(កំពង់ឆ្នាំង)៖ នៅមន្ទីរពេទ្យបង្អែកខេត្តកំពង់ឆ្នាំង កាលពីព្រឹកថ្ងៃទី១៨ ខែកក្កដា ឆ្នាំ២០២៦ មានកម្មវិធីពិនិត្យព្យាបាលជំងឺភ្នែក និងចែកវ៉ែនតាជូនដល់ប្រជាពលរដ្ឋដោយឥតគិតថ្លៃ។ កម្មវិធីនេះគឺជាកិច្ចសហការរវាងមន្ទីរពេទ្យ ខេត្តកំពង់ឆ្នាំង មន្ទីរពេទ្យព្រះអង្គឌួងរាជធានីភ្នំពេញ ជាមួយនឹងមូលនិធិ (ហ្វ្រេដហូឡូ)។ កម្មវិធីនេះមានគោលបំណងផ្ដល់ការពិនិត្យ និងព្យាបាលជំងឺភ្នែកដោយឥតគិតថ្លៃជូនប្រជាពលរដ្ឋដែលអញ្ជើញ មកទទួលសេវាពិនិត្យព្យាបាលទូទាំងខេត្តមានចំនួន ២០,០០០នាក់។

កម្មវិធីនេះមានការអញ្ជើញចូលរួមពីលោក ម៉ឹង វុធី អភិបាលរងខេត្តកំពង់ឆ្នាំង តំណាងលោក ស៊ុន សុវណ្ណារិទ្ធិ អភិបាលខេត្ត, លោក ប្រាក់ វ៉ុន ប្រធានមន្ទីរសុខាភិបាលខេត្តកំពង់ឆ្នាំង, លោកវេជ្ជបណ្ឌិត បាក់ តូក្យូ នាយកមូលនិធិ (ហ្វ្រេដហូឡូ), លោកវេជ្ជបណ្ឌិត ទុំ សម្បត្តិ ប្រធានមន្ទីរពេទ្យខេត្តកំពង់ឆ្នាំង, និងលោកសាស្ត្រាចារ្យ វេជ្ជបណ្ឌិត លោក-លោកស្រី បុគ្គលិកមន្ទីរសុខាភិបាល និងប្រជាពលរដ្ឋចូលរួមយ៉ាងច្រើនកុះករផងដែរ។

ក្នុងឱកាសនោះ លោកវេជ្ជបណ្ឌិត ប្រាក់ វ៉ុន ប្រធានមន្ទីរសុខាភិបាលខេត្តកំពង់ឆ្នាំង បានលើកឡើងថា ដោយមានការណែនាំពីលោក ស៊ុន សុវណ្ណារិទ្ធិ អភិបាលខេត្តកំពង់ឆ្នាំង ដើម្បីរៀបចំកម្មវិធីមនុស្សធម៌ផ្នែកសុខាភិបាល ជូនប្រជាពលរដ្ឋក្នុងខេត្តកំពង់ឆ្នាំងរបស់យើង ដូច្នេះនៅថ្ងៃនេះផងដែរ នៅក្នុងមន្ទីរពេទ្យខេត្តកំពង់ឆ្នាំង ក៏បានរៀបចំកម្មវិធីពិនិត្យ និងព្យាបាលជំងឺភ្នែកដោយឥតគិតថ្លៃជូនបងប្អូនប្រជាពលរដ្ឋនៅក្នុងខេត្តរបស់យើង តាមការណែនាំរបស់លោកអភិបាលខេត្ត។ កម្មវិធីនេះ មន្ទីរពេទ្យបង្អែកខេត្ត ក៏តែងតែបានសហការជាមួយមន្ទីរពេទ្យព្រះអង្គឌួង រៀបចំកម្មវិធីពិនិត្យសុខភាពភ្នែក និងចែកវ៉ែនតាដោយឥតគិតថ្លៃជូនប្រជាពលរដ្ឋជាបន្តបន្ទាប់ ក្នុងគោលបំណងជួយកាត់បន្ថយបន្ទុកជីវភាពរបស់ប្រជាពលរដ្ឋ។ ដោយឡែកថ្ងៃនេះ មន្ទីរពេទ្យបង្អែកខេត្តកំពង់ឆ្នាំង មន្ទីរពេទ្យព្រះអង្គឌួងរាជធានីភ្នំពេញ និងដោយមានការចូលរួមពីមូលនិធិ (ហ្វ្រេដហូឡូ) បានរៀបចំកម្មវិធីពិនិត្យ និងព្យាបាលជំងឺភ្នែក និងចែកវ៉ែនតាជូនប្រជាពលរដ្ឋដោយឥតគិតថ្លៃចំនួន ២០,០០០នាក់ផងដែរ។

លោកវេជ្ជបណ្ឌិតបានឲ្យដឹងទៀតថា ភ្នែកជាសរីរាង្គដ៏សំខាន់ ដែលការបាត់បង់គំហើញ មិនត្រឹមតែប៉ះពាល់ដល់ជីវភាពប្រចាំថ្ងៃប៉ុណ្ណោះទេ ថែមទាំងបានប៉ះពាល់ដល់សេដ្ឋកិច្ចគ្រួសារទៀតផង។ កម្មវិធីនេះគឺមានបំណងនាំមកនូវពន្លឺ និងស្នាមញញឹមឡើងវិញជូនប្រជាពលរដ្ឋ។

លោកវេជ្ជបណ្ឌិតបានបញ្ជាក់ថា រយៈពេល ១ឆមាសឆ្នាំ២០២៦កន្លងមក ក្រុមការងារមន្ទីរសុខាភិបាលខេត្តកំពង់ឆ្នាំង បានចុះធ្វើការអប់រំ ពិនិត្យ និងវាស់វ៉ែនតា ព្រមទាំងផ្ដល់វ៉ែនតាជូនប្រជាពលរដ្ឋបានចំនួន២៨លើក ដែលគិតជាចំនួនប្រជាពលរដ្ឋប្រមាណជាង៤ពាន់នាក់ និងបានបញ្ជូនអ្នកជំងឺមកមន្ទីរពេទ្យប្រមាណជិត៨០០នាក់។ បន្ថែមពីលើនេះទៀត មន្ទីរសុខាភិបាលខេត្តកំពង់ឆ្នាំងក៏បានចែកវ៉ែនតាមើលជិត សរុបប្រមាណជាង៨ពាន់ដើម ដែលពលរដ្ឋបានទៅពិនិត្យនៅតាមមណ្ឌលសុខភាព និងបានបោះជាជំរំក្នុងការទទួលសេវាព្យាបាលចំនួន២លើក នៅមន្ទីរពេទ្យបរិបូរណ៍ និងកំពង់ត្រឡាច ដែលមានពលរដ្ឋមកទទួលសេវាពិនិត្យព្យាបាលជាង៦០០នាក់ និងអ្នកវះកាត់ព្យាបាលភ្នែកជិត៥០០នាក់ផងដែរ។

លោកវេជ្ជបណ្ឌិតបានបញ្ជាក់ទៀតថា ជាមួយនឹងអត្រាពិការភ្នែក និងការថយចុះនៃគំហើញនៅតែខ្ពស់ ជាពិសេសនៅក្នុងចំណោមប្រជាពលរដ្ឋដែលមានវ័យចាស់ ក្នុងនោះជំងឺបាយភ្នែកក៏នៅតែជាមូលហេតុចម្បងផងដែរ។ លោកវេជ្ជបណ្ឌិតមានជំនឿយ៉ាងមុតមាំថា កម្មវិធីដូចថ្ងៃនេះ គឺជាជំហានដ៏សំខាន់មួយនៅក្នុងការអនុវត្តផែនការយុទ្ធសាស្ត្រជាតិ ឆ្នាំ២០២១-២០៣០ សម្រាប់ការការពារ និងលុបបំបាត់ការពិការភ្នែកនៅកម្រិតមូលដ្ឋាន និងកម្រិតជាតិ។ មន្ទីរសុខាភិបាលខេត្ត ក៏កំពុងព្យាយាមដោះស្រាយបញ្ហាទាំងអស់នេះ តាមកិច្ចសហប្រតិបត្តិការជាមួយមន្ទីរពេទ្យព្រះអង្គឌួង និងដៃគូអភិវឌ្ឍន៍នានា សំដៅការកាត់បន្ថយភាពពិការភ្នែកឲ្យមានប្រសិទ្ធភាព។

លោក ម៉ឹង វុធី អភិបាលរងខេត្តកំពង់ឆ្នាំង ក៏បានថ្លែងអំណរគុណក្រុមគ្រូពេទ្យព្រះអង្គឌួង និងមូលនិធិ (ហ្វ្រេដហូឡូ) ដែលបានខិតខំយកចិត្តទុកដាក់ព្យាបាលជំងឺភ្នែកជូនប្រជាពលរដ្ឋក្នុងខេត្តកំពង់ឆ្នាំងចំនួនជាង២០,០០០នាក់ ដោយឥតគិតថ្លៃនាថ្ងៃនេះ។ លោកអភិបាលរងខេត្តក៏បានមានប្រសាសន៍លើកឡើងដែរថា ជាការពិតណាស់ភ្នែកគឺជាសរីរាង្គដ៏សំខាន់មួយដែលជួយឲ្យយើងមើលឃើញពិភពលោកជុំវិញខ្លួន ដូច្នេះការថែទាំភ្នែកឲ្យបានល្អគឺពិតជាចាំបាច់ណាស់សម្រាប់យើងគ្រប់គ្នា។ ការពិនិត្យ និងថែទាំភ្នែកជាប្រចាំឲ្យបានត្រឹមត្រូវ គឺជាគន្លឹះដើម្បីរក្សាភ្នែករបស់យើងឲ្យមានសុខភាពល្អ និងមើលឃើញច្បាស់បានយូរអង្វែង។

លោកអភិបាលរងខេត្ត ក៏បានសង្កត់ធ្ងន់លើសារៈសំខាន់នៃការថែទាំភ្នែកឲ្យបានល្អជាប្រចាំសម្រាប់ប្រជាពលរដ្ឋទាំងអស់គ្នា ដើម្បីធានាបាននូវសុខភាពភ្នែកល្អ និងបង្ការបញ្ហាផ្សេងៗ។ កាលណាភ្នែករបស់យើងមានសុខភាពល្អ អាចឲ្យយើងបំពេញការងារប្រចាំថ្ងៃបានយ៉ាងងាយស្រួល ទាំងការរៀនសូត្រ ធ្វើការ និងចូលរួមក្នុងសកម្មភាពសង្គមផ្សេងៗ ដែលទាំងអស់នេះជាការរួមចំណែកយ៉ាងសំខាន់ក្នុងការលើកកម្ពស់គុណភាពជីវិត និងបង្កើនជីវភាពរស់នៅរបស់យើងទាំងអស់គ្នា៕