(កំពង់ចាម)៖ អ្នកនាំពាក្យរដ្ឋបាលខេត្តកំពង់ចាម បានធ្វើផ្ដាំផ្ញើឲ្យយុវជន ជាអ្នកប្រើប្រាស់បណ្តាញទំនាក់ទំនងសង្គមទាំងអស់ ត្រូវមានស្មារតីទទួលខុសត្រូវខ្ពស់ក្នុងការទទួល និងចែករំលែកព័ត៌មាន ដើម្បីរួមគ្នាកសាងបរិយាកាសឌីជីថលមួយដែលមានសុវត្ថិភាព និងទំនុកចិត្ត។

លោក ស្រី សុភ័ក្ត្រ អភិបាលរងខេត្តកំពង់ចាម និងជាអ្នកនាំពាក្យរដ្ឋបាលខេត្ត បានផ្ដាំផ្សារដូច្នេះ ខណៈពេលដែលលោក និងលោក ជា ក្រូច អនុរដ្ឋលេខាធិការក្រសួងព័ត៌មាន អញ្ជើញចូលរួមក្នុងយុទ្ធនាការ «និយាយថាទេចំពោះព័ត៌មានក្លែងក្លាយ» (Say NO to Fake News) ជំហានទី២ ក្រោមប្រធានបទ «ពង្រឹងអក្ខរកម្មព័ត៌មាន និងប្រព័ន្ធផ្សព្វផ្សាយដើម្បីសុវត្ថិភាពព័ត៌មាន» នាព្រឹកថ្ងៃទី២០ ខែកក្កដា ឆ្នាំ២០២៦ នៅវិទ្យាល័យ ហ៊ុន សែន ស្ទឹងត្រង់។

លោក ស្រី សុភ័ក្ត្រ បានគូសបញ្ជាក់ថា ក្នុងយុគសម័យបច្ចេកវិទ្យាដ៏ទំនើប ប្រជាពលរដ្ឋម្នាក់ៗ មិនត្រឹមតែជាអ្នកទទួលព័ត៌មាននោះទេ ប៉ុន្តែក៏អាចក្លាយជាអ្នកផ្សព្វផ្សាយព័ត៌មានម្នាក់ផងដែរ។ ដូច្នេះ ការប្រើប្រាស់បណ្តាញសង្គម ប្រកបដោយការទទួលខុសត្រូវ គឺជាកត្តាកំណត់ក្នុងការកាត់ផ្តាច់ខ្សែចង្វាក់ នៃការរីករាលដាលនៃព័ត៌មានមិនពិត ជៀសវាងការ Share, Like ឬ Comment លើខ្លឹមសារណាដែលមានប្រភពមិនច្បាស់លាស់ ជារឿងចៃដន្យ ឬជាការប្រឌិតដើម្បីទាក់ទាញការចាប់អារម្មណ៍។

អ្នកនាំពាក្យរដ្ឋបាលខេត្តកំពង់ចាម ក៏បានណែនាំ ត្រូវផ្ទៀងផ្ទាត់ប្រភពព័ត៌មានឱ្យបានច្បាស់លាស់ ជៀសវាងការចែករំលែកបន្តទាំងអារម្មណ៍ឆេវឆាវ ឬខ្វះការពិចារណា។ ត្រូវដឹងថាព័ត៌មានក្លែងក្លាយតែមួយជួរ ឬរូបភាពកាត់តមួយសន្លឹក អាចបំផ្លាញកិត្តិយសបុគ្គល និងបង្កើតភាពវឹកវរក្នុងសង្គម៕