(ស្វីស)៖ ក្រុមនិស្សិតមកពីកម្មវិធីថ្នាក់បរិញ្ញាបត្រនីតិសាស្រ្ត សិក្សាជាភាសាអង់គ្លេស (ELBBL) នៃសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច (RULE) ដែលតំណាងឲ្យព្រះរាជាណាចក្រកម្ពុជា បានទទួលចំណាត់ថ្នាក់ក្នុងចំណោមក្រុមឆ្នើមទាំង ១៦ និងសារណាលេខ៥ ក្នុងចំណោម ១២២ ក្រុមទូទាំងពិភពលោក ក្នុងការប្រកួតសវនាការប្រឌិតស្តីពីសិទ្ធិមនុស្សអន្តរជាតិ Nelson Mandela លើកទី១៨ (18th Nelson Mandela World Human Rights Moot Court Competition) ដែលប្រព្រឹត្តទៅនៅថ្ងៃទី១៣ ដល់ថ្ងៃទី១៧ ខែកក្កដា ឆ្នាំ២០២៦ នៅទីក្រុងហ្សឺណែវ ប្រទេសស្វីស។

កម្មវិធីប្រកួតប្រជែងសវនាការប្រឌិតនេះ គឺជាវេទិកាអន្តរជាតិដ៏មានសារៈសំខាន់មួយ ដែលផ្តល់ឱកាសឱ្យនិស្សិតច្បាប់មកពីបណ្តាសកលវិទ្យាល័យនៅជុំវិញពិភពលោក ដែលមានសមត្ថភាពជ្រៅជ្រះលើច្បាប់អន្តរជាតិ ជាពិសេសច្បាប់សិទ្ធិមនុស្ស ច្បាប់មនុស្សធម៌អន្តរជាតិ និងច្បាប់ពាក់ព័ន្ធផ្សេងទៀត ដើម្បីអាចធ្វើការបង្ហាញនូវសមត្ថភាពចំណេះដឹងរបស់ខ្លួន តាម
រយៈការតស៊ូមតិ និងការសួរដេញដោល ផ្អែកលើមូលដ្ឋានច្បាប់ និងអង្គហេតុនៃសំណុំរឿងដ៏ស្មុគ្រស្មាញនៅចំពោះមុខគណៈកម្មការ ដែលមានសមាសភាពជាអ្នកជំនាញច្បាប់អន្តរជាតិ និងជាចៅក្រមនៃតុលាការសិទ្ធិមនុស្សប្រចាំតំបន់ ដូចជា តំបន់អ៊ឺរ៉ុប អាម៉េរិក និងអាហ្រ្វិក។ នៅក្នុងឆ្នាំ២០២៦ នេះ មានសាកលវិទ្យាល័យផ្នែកច្បាប់ល្បីៗរហូតដល់ចំនួន ១២២ មកពីជុំវិញពិភពលោក បានចូលរួមប្រកួតប្រជែង។

ឆ្លងកាត់ការប្រកួតវគ្គជម្រុះដំបូងតាមរយៈការវាយតម្លៃលើសារណាការពារ និងវគ្គជម្រុះតាមប្រព័ន្ធអនឡាញ (Online Preliminary Rounds) យ៉ាងស្វិតស្វាញកាលពីខែឧសភា ឆ្នាំ២០២៦ ក្រុមតំណាងកម្ពុជាមកពីសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច បានបង្ហាញសមត្ថភាពយ៉ាងលេចធ្លោ ទាំងលើជំនាញស្រាវជ្រាវច្បាប់ និងការតស៊ូមតិ រហូតអាចដណ្តើមបានឱកាសក្នុងចំណោម «ក្រុមខ្លាំងបំផុតទាំង ២៤ លើពិភពលោក» (Top 24 Qualifying Teams) ដើម្បីធ្វើដំណើរទៅថ្លែងហេតុផលផ្ទាល់មាត់នៅក្នុងអង្គការសហប្រជាជាតិ។

ក្នុងវគ្គជម្រុះបន្ទាប់នៅទីក្រុងហ្សឺណេវ ក្រុមនិស្សិតក៏បានឈានទៅវគ្គក្រុមឆ្នើមទាំង១៦ ហើយសារណាការពាររបស់ក្រុមនិស្សិតទទួលបានជ័យលាភីលេខ៥ ផងដែរ។

ជោគជ័យដ៏អស្ចារ្យនេះ គឺជាមោទកភាពយ៉ាងខ្លាំងសម្រាប់សាកលវិទ្យាល័យភូមិន្ទនីតិសាស្រ្ត និងវិទ្យាសាស្រ្តសេដ្ឋកិច្ច ដែលបានឈរលើឆាកអន្តរជាតិ និងបានបង្ហាញពីការប្តេជ្ញាចិត្តខ្ពស់ ការខិតខំប្រឹងប្រែងឥតឈប់ឈរ និងឧត្តមភាពក្នុងការអប់រំនិងបណ្តុះបណ្តាលផ្នែកច្បាប់របស់សាកលវិទ្យាល័យ៕