(បន្ទាយមានជ័យ)៖ កាលពីវេលាម៉ោង១០និង១០នាទី ថ្ងៃទី១៨ ខែកក្កដា ឆ្នាំ២០២៦ កម្លាំងមូលដ្ឋានកងរាជអាវុធហត្ថស្រុកម៉ាឡៃ បានទទួលបណ្តឹងពីតំណាងក្រុមហ៊ុនប៉ាងណាគ្រី ស្តីពីករណីប៉ុនប៉ងលួចសម្ភារៈក្រុមហ៊ុន ដែលប្រព្រឹត្តនៅចំណុចក្រុមហ៊ុនប៉ាងណាគ្រី ស្ថិតក្នុងភូមិអូរអំពិល ឃុំទួលពង្រ ស្រុកម៉ាឡៃ។ ជនសង្ស័យទាំង០២នាក់ គឺឈ្មោះ កែវ សុភ័ណ ហៅក្រៅ គក់ ភេទប្រុស អាយុ៣៧ឆ្នាំ និងឈ្មោះ ភាព ផាត ភេទប្រុស អាយុ២៧ឆ្នាំ ត្រូវបានសន្តិសុខក្រុមហ៊ុនឃាត់ខ្លួន ខណៈកំពុងធ្វើសកម្មភាពលួច។

ក្រោយទទួលបានសេចក្ដីរាយការណ៍ លោកអនុសេនីយ៍ឯក ប៉ិ ប៊ុនចុង មេបញ្ជាការ(ស្តីទី)មូលដ្ឋានកងរាជអាវុធហត្ថស្រុកម៉ាឡៃ បានដឹកនាំកម្លាំងចុះដល់ទីតាំងកើតហេតុ ហើយនាំខ្លួនជនសង្ស័យទាំង២នាក់ រួមនឹងវត្ថុតាងម៉ូតូ០១គ្រឿង មកសួរនាំតាមនីតិវិធី។ ក្នុងពេលសួរនាំ ជនសង្ស័យបានឆ្លើយសារភាពថា ពួកខ្លួនពិតជាបានប្រព្រឹត្តបទល្មើសប៉ុនប៉ងលួចនេះពិតប្រាកដមែន។ លើសពីនេះ លទ្ធផលនៃការធ្វើតេស្តទឹកនោមរកសារធាតុញៀន ក៏បានបង្ហាញថាជនសង្ស័យទាំងពីរនាក់មានផ្ទុកសារធាតុញៀនផងដែរ។

ដោយផ្អែកលើចម្លើយសារភាព និងសកម្មភាពជាក់ស្តែង កម្លាំងមូលដ្ឋានកងរាជអាវុធហត្ថស្រុក បានកសាងសំណុំរឿងបញ្ជូនបន្តមកបញ្ជាការដ្ឋានកងរាជអាវុធហត្ថខេត្ត ដើម្បីចាត់ការបន្តតាមនីតិវិធីច្បាប់។ ការបង្ក្រាបករណីនេះ បានធ្វើឡើងក្រោមបញ្ជាពីលោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្ត និងមានការសម្របសម្រួលនីតិវិធីពីលោក កើត វណ្ណារ៉េត ព្រះរាជអាជ្ញាអមសាលាដំបូងខេត្តផងដែរ។

បច្ចុប្បន្ន ជនសង្ស័យទាំង០២នាក់ ត្រូវបានកម្លាំងការិយាល័យព្រហ្មទណ្ឌ កងរាជអាវុធហត្ថខេត្ត បញ្ជូនទៅសាលាដំបូងខេត្ត ដើម្បីអនុវត្តតាមនីតិវិធីច្បាប់ជាធរមាន?