មន្ត្រីជាន់ខ្ពស់ក្រសួងអភិវឌ្ឍន៍ជនបទ ចុះពិនិត្យវាយតម្លៃផ្លូវ ៩ខ្សែនៅខេត្តព្រៃវែង ដើម្បីធ្វើការថែទាំឱ្យមានគុណភាពល្អធ្វើដំណើរបានស្រួល
20-07-2026 14:45
(ព្រៃវែង)៖ លោកស្រី ឯក គន្ធវារី អនុរដ្ឋលេខាធិការ តំណាងដ៏ខ្ពង់ខ្ពស់លោក ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ អមដំណើរដោយលោក ឈន សេដ្ឋា អនុរដ្ឋលេខាធិការ នៅថ្ងៃទី២០ ខែកក្កដា ឆ្នាំ២០២៦ បានអញ្ជើញដឹកនាំគណៈកម្មការអន្តរក្រសួង ចុះត្រួតពិនិត្យវាយតម្លៃដំណាក់កាលទី១ លើផ្លូវក្រាលកៅស៊ូពីរជាន់ (DBST) ចំនួន៩ខ្សែ នៅតាមបណ្ដាក្រុងស្រុកមួយចំនួន ក្នុងខេត្តព្រៃវែង ដើម្បីធ្វើការថែទាំផ្លូវជាប្រចាំ ហើយផ្លូវមានគុណភាពល្អ ប្រជាពលរដ្ឋធ្វើដំណើរ និងដឹកកសិផលបានស្រួល។
សម្រាប់ផ្លូវទាំង៩ខ្សែនោះមានប្រវែងជាង ៩០គីឡូម៉ែត្រ ដែលស្ថិតក្នុងស្រុកព្រះស្ដេច ស្រុកកំពង់ត្របែក ស្រុកបាភ្នំ ស្រុកមេសាង ស្រុកពោធិ៍រៀង ស្រុកស្វាយអន្ទរ ស្រុកកញ្ច្រៀច និងក្រុងព្រៃវែង ដែលផ្លូវទាំងអស់នេះ អនុវត្តស្ថាបនាដោយនាយកដ្ឋានអភិវឌ្ឍន៍ជនបទ ហេដ្ឋារចនាសម្ព័ន្ធផ្លូវជនបទ។
ក្នុងឱកាសតំណាងលោករដ្ឋមន្ត្រី ឆាយ ឫទ្ធិសែន, លោកស្រី ឯក គន្ធវារី មានប្រសាសន៍ថា រាជរដ្ឋាភិបាល បាននឹងកំពុងខិតខំអភិវឌ្ឍន៍ប្រទេសជាតិ លើគ្រប់វិស័យឱ្យកាន់តែមានភាពរីកចម្រើន ដោយបានដាក់ចេញនូវយុទ្ធសាស្ត្របញ្ចកោណ ដំណាក់កាលទី១ ដែលកំណត់អាទិភាពគន្លឹះ៥ រួមមាន មនុស្ស ផ្លូវ ទឹក ភ្លើង និងបច្ចេកវិទ្យាឌីជីថល ជាបាវចនា ដើម្បីកំណើនការងារ សមធម៌ ប្រសិទ្ធភាព និងចីរភាព។
លោកស្រីបានបន្តថា ទន្ទឹមនេះក្រសួងអភិវឌ្ឍន៍ជនបទ កំពុងពន្លឿនកិច្ចអភិវឌ្ឍន៍ និងជំរុញការអនុវត្តនូវយុទ្ធសាស្ដ្រសំខាន់ៗរួមមាន៖
* ទី១៖ អភិវឌ្ឍហេដ្ឋារចនាសម្ព័ន្ធរូបវន្ត និងគមនាគមន៍ជនបទប្រទាក់ក្រឡា ខិតខំលើកកម្ពស់កម្រិតគុណភាពផ្លូវពីផ្លូវដីស និងផ្លូវដីល្បាយក្រួស ទៅជាផ្លូវក្រាលកៅស៊ូពីរជាន់ និងផ្លូវបេតុង
* ទី២៖ លើកកម្ពស់ការទទួលបានទឹកស្អាត និងអនាម័យបរិស្ថានជនបទ តាមរយៈជំរុញអត្រាគ្របដណ្ដប់ នៃការផ្គត់ផ្គង់ទឹកស្អាត និងអនាម័យជនបទ ១០០%
* ទី៣៖ ការជំរុញអភិវឌ្ឍសហគមន៍ជនបទ និងចលនាភូមិគំរូ តាមរយៈការជំរុញអភិវឌ្ឍសហគមន៍ជនបទ និងចលនាភូមិគំរូ ដែលជាការអភិវឌ្ឍភូមិចម្រុះឱ្យប្រែក្លាយទៅជាភូមិគំរូ
* ទី៤៖ លើកកម្ពស់ការធ្វើពិពិធកម្មសេដ្ឋកិច្ចជនបទ តាមរយៈការបណ្តុះបណ្តាលជំនាញមូលដ្ឋានបំណិនជីវិត
និងទី៥៖ ការពង្រឹងស្ថាប័ន និងកិច្ចការតាមរយៈបណ្ដុះបណ្ដាល ពង្រឹងសមត្ថភាពមន្ដ្រីរាជការគ្រប់លំដាប់ថ្នាក់, ការរៀបចំនូវសណ្ដាប់ធ្នាប់ និងការពង្រឹងសាមគ្គីភាព ដើម្បីចូលរួមចំណែកអនុវត្តការងារប្រកបដោយប្រសិទ្ធភាព និងការទទួលខុសត្រូវ។
ជាមួយនេះ លោកស្រី ឯក គន្ធវារី និងក្រុមការងារអន្តរក្រសួង ជាពិសេសនៅក្នុងរដូវវស្សានេះបានស្នើអាជ្ញាធរមូលដ្ឋានទប់ស្កាត់ នូវការដឹកលើសទម្ងន់ ដែលធ្វើឱ្យផ្លូវឆាប់រងការខូចខាត អំពាវនាវដល់ពលរដ្ឋ ដែលរស់នៅអមសងខាងផ្លូវ និងអ្នកធ្វើដំណើរពីទីកន្លែងនានា សូមចូលរួមថែទាំ ដើម្បីធានាថាអាចប្រើប្រាស់បានយូរអង្វែង៕
