចូលរួមចំណែកយ៉ាងសកម្មរបស់អង្គការសង្គមស៊ីវិល ក្នុងការអភិវឌ្ឍខេត្តក្រចេះឱ្យកាន់តែរីកចម្រើន។ ឯកឧត្តមបានលើកទឹកចិត្តឱ្យអង្គការសង្គមស៊ីវិលនិងដៃគូអភិវឌ្ឍន៍ទាំងអស់ បន្តគាំទ្រនិងចូលរួមដោយស្មោះត្រង់ ក្នុងភាពជាដៃគូជាមួយរដ្ឋបាលខេត្តក្រចេះ ក្នុងដំណើរការលើកកម្ពស់លទ្ធិប្រជាធិបតេយ្យនិងនីតិរដ្ឋ និងការចូលរួមទប់ស្កាត់បទល្មើសធនធានធម្មជាតិនិងបទល្មើសនេសាទ ដើម្បីពង្រឹងនូវសុខសន្តិភាព ស្ថិរភាពសង្គម និងការអភិវឌ្ឍសង្គមសេដ្ឋកិច្ចឱ្យកាន់តែរីកចម្រើនថែមទៀត។ ឯកឧត្តមក៏បានជំរុញឱ្យអង្គការសង្គមស៊ីវិលបន្តចូលរួមសហការជាមួយអាជ្ញាធរមូលដ្ឋានក្នុងការអនុវត្តគោលនយោបាយភូមិ-ឃុំ-សង្កាត់មានសុវត្ថិភាព និងទប់ស្កាត់ការឆបោកតាមប្រព័ន្ធបច្ចេកវិទ្យាក្នុងមូលដ្ឋាន តាមរយៈសកម្មភាពឃ្លាំមើលនិងរាយការណ៍អំពីទីតាំងដែលសង្ស័យ។
ក្នុងឱកាសនេះដែរ តំណាងអង្គការសង្គមស៊ីវិលក្នុងខេត្តក្រចេះបានលើកឡើងនូវបញ្ហាប្រឈមនិងសំណូមពរមកជជែកពិភាក្សាដោយត្រង់ទៅត្រង់មកយ៉ាងផុសផុលក្នុងអង្គវេទិកាសន្ទនានាព្រឹកនេះ។ ជាលទ្ធផល បញ្ហាប្រឈមនិងសំណូមពរមួយចំនួន ត្រូវបានដោះស្រាយជាក់ស្តែងក្នុងកិច្ចពិភាក្សាដោយផ្ទាល់ ហើយបញ្ហាដែលសេសសល់មួយចំនួនទៀត នឹងត្រូវយកទៅពិភាក្សាជាមួយអាជ្ញាធរនិងសមត្ថកិច្ចពាក់ព័ន្ធ ដើម្បីរួមគ្នាស្វែងរកដំណោះស្រាយ។
វ.ស.ស. បានសម្របសម្រួលរៀបចំឱ្យមានបទបង្ហាញស្តីពី «ការយល់ដឹងអំពីអក្ខរកម្មឌីជីថល និងសុវត្ថិភាពតាមប្រព័ន្ធបច្ចេកវិទ្យាសម្រាប់អង្គការសង្គមស៊ីវិល» ដោយលោក ទ្រី វិទូ ប្រធានដេប៉ាតឺម៉ង់ពាណិជ្ជកម្មអេឡិចត្រូនិកនៃបណ្ឌិត្យសភាបច្ចេកវិទ្យាឌីជីថលកម្ពុជា ដើម្បីផ្សព្វផ្សាយនិងលើកកម្ពស់បរិវត្តកម្មឌីជីថលនិងការយល់ដឹងអំពីគោលនយោបាយសេដ្ឋកិច្ចនិងសង្គមឌីជីថលកម្ពុជា ២០២១-២០៣៥៕
