(ភ្នំពេញ)៖ ក្រសួងព័ត៌មាន បានប្រកាសរៀបចំកម្មវិធីប្រកួតប្រជែងដណ្ដើមពានរង្វាន់ផលិតមាតិកាស្ដីពីការប្រយុទ្ធប្រឆាំងព័ត៌មានក្លែងក្លាយ ក្រោមប្រធានបទ «ការប្រយុទ្ធប្រឆាំងព័ត៌មានក្លែងក្លាយ និងការលើកកម្ពស់សុចរិតភាពព័ត៌មាន នៅក្នុងតំបន់ឡានឆាង-មេគង្គ»។

ក្រសួងព័ត៌មានបានអញ្ជើញអ្នកសារព័ត៌មាន អ្នកផលិតមាតិកា អ្នកមានឥទ្ធិពលលើបណ្តាញសង្គមទាំងជាតិ និងអន្តរជាតិ និស្សិតជំនាញសារព័ត៌មាន ប្រព័ន្ធផ្សព្វផ្សាយ ការទំនាក់ទំនង និងគោលនយោបាយសាធារណៈទាំងអស់ឱ្យចូលរួម។

ការប្រកួតប្រជែងនេះគឺជាផ្នែកមួយនៃគម្រោង «យុទ្ធនាការប្រឆាំងព័ត៌មានក្លែងក្លាយ៖ ការពង្រឹងកិច្ចខិតខំប្រឹងប្រែងប្រឆាំងព័ត៌មានភាន់ច្រឡំបន្ទាប់ពីការប្រយុទ្ធប្រឆាំងព័ត៌មានក្លែងក្លាយសម្រាប់អ្នកសារព័ត៌មាន (ដំណាក់កាលទី២)» ដែលទទួលបានការគាំទ្រពីរាជរដ្ឋាភិបាលចិន ក្រោមមូលនិធិពិសេសនៃកិច្ចសហប្រតិបត្តិការឡានឆាង-មេគង្គ។

គោលបំណងសំខាន់នៃការប្រកួតនេះ គឺដើម្បីលើកតម្កើង និងទទួលស្គាល់ស្នាដៃសារព័ត៌មាន និងមាតិកាប្រកបដោយគំនិតច្នៃប្រឌិត ដែលរួមចំណែកលើកកម្ពស់ការពិត ពង្រឹងទំនុកចិត្តសាធារណៈ និងបង្កើតលំហព័ត៌មានដែលមានសុវត្ថិភាព។

កម្មវិធីនេះនឹងជំរុញ និងលើកទឹកចិត្តអ្នកសារព័ត៌មាន អ្នកជំនាញក្នុងប្រព័ន្ធផ្សព្វផ្សាយ អ្នកបង្កើតមាតិកាឌីជីថល និងមន្ត្រីទំនាក់ទំនងវ័យក្មេងទាំងអស់ ឱ្យចូលរួមផលិតមាតិកាដែលមានគុណភាពខ្ពស់ ផ្អែកលើការពិត មានការទទួលខុសត្រូវខ្ពស់ និងគោរពក្រមសីលធម៌វិជ្ជាជីវៈ។

តាមរយៈការចូលរួមនេះ ក្រសួងព័ត៌មានរំពឹងថានឹងអាចលើកកម្ពស់ការយល់ដឹងរបស់សាធារណជនក្នុងការកំណត់ ផ្ទៀងផ្ទាត់ និងទប់ស្កាត់ព័ត៌មានក្លែងក្លាយ ប្រកបដោយប្រសិទ្ធភាព ដើម្បីធានានូវសុចរិតភាពព័ត៌មាននៅក្នុងតំបន់ឡានឆាង-មេគង្គ៕