(បរទេស)៖ ក្រុមមន្រ្តីបច្ចេកទេសរបស់សហព័ន្ធបាល់ទាត់ FIFA បានបោះឆ្នោតហូឡង់ ជាក្រុមលេងល្អ ប្រកបដោយការយោគយល់អធ្យាស្រ័យគ្នា និងគោរពក្រមសីលធម៌ ប្រចាំព្រឹតិ្តការណ៍ជើងឯកពិភពលោក World Cup 2026 ដែលទើបបញ្ចប់កាលពីថ្ងៃទី១៩ ខែកក្កដា។

ហូឡង់ ជាក្រុមនៅទ្វីបអឺរ៉ុប និងលេងបានតែ ៤ប្រកួតគត់ក៏ជ្រុះចេញត្រឡប់មកផ្ទះវិញត្រឹមវគ្គចាញ់-ធ្លាក់ ៣២ក្រុមតែប៉ុណ្ណោះ ក្នុងចំណោម ៤៨ប្រទេសដែលមានវត្តមាននៅមិចស៊ិក កាណាដា និងសហរដ្ឋអាមេរិក។

ទោះជាយ៉ាងណា ពួកគេនៅតែមិនអាចបំបែកប្រវត្តិ និងការទន្ទឹងរង់ចាំពាន World Cup លើកដំបូង ដោយបានត្រឹមរង ជើងឯកកាលឆ្នាំ២០១០ និងជាប់លេខ៣ កាលឆ្នាំ២០១៤ នៅប្រេស៊ីល បានទទួលពានកិត្តិយស fair-play។

ស្ថិតិ ៤ប្រកួតរបស់ក្រុមទឹកក្រូចហូឡង់ ស្ថិតក្រោមការដឹកនាំរបស់លោក Ronald Koeman ជាក្រុមលេខ១ ចេញពីពូល F ក្រោយឆ្លងកាត់ ៣ប្រកួតសន្សំពិន្ទុ ឈ្នះ២ និងស្មើ១ មិនដែលចាញ់ និងស្ថិតនៅលេខរៀងទី៩ ផងដែរ ក្នុងតារាងចំណាត់ថ្នាក់ពិភពលោក FIFA World Ranking គិតត្រឹមខែកក្កដា ឆ្នាំ២០២៦ ក្នុងចំណោម ២១១ប្រទេសជាសមាជិក។

ហូឡង់ ត្រូវបង្ខំចិត្តត្រឡប់មកផ្ទះវិញត្រឹមវគ្គ ៣២ក្រុម ក្រោយចាញ់ក្រុមមកពីអាហ្វ្រិក ម៉ារ៉ុក ៣-២ ដោយបាល់ប៉េណាល់ទីកាត់សេចក្តី ក្រោយពេលពេញម៉ោង ៩០នាទី និងថែម ១៥នាទី ២ដងស្មើគ្នា ១-១ រួចមក។ ហូឡង់ ទទួលបានកាតលឿង ៣សន្លឹកផងដែរ ពេលលេងបើកឆាកស្មើ ២-២ ទល់នឹងជប៉ុន៕