(សៀមរាប)៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានស្នើសុំឲ្យបញ្ចប់ការជជែកគ្នាលើបណ្តាញសង្គម រឿងលោកបណ្ឌិត និងអ្នកចែវទូក។

សំណើនេះបានធ្វើឡើង ក្នុងឱកាសសម្តេចធិបតី អញ្ជើញប្រគល់សញ្ញាបត្រដល់និស្សិតនៃសកលវិទ្យាល័យ South-East Asia នៅសណ្ឋាគារសុខា ខេត្តសៀមរាប នាព្រឹកថ្ងៃទី២១ ខែកក្កដា ឆ្នាំ២០២៦។

សម្តេចធិបតី ហ៊ុន ម៉ាណែត បានញ្ជាក់ថា «មុននឹងបញ្ចប់ ខ្ញុំស្នើសូមបញ្ចប់ទៅរឿងបណ្ឌិត និងអ្នកចែវទូក។ ម្សិលមិញ ជួបជាមួយប្អូន ញិល រដ្ឋា (ប្រធានសមាគមអតីតនិស្សិតកម្ពុជាពីសូវៀត និងរុស្ស៉ី) បាយជាមួយគ្នា ក្រោយប្រជុំព្រឹក។ ខ្ញុំជួបគាត់រឿងនេះទេ។ មុនចេញទៅចិន កំពុងធ្វើការមួយចំនួន ដើម្បីកែទម្រង់ SMEs ។ ខ្ញុំឃើញគាត់វិភាគពី SMEs និង FDI ទាក់ទងនឹងការវិនិយោគ ក៏គ្រោងមកពីចិននឹងជួប តែវាចៃដន្យ ខ្ញុំចូលចិត្តអានអត្ថបទរបស់ មេទ័ព លីពូ គាត់សរសេរសាបៗងាយយល់»។

សម្តេចធិបតី ហ៊ុន ម៉ាណែត បានបន្តថា «ថ្ងៃហ្នឹង គាត់យករឿងអ្នកចេវទូក និងបណ្ឌិត … ឃើញឃ្លាចុងក្រោយមានពាក្យបណ្ឌិត ខ្ញុំស្មានតែគាត់និយាយសម្តៅបណ្ឌិតក្រៅប្រទេស ដែលវិភាគរឿងទ័ពថាធ្លាប់លីអង្ករឲ្យទាហាន។ ខ្ញុំមិនសម្តៅដល់នរណាទេ (មិនមែនយករឿងបណ្ឌិត និងអ្នកចេវទូក សម្តៅបណ្ឌិត ញិល រដ្ឋា នោះទេ)។ អ្វីដែលខ្ញុំចង់ដឹង ទស្សនៈនៃរឿងនេះ គឺគេអប់រំភាពរាបសាររបស់អ្នកចេះដឹង»។

ក្នុងកិច្ចពិភាក្សាតុមូល ស្តីពី «តើអ្វីដែលជាសេណារីយ៉ូ ធ្វើឱ្យពិភពលោកបាត់បង់សណ្តាប់ធ្នាប់នាពេលបច្ចុប្បន្ន?» ដែលរៀបចំឡើងដោយរាជបណ្ឌិត្យសភាកម្ពុជា នាថ្ងៃទី១៧ ខែកក្កដា ឆ្នាំ២០២៦ លោកបណ្ឌិត ញិល រដ្ឋា ប្រធានសមាគមអតីតនិស្សិតកម្ពុជាពីសូវៀត និងរុស្ស៉ី បានវិភាគពីបញ្ហាសង្គម និងសេដ្ឋកិច្ច។

បន្ទាប់មក សម្តេចធិបតី ហ៊ុន ម៉ាណែត បានចែករំលែករឿងបណ្ឌិត និងអ្នកចែវទូក ស្រាប់តែមានការទាញថា សម្តេចធិបតី សម្តៅដល់លោកបណ្ឌិត ញិល រដ្ឋា ទៅវិញ។ ប្រការនេះ ក៏មានមតិថា សម្តេចធិបតី បានបិទសេរីភាពក្នុងការបញ្ចេញទស្សនៈ ខណៈសម្តេចធិបតី ក៏បានអះអាងច្បាស់ៗថា សម្តេចគាំទ្ររាល់ទស្សនៈរបស់បញ្ញវ័ន្ត៕